މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޕައިލެޓް ބޯޓު 2 ފަޅައިގެން ގޮސްފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި ބޯޓު ފަޅައިގެން ގޮސްފައިވަނީ ދޫނިދޫއާ ހިސާބުންނެވެ. އޭރު ބޯޓު ދަތުރުކުރަމުންދިޔައީ ޕައިލެޓް ގޮވައިގެންނެވެ.
މިހާރު މި ބޯޓު ފަޅައިގެން ދިއުމާއެކު, ބޯޓު ވަނީ މަޑުމަޑުން ދުއްވާފައި އައިސް 1 ނަންބަރު ފާލަމުގެ ފަޅު ތެރެއަށް ވަދެފައެވެ. އަދި މިހާރު އެ ސަރަޙައްދުގައި އެމްއެންޑީއެފުން ޙަރަކާތްތެރިވަމުންދާކަމުގެ މައުލޫމާތު ރާއްޖެއެމްވީއަށް ވަނީ ލިބިފައެވެ.
އެކަމާ ގުޅޭގޮތުން އެމްއެންޑީއެފުން ބުނީ އެމްޕީއެލްގެ ޕައިލެޓް ބޯޓުގެ ހަލް ފަޅައިގެންގޮސް ދިޔަވާތީ ޕަންޕު ޖަހައިގެން ދިޔަހިއްކުމަށް ޑައިވަރުންނާ އެކު ކޯސްޓްގާޑު ސެކަންޑް ސްކޮޑްރަން އަދި އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވާ ކަމަށެވެ.
މި ދުވަސްވަރު މޫސުން ގޯސްވުމުގެ ސަބަބުން ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން ވަނީ އިލްތިމާސްކޮށްފައެވެ. އެގޮތުން ރާއްޖޭގެ ސަރަހައްދުގައި އުފެދިފައިވާ ލޯ ޕްރެޝަރ ޓްރަފްގެ ސަބަބުން ކުރިއަށް އޮތް 3 ދުވަހު ރާއްޖޭގެ ހުރިހާ ސަރަހައްދެއްގައި ވައި ގަދަވުމާއެކު ކަނޑުތައް ގަދަވާނެ ކަމަށް ވަނީ ބުނެފައެވެ.
އޭގެ އިތުރުން، ދިޔަވަރު ބޮޑުވާ ވަގުތު އުދައިގެ އަސަރުކުރުން އެކަށީގެންވާ ކަމަށް މޫސުމާ ބެހޭ ގައުމީ އިދާރާއިން ބުނެފައިވެއެވެ.
