ދަނޑުވެރިކަމުގެ ދާއިރާއިން ފާހަގަކޮށްލެވޭ ދެ ބޭފުޅެއްގެ އަގު ވަޒަންކޮށްފި
ހަނދާނީ ފިލާ ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު
މުހައްމަދު ނަސީމުގެ ހަނދާނީ ފިލާ
ދަނޑުވެރިކަމުގެ ދާއިރާއިން ފާހަގަކޮށްލެވޭ ޚިދުމަތްތަކެއް ކޮށްދެއްވާފައިވާ ދެ ފަރާތެއްގެ އަގުވަޒަންކޮށް ހަނދާނީ ފިލާ ހަވާލުކޮށްފިއެވެ.
މި ފަރާތްތަކަށް ހަނދާނީ ފިލާ ހަވާލުކޮށްފައިވަނީ ދަނޑުވެރިކަމުގެ ދުވަހާއި ދުނިޔޭގެ ކާބޯތަކެތީގެ ދުވަސް ފާހަގަކުުރުމަށް ހުކުރު ދުވަހުގެ ރޭ ތ. ކަނޑޫދޫގައި ބޭއްވި ޚާއްސަ ޖަލްސާގައެވެ.
އެގޮތުން މި ފިލާ ދެވުނު އެއް ބޭފުޅަކީ މުހައްމަދު ނަސީމެވެ. ނަސީމް ވަނީ 1980 ވަނަ އަހަރު ދަނޑުވެރިކަމުގެ ވުޒާރާ އާއި ގުޅިވަޑައިގެން އެ މިނިސްޓްރީއަށާއި، ދަނޑުވެރިކަމުގެ ސިނާއަތަށް 42 އަހަރަށް ވުރެ ގިނަ ދުވަހު ޚިދުމަތް ކުރައްވާފައެވެ. އޭނާ ވަނީ ދަނޑުވެރިކަމުގެ ދާއިރާގެ ތަފާތު މަސައްކަތްތަކުގައި ރާއްޖޭގެ މީހުން ދިރިއުޅޭ ހުރިހާ ރަށަކަށް ދަތުރުކުރައްވާފައެވެ. 1990 ގެ އަހަރުތަކުގައި ދަނޑުވެރިންގެ މެދުގައި އެންމެ މަގުބޫލުވި ރޭޑިއޯ ޝޯގައި ދަނޑުވެރިކަމާއި ބެހޭ މައުލޫމާތު ވެސް ގެނެސްދެއްވާފައިވެއެވެ.
ދެވަނައަށް ހަނދާނީ ފިލާ ދެއްވާފައިވަނީ ކަނޑޫދޫއަށް ދަނޑުވެރިކަން ތައާރަފުކުރުމުގައި އެންމެ އިސް ދައުރެއް އަދާކޮށްފައިވާ ފަރާތަށެވެ. އެއީ ކަނޑޫދޫ / ހެޕީ ވިލާ އިބްރާހިމް ރަޝީދެވެ.
މި ދެ ފަރާތަށް ހަނދާނީ ފިލާ ހަވާލުކޮށްދެއްވާފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ އިތުރުން މިނިސްޓަރ އޮފް ފިޝަރީޒް, މެރިން ރިސޯސަސް އެންޑް އެގްރިކަލްޗަރ ޑރ.ހުސައިން ރަޝީދު ހަސަންވެސް ވަނީ ބައިވެރިވެވަޑައިގެންފައެވެ.
