ކާށިދޫ ކަނޑަށް ވެއްޓި ގެއްލިގެން ހޯދަމުންދިޔަ ޒުވާނާ ފަތާފާއި ގޮސް ކާށިދޫއަށް އަރައިފިއެވެ.

ފުލުހުން ބުނީ ގެއްލިގެން ހޯދަމުންދިޔަ މީހާ ފަތާފައި ގޮސް ކާށިދޫއަށް އަރާފައިވާ ކަމަށާއި، އެމީހާގެ ހާލު ރަނގަޅު ކަމަށެވެ. އަދި އެމީހާ ފުލުހުންގެ ބެލުމުގެ ދަށަށް ވަނީ ގެނެސްފައެވެ.

އެމީހާ ފަތާފައި ގޮސް ކާށިދޫއަށް އަރާފައި މިވަނީ އޭނާ ހޯދުމުގެ މަސައްކަތް ކޯސްޓްގާޑުން ކުރަމުން ދަނިކޮށްށެވެ. މިހާދިސާއާ ގުޅިގެން އެމްއެންޑީއެފުން ބުނީ ހުޅުމާލެއިން ފުރައިގެން ބ. އަތޮޅަށް ދަތުރުކޮށްފައި ދިޔަ ބޯޓަކުން 25 އަހަރުގެ ޒުވާނެއް ހޯމަ ދުވަހުގެ ހެނދުނުގެ ވަގުތެއްގައި ކަނޑަށް ވެއްޓިފައިވާ ކަމަށެވެ. އެމްއެންޑީއެފުން ބުނީ މި ބޯޓު ދަތުރުކުރީ ކާށިދޫގެ ހުޅަނގުން ހަނޯޓިކަލް މޭލު ބޭރުން ކަމަށެވެ. މިއީ މުދާ އުފުލާ ބޯޓެއް ކަމަށް އެމްއެންޑީއެފުން ބުނެއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ ހޯމަ ދުވަހުގެ ހެނދުނު 10:45 ހާއިރުއެވެ.

މޫސުން ގޯސްވެ، ކަނޑުމަތީގެ ހިތާމަވެރި ހާދިސާތައް ދަނީ ހިނގަމުންނެވެ. އިތުރަށް ސަމާލުމަށް އިލްތިމާސްކޮށްފައިވާއިރު، މިހާރު ވެސް ކަނޑަށް ގެއްލުނު ކުޑަ ކުއްޖަކު ހޯދުމުގެ މަސައްކަތް އެމްއެންޑީއެފުން ދަނީ ކުރަމުންނެވެ.