އިނގިރޭސި ޕްރިމިއާ ލީގުގައި ހޯމަ ދުވަހުގެރޭ ކުޅުނު މެޗުން ކްރިސްޓަލް ޕެލަސް އަތުން ފަހު ވަގުތު އާސެނަލް ބަލިނުވެ ސަލާމަތްވެއްޖެއެވެ.

އާސެނަލުގެ ދަނޑުގައި ކުޅުނު މި މެޗު އެއްވަރުވީ 2-2 ގެ ނަތީޖާއަކުންނެވެ. މި މެޗުން އާސެނަލް ބަލިނުވެ ސަލާމަތްވިއިރު، އެ ޓީމުން މިހާރު ވަނީ ބަލިނުވެ ހަ މެޗު ހަމަކޮށްފައެވެ. އަދި އާސެނަލާ އެއްވަރުވި ޕެލަސްއިން އެންމެ ފަހުން ކުޅުނު ތިން މެޗުވެސް ނިމުނީ އެއްވަރުވެގެންނެވެ.

ލީގުގައި ހޯމަ ދުވަހުގެރޭ ކުޅުނު މެޗުގައި ފޯރިގަދަ ކުޅުމެއް ފެނިގެންދިޔައިރު، މި މެޗުގެ ވަރަށް ކުރީކޮޅު އާސެނަލުން ވަނީ ލީޑު ނަގާފައެވެ. ފެށު ފަށައިގެން އަށްވަނަ މިނެޓުގައި އޭރިއާ ތެރެއިން ލިބުނު ބޯޅައަކުން މި ލަނޑު އާސެނަލަށް ކާމިޔާބުކޮށްދިނީ އެ ޓީމުގެ ކެޕްޓަން ޕިއޭ-އެމެރިކް އޮބާމަޔަންއެވެ. އެކަމަކު އޭގެ ފަހުން ޕެލަސްއިން ކުޅުން ރަނގަޅުކުރިއިރު، ފުރަތަމަ ހާފުގައި އޭރިއާ ބޭރުން އެ ޓީމުގެ ކޯނޯ ގަލަގާ ފޮނުވާލި ނުރައްކާތެރި ހަމަލާއެއް އާސެނަލުގެ ގޯލްކީޕަރު އާރޮން ރާމްސްޑޭލް ވަނީ ދިފާއުކޮށްފައެވެ.

މި މެޗުގައި ޕެލަސްއިން ނަތީޖާ އެއްވަރުކޮށްފައިވަނީ ދެވަނަ ހާފު ފަށައިގެން ފަސްވަނަ މިނެޓުގައެވެ. އާސެނަލުގެ ކުޅުންތެރިން ހެދި ގޯހެއްގެ ފައިދާ ނަގައި މި ލަނޑު އެ ޓީމަށް ކާމިޔާބުކޮށްދިނީ ކްރިސްޓިއަން ބެންޓެކޭއެވެ. އަދި މެޗުގެ 73 ވަނަ މިނެޓުގައި އުފެއްދި ކައުންޓަ އެޓޭކެއްގައި އުޑްސަން އެޑޮއާޑް ވަނީ ލަނޑެއް ޖަހައި، ޕެލަސްއަށް ލީޑު ނަގައިދީފައެވެ.

އޭގެ ފަހުން ނަތީޖާ އެއްވަރުކުރުމަށް އާސެނަލުން ގިނަ މަސައްކަތްތަކެއް ކުރިއިރު، އެ ޓީމުގެ ކިއެރަން ޓީނީ ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. މި މެޗުން އާސެނަލް ބަލިނުވެ ސަލާމަތްވީ މެޗުގެ އިތުރު ވަގުތުގައި އަލެކްސެންޑަ ލަކަޒޭޓް ކާމިޔާބުކުރި ލަނޑުންނެވެ.

މި ނަތީޖާއާއެކު ތާވަލުގެ 12 ވަނައަށް އާސެނަލް ޖެހިލިއިރު، އެ ޓީމަށް ވަނީ ކުޅުނު އަށް މެޗުން 11 ޕޮއިންޓް ލިބިފައެވެ. އަދި އާސެނަލާ އެއްވަރުވި ޕެލަސް އޮތީ ތާވަލުގެ 14 ވަނައިގައި އަށް މެޗުން އަށް ޕޮއިންޓާއެކުއެވެ.