21 ވަނަ ސައްތައިގައި ދިމާވާ ގޮންޖެހުންތަކާ ކުރިމަތިލެވޭވަރުގެ ޒުވާނުން އުފައްދަންޖެހޭ: ރައީސް
17 އޮކްޓޯބަރު 2021 | އާދީއްތަ 17:22މި ޒަމާނުގައި ކުރިއަށްދާން ބޭނުންވި ކޮންމެ ދާއިރާއަކުންވެސް ކުރިއަށްދެވޭނެ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު
21 ވަނަ ސައްތައިގައި ދިމާވާ ގޮންޖެހުންތަކާ ކުރިމަތިލެވޭވަރުގެ ޒުވާނުން އުފެއްދުމަކީ ކުރަންޖެހިފައިވާކަމެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ 2019 ވަނަ އަހަރުގެ މަތީ ސާނަވީ އިމްތިހާނުގެ ޓޮޕް އެޗީވަރސް ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ. މި ޖަލްސާގައި ވާހަކަދައްކަވަމުން ރައީސް ވިދާޅުވީ, 2019 ވަނަ އަހަރުގެ މަތީ ސާނަވީ އިމްތިހާނުގެ ނިންމި ދަރިވަރުންގެތެރޭގައި އެކި ރޮނގުރޮގުން ކުރިއަށްދާން ބޭނުންވާ ކުދިން ތިބޭނެކަން ޔަގީންކުރައްވާކަމަށެވެ.
މި ޒަމާނަކީ މިއީ ކޮންމެ ދާއިރާއަކުންވިޔަސް ކުރިއަށްދެވޭނެ މަގު ފަހިވެފައިވާ ޒަމާނެއް ކަމަށާއި، ސަރުކާރުގެ އަމާޒަކީ އެކުދިން ކުރިއަށްދާން ބޭނުންވި ކޮންމެ މިސްރާބަކަށްވެސް އެކުދިން ގެންގޮސްދިނުން ކަމަށް ރައީސް ވިދާޅުވިއެވެ. އެގޮތުން ރާއްޖެއާއި ރާއްޖެއިން ބޭރުން މަތީ ތައުލީމު ހާސިލްކުރުމުގެ ފުރުސަތު ފަހިކޮށްދީފައިވާކަން ރައީސް ފާހަގަކުރެއްވިއެވެ.
ރައީސުލްޖުމްހޫރިއްޔާ ވިދާޅުވީ މިއީ ސައިންސާއި ޓެކްނޮލޮޖީގެ އެހީގައި، އީޖާދީ ވިސްނުންތަކުން ގައުމުތައް ކުރިއަރައިދާ ޒަމާން ކަމަށެވެ. އެކާވީސް ވަނަ ސައްތައިގެ ތައުލީމުގެ އަމާޒަކީ، އިގްތިސާދީ ގޮތުންނާއި، އިޖުތިމާއީ ގޮތުން އަދި ޓެކްނޮލޮޖީގެ ގޮތުން މުޖުތަމައަށް އަންނަމުންދާ ހަލުވި ބަދަލުތަކާއި ކުރިއެރުންތަކަށް އިޖާބަދެވޭފަދަ ދަރިންތަކެއް އުފެއްދުން ކަމަށެވެ. އެކާވީސްވަނަ ސައްތައިގެ ތައުލީމު އަމާޒު ހިފާފައިވަނީ، މިހާތަނަށް އުފަންވެފައިނުވާ ވަޒީފާތަކަކަށް ތައްޔާރުކޮށްދިނުމަށް ކަމަށް ރައީސް ވިދާޅުވިއެވެ.
ޓެކްނޮލޮޖީގެ ޒަމާނުގައި، ވަޒީފާއަކީ ވަކި ތަނަކުން ވަކި މީހަކު ދޭ އެއްޗެއް ނޫން ކަމަށާއި، އެއީ އެމީހާ އަމިއްލައަށް އުފަންކުރުވާ އެއްޗެއް ކަމަށް ރައީސް ވިދާޅުވިއެވެ. އެއީ އެމީހެއްގެ އުފެއްދުންތެރިކަމަށް ބިނާކޮށް، އޭނާ އަމިއްލައަށް ކަނޑައަޅާ އެއްޗެއް ކަމަށާއި، އެފަދަ މީހަކަށް ވެވޭނީ ޒަމާނީ ޓެކްނޮލޮޖީގެ އެހީގައި، އާ އުފެއްދުންތައް ނެރެވޭފަދަ އީޖާދީ ވިސްނުންތައް ސިކުނޑީގައި އުފަންކުރުމުގެ ގާބިލުކަން ހޯދައިގެން ކަމަށް ރައީސުލްޖުމްހޫރިއްޔާ ވިދާޅުވިއެވެ.
ދަރިވަރުންނަށް އެންމެ ރަނގަޅު ތައުލީމެއްދީ، ރިވެތި އަޚްލާގީ ސިފަތަކުން ޒީނަތްތެރި ކުރުމަށްޓަކައި ބެލެނިވެރިން ކުރާ މަސައްކަތްތަކުގައި، އެންމެ ބޮޑު އެހީތެރިކަމެއް ވެދެއްވަނީ މުދައްރިސުންނާއި، ތަޢުލީމީ ދާއިރާގެ ފަންނުވެރިންކަމަށް ރައީސް ވިދާޅުވިއެވެ. މުދައްރިސުންގެ މަސައްކަތް، ސްކޫލާ ހަމައިން ނިމިގެން ނުދާ ކަމަށާއި، ކުރިއަށް އޮތް ދުވަހަށް ފިލާވަޅު ތައްޔާރު ކުރުމާއި، ޓީޗިންގ އެއިޑްސް ތައްޔާރު ކުރުމަށް، ގޭގައިވެސް މުދައްރިސުން އެތައް މަސައްކަތްތަކެއް ކުރައްވާކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މިއަދު ރާއްޖޭގެ ތައުލީމީ ދާއިރާގައި 6،498 ދާއިމީ ދިވެހި މުދައްރިސުން އެބަ މަސައްކަތް ކުރައްވާ ކަމަށެވެ. ރާއްޖެއިން ބޭރުގެ 1،730 މުދައްރިސުންނާއި، 891 ވަގުތީ މުދައްރިސުންނާއެކު، ޖުމްލަ 9،119 މުދައްރިސުން މިހާރު ރާއްޖޭގައި މަސައްކަތް ކުރާކަމަށް ރައީސް ވިދާޅުވިއެވެ.
ރާއްޖޭގެ ތައުލީމީ ނިޒާމުގައި ވަގުތީ ޓީޗަރުންގެ އަދަދު، އެއް ދުވަހުން އަނެއް ދުވަހަށް ދަނީ އިތުރުވަމުން ކަމަށާއި، މިކަމަށް އަވަސް ހައްލެއް ހޯދަން މަސައްކަތް ނުކޮށްފިނަމަ، ތައުލީމީ ދާއިރާއަށް ބޭނުންވާ މުދައްރިސުންނާއި، ތައުލީމީ މަންހަޖު ތަރައްގީ ކުރާނެ މީހުންނާއި، އަދި ޕްރިންސިޕަލުން ރާއްޖެއިން ނުލިބުމުގެ ބިރު ވަރަށް ބޮޑު ކަމަށް ރައީސުލްޖުމްހޫރިއްޔާ ވިދާޅުވިއެވެ. މިކަން މިގޮތަށް ދޫކޮށްލެވިއްޖެނަމަ، ކުރިމަގުގެ ޖީލަކީ، އިލްމީ ގޮތުންނާއި، ވިސްނުމުގެ ގޮތުންނާއި، ފަންނީ ގޮތުން، އަޅުގަނޑުމެން މި ބޭނުންވާފަދަ އީޖާދީ ވިސްނުމުގެ އަހުލުވެރި ބަޔަކަށް ނުވުމަކީ ވަރަށް އެކަށީގެންވާ ކަމެއް ކަމަށް ރައީސް ވިދާޅުވިއެވެ.
