ހޯމް މިނިސްޓްރީގެ ދަށުން ފުލުހުންގެ ޚިދުމަތް ވަކިކޮށްފި
ފުލުހުންގެ އިދާރާ ހިންގާނީ ކޮން ވަޒީރެއްގެ ބެއްލެވުމުގެދަށުން ކަމެއް ޤާނޫނުގައި ބުނެފައެއްނުވޭ
އދ. އޮމަދޫ ޕޮލިސް ޕޯސްޓް ހުޅުވުމުގެ ރަސްމިއްޔާތުގައި ހޯމް މިނިސްޓަރ ޢިމްރާން ޢަބްދުﷲ (މ) ބައިވެރިވެވަޑައިގަންނަވަނީ
މިނިސްޓްރީ އޮފް ހޯމް އެފެއަރޒްގެ ދަށުން ދިވެހި ފުލުހުންގެ ޚިދުމަތް ވަކިކޮށްފިއެވެ.
ފުލުހުންގެ ޤާނޫނު 5/2008ގެ ދަށުން އުފައްދައި, މިނިސްޓްރީ އޮފް ހޯމް އެފެއާޒްގެ ދަށުން ހިނގަމުންދާ ގޮތަށް ހަމަޖައްސާފައިވާ މޯލްޑިވްސް ޕޮލިސް ސަރވިސް, ދިވެހި ފުލުހުންގެ ޚިދުމަތުގެ ދަށުން ވަކި ޤާނޫނެއްގެ ދަށުން ހިންގަން ފެށުމާއެކު, މިނިސްޓްރީގެ މަސްއޫލިއްޔަތުގެ ދަށުން ފުލުހުންގެ ޚިދުމަތް ވަކިކޮށްފައިވާކަން އަންގާފައިވަނީ މި މަހުގެ 14 ވަނަ ދުވަހު ހޯމް މިނިސްޓަރަށް ރައީސް އޮފީހުން ފޮނުއްވި ސިޓީގައެވެ.
ރައީސް އޮފީހުގެ ޗީފް އޮފް ސްޓާފް ޢަލީ ޒާހިރު ސޮއިކުރައްވައި ހޯމް މިނިސްޓަރ ޢިމްރާން ޢަބްދުﷲއަށް ފޮނުއްވި ސިޓީގައި ވިދާޅުވެފައިވަނީ; 34/2020 ދިވެހި ފުލުހުންގެ ޚިދުމަތް ކަމުގައި ޤާނޫނުގައި ބަޔާން ކުރާތީއާއި، 34/2020ގައި ދިވެހި ދިވެހި ފުލުހުންގެ ޚިދުމަތަކީ ވަކި މިނިސްޓްރީއެއްގެ ދަށުން ހިންގަމުންދާނެ އިދާރާއެއްކަމުގައި ކަނޑައަޅާފައި ނުވާތީ, މިނިސްޓްރީ އޮފް ހޯމް އެފެއަރޒްގެ ދަށުން މޯލްޑިވްސް ޕޮލިސް ސަރވިސް ހިނގަމުންދާގޮތަށް ހަމަޖައްސާފައިވާ އޮތް އޮތުން, 27 މާޗް 2021 ވަނަ ދުވަހުން ފެށިގެން ނިމުމަކަށް ގެންނަވައިފިކަމުގައި ދަންނަވަން ރައީސުލްޖުމްހޫރިއްޔާ ވިދާޅުވި ކަމަށެވެ.
މިގޮތަށް ހަމަޖެއްސެވުމާ ގުޅިގެން, 27 މާޗް 2021ން ފެށިގެން މިނިސްޓްރީއާއި މިނިސްޓްރީގެ ދަށުން ހިނގަމުންދާ ތަންތަނުގެ މަސައްކަތްތައް ހަމަޖައްސަވާފައިވާ ގޮތް ލިޔުމުން ފޮނުވާފައިވާ ކަމަށެވެ. އަދި އެ މަސައްކަތްތައް މިނިސްޓްރީއާއި މިނިސްޓްރީގެ ދަށުން ހިނގަމުންދާ ތަންތަނުން ހިންގަވަމުން ގެންދެވުމަށް ދަންނަވަން ރައީސް ވިދާޅުވިކަމަށް މި ސިޓީގައި ވިދާޅުވެފައިވެއެވެ.
ރައީސް އޮފީހުގެ ސިޓީގައި މިހެން ވިދާޅުވެފައިވީ ނަމަވެސް، 34/2020 ދިވެހި ފުލުހުންގެ ޚިދުމަތުގެ ޤާނޫނުގައި ބުނާ ގޮތުން، ފުލުހުންގެ މުއައްސަސާގެ ކަންކަން ބަލަހައްޓަން ވަކި މިނިސްޓްރީއެއް ހަމަޖައްސާފައެއްނެތެވެ. އޭގެ ބަދަލުގައި މިނިސްޓަރެއް ހުންނަވާނެކަމަށް ޤާނޫނުގައި ބުނެފައިވެއެވެ.
ފުލުހުންގެ ޚިދުމަތުގެ ގާނޫނުގެ 12 ވަނަ ބާބު (ވަޒީރުގެ ދައުރު)ގެ 68 ވަނަ މާއްދާގެ ހ ގައި ބުނެފައިވަނީ; މި ޤާނޫނާ އެއްގޮތްވާ ގޮތުގެމަތިން ފުލުހުންގެ ޚިދުމަތް ދިނުމުގެ އެންމެހައި ކަންކަމުގެ ޒިންމާ ސަރުކާރުގެ ފަރާތުން އުފުލާ އެންމެ އިސްފަރާތަކީ ވަޒީރެވެ. ފުލުހުންގެ ޚިދުމަތާ ގުޅޭ ކަންކަމުގައި ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ޖަވާބުދާރީވާނީ ވަޒީރެވެ. ނަމަވެސް ވަކި ވަޒީރެއް ނުވަތަ ވުޒާރާއެއްގެ ނަމެއް ގާނޫނުގައި ނެތެވެ.
މި މާއްދާގެ ށ ގައި ބުނެފައިވަނީ މި މާއްދާގެ ހ ގެ ބޭނުމަށްޓަކައި، ވަޒީރު އެ ޒިންމާ އުފުލާނީ، މި ޤާނޫނުގައި ބަޔާންވެގެންވާ ގޮތުގެމަތިން ކަނޑައަޅާ ސްޓްރެޓީޖިކް ޕޮލިސިންގ ރިކުއަޔަރމަންޓާއި އެކިއެކި ޢާންމު ސިޔާސަތުތަކާއި، ދޭ ޢާންމު އިރުޝާދުތަކާއި، ކަނޑައަޅާ މިންގަނޑުތަކާއި، އެކަށައަޅާ ހަމަތަކާ އެއްގޮތްވާ ގޮތުގެމަތިންނެވެ. އެ ސިޔާސަތުތަކާއި މިންގަނޑުތަކާއި ހަމަތައް ކަނޑައަޅަންވާނީ އިތުބާރު ލިބިފައިވާ ފުލުހުންގެ ޚިދުމަތެއް ދިނުމަށާއި، ފުލުހުންގެ ވާޖިބުތައް ތަންފީޛުކުރެވޭނެ މާޙައުލެއް ކަށަވަރުކޮށްދިނުމަށާއި، ވަސީލަތް ކަށަވަރުކޮށްދިނުމަށާއި، އަދި ފުލުހުން އަދާކުރާ ވަޒީފާ ޕްރޮފެޝަނަލްކަމާއެކު އަދާކުރަމުންދާ މިންގަނޑު ބަލައި ދެނެގަނެވޭނެ އުސޫލުތައް ތަޢާރަފުކޮށް، އެ އުސޫލުތައް ތަންފީޛުކުރުމަށެވެ. ދިވެހި ފުލުހުންގެ ޚިދުމަތުގެ ޤާނޫގައި ވަޒީރު ކަމަށް ބުނެފައިއެވަނީ, ޤާނޫނުއަސާސީގެ 242 ވަނަ މާއްދާގެ ދަށުން ދިވެހި ފުލުހުންގެ ޚިދުމަތަށް ޒިންމާ މަތިކުރެވިފައިވާ ވަޒީރަށެވެ.
ޤާނޫނުއަސާސީގެ 242 ވަނަ މާއްދާގައި ބުނެފައިވަނީ ސަލާމަތީ ކޮންމެ ޚިދުމަތެއް ހިންގަން ވާނީ ވަޒީރުންގެ މަޖިލީހުގެ މެންބަރެއްގެ ބެލުމުގެ ދަށުންނެވެ. އެ ވަޒީރެއްގެ ބެލުމުގެ ދަށުން ހިނގާ ސަލާމަތީ ޚިދުމަތެއްގެ ކަންކަމާއި ގުޅިގެން ރައީސުލްޖުމްހޫރިއްޔާއަށާއި، ރައްޔިތުންގެ މަޖިލީހަށް އެ ވަޒީރަކު ޖަވާބުދާރީވާން ވާނެއެވެ.
ދުނިޔޭގެ ގިނަ ގައުމުތަކުގައި ފުލުހުންގެ ޚޖދުމަތް ހިންގަމުން އަންނަނީ ދާޚިލީ ވަޒީރު ނުވަތަ ހޯމް މިނިސްޓްރީގެ ބެލުމުގެ ދަށުންނެވެ. އަދި މިއީ ޑިމޮކްރަޓިކް ގައުމުތަކުގައި އަމަލުކުރަމުން އަންނަ އުސޫލެވެ.
