އެންމެ ހުނަރުވެރި ދަރިވަރުންގެ ކިބައިން މިނިސްޓަރ އެދިވަޑައިގަތީ މުދައްރިސްކަމަށް ކުރިމަތިލައި، މޮޅެތި ދަރިވަރުންތަކެއް ބިނާކޮށްދިނުމަށް
މޮޅެތި ޓީޗަރުން ތައުލީމީ ނިޒާމަށް ވަނުމަކީ، މޮޅެތި ދަރިވަރުން މުސްތަގުބަލުގައި މަދަރުސާތަކުން ތަރުބިއްޔަތު ކުރެވޭނެ މުޖައްރިބު ގޮތް
އެޑިޔުކޭޝަން މިނިސްޓަރ ޑރ އާއިޝަތު އަލީ
ތައުލީމީ ގޮތުން ރާއްޖެ ކުރިއަރައިދާނީ ހުނަރުވެރި ޓީޗަރުންތަކެއް ތަމްރީނުވެގެން ކަމަށާއި, އެހެންކަމުން އެމަގަށް ވާސިލްވުމަށް އެންމެ ހުނަރުވެރި ކުދިން ޓީޗަރުކަމަށް ނިކުތުމަށް އެޑިޔުކޭޝަން މިނިސްޓަރ ޑރ އާއިޝަތު އަލީ އެދިވަޑައިގަންނަވައިފިއެވެ.
2019 ވަނަ އަހަރުގެ ގަދަ 10ގައި ހިމެނުނު ދަރިވަރުންނަށް އިނާމު ދިނުމަށް ތާޖުއްދީން ސްކޫލްގައި ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ ވިދާޅުވީ, ރަނގަޅު މުޖުތަމައެއް ބިނާކުރުމަށް ކުދިންނަށް ކޮށްދެވޭނެ އެންމެ ބޮޑު އެއް ޚިދުމަތީވެސް އެއީކަމަށެވެ. މޮޅެތި ޓީޗަރުން ތައުލީމީ ނިޒާމަށް ވަނުމަކީ, މޮޅެތި ދަރިވަރުން މުސްތަގުބަލުގައި މަދަރުސާތަކުން ތަރުބިއްޔަތު ކުރެވޭނެ މުޖައްރިބު ގޮތްކަމަށް މިނިސްޓަރ ވިދާޅުވިއެވެ.
މީގެއިތުރުން މިނިސްޓަރ ވިދާޅުވީ އުނގަންނައިދިނުމުގެ މަސައްކަތަކީ އޭގެ އަސަރުތައް އެތައް ޖީލަކަށް ދެމިގެންދާ ކަމެއްކަމަށެވެ.
މީގެއިތުރުން މިނިސްޓަރ ވިދާޅުވީ ތިމާ ދިރިއުޅުމުގައި ކާމިޔާބު މީހަކަށް ވަނީ ހަމައެކަނި އުނގެނޭ އެއްޗަކުން ނޫންކަމަށެވެ. ކާމިޔާބު މީހަކަށް ވުމަށްޓަކައި އެހެނިހެން ސިފަތަކާއި ހުނަރުތަކެއް ބޭނުންވާކަމަށް މިނިސްޓަރ ވިދާޅުވިއެވެ. ވޭތުވެ ދިޔަ 30 އަހަރަކަށް ދުވަހުގެ ތެރޭގައި ޓޮޕް އެޗީވަރސް, އެތައް ހާސް ދަރިވަރުންނެއް ހާސިލުކޮށްފައިވާކަމަށް މިނިސްޓަރ ވިދާޅުވިއެވެ. އެކުދިންގެ ހަޔާތުގެ ނަތީޖާތަކަށް ނަޒަރު ހިންގާލާއިރު ފާހަގަކޮށްލެވޭ އެންމެ މުހިންމު ކަމަކީ އެންމެ ބޮޑު އަސަރެއް މުޖުތަމައަށް ގެނެސްފައިވަނީ ހަމައެކަނި ތައުލީމީ ގޮތުން މޮޅު ކުދިން ނޫންކަމަށް މިނިސްޓަރ ވިދާޅުވިއެވެ.
އެންމެ ކާމިޔާބު ކުދިން ކަމަށް ވެފައިވަނީ އެކުދިން ހޯދި އިލްމާއި ހުނަރު އެންމެ ފުޅާ ދާއިރާއެއްގައި ގައުމަށް ފޯރުކޮށްދިން, އެންމެ ގިނަ ބަޔަކަށް އެކުދިންގެ ހެޔޮ އަސަރު ލިއްބައިދިން ކުދިންކަމަށާއި, ލިބޭ މުސާރައަށްވުރެ އިޖުތިމާއީ މަންފާއަށް ޚިދުމަތުގެ އަތުކުރި އޮޅާލި ކުދިންކަމަށް މިނިސްޓަރ ވިދާޅުވިއެވެ. ޖެހުނު ކޮންކެ ކަމެއް ކުރަން ފަސްނުޖެހި ކެރުނު ކުދިންކަމަށާއި މައްސަލަތައް ހައްލުކުރަން އިސްނަގައި ވޮލަންޓިއަރކުރި ކުދިންކަމަށް މިނިސްޓަރ ވިދާޅުވިއެވެ.
އެތައް ބަޔެއްގެ ނަޒަރުގައި ދިރިއުޅުމުގެ ކާމިޔާބުގެ އެންމެ ބޮޑު ސިއްރަކީ ވަކި އަމާޒަކަށް ދަތުރުކުމުގައި ސާބިތުވެ ހުރުމާއި ދިމާވާ ހާދިސާތަކާއި ދަތިތަކަށް ފަހަތަށް ނުޖެހި, ބޭސާބިތުކަމަށް ޖާގަ ނުދީ, ހިތްވަރާއެކު މަސައްކަތްކުރުން ކަމަށް މިނިސްޓަރ ވިދާޅުވިއެވެ.
މީގެއިތުރުން މިނިސްޓަރ ވިދާޅުވީ އިލްމު އުނގެނުމަށް އޮންނަ އެންމެ ބޮޑު ހުރަހަކީ ތިމާއަށް މާގިނަ ތަކެތި އެނގޭކަމަށް އެމީހަކަށް ހީވުންކަމަށެވެ. މާމޮޅު ކަމަށް އަމިއްލައަށް ދުށުމަކީ ވަރަށް ބޮޑު މައްސަލައެއްކަން ފާހަގަކުރައްވާ މިނިސްޓަރ ވިދާޅުވީ, ކާމިޔާބުގެ ވަގުތުގައި ހިތްތިރިކޮށް ތަވާޟުޢުވެރިކަން އިސްކުރުމަށް ގޮވާލައްވާކަމަށެވެ.
މީގެއިތުރުން އިލްމު އުނގެނުމަށް އޮތް މަގަކީ އެނގޭ މިންވަރު މަދުކަމަށް ދެކި އަބަދުވެސް އައު ކަންކަން ދަސްކުރުންކަމަށް މިނިސްޓަރ ވިދާޅުވިއެވެ.
