ވަޒަން ޖެހީމަ އެއަށް ނިތްކުރި ދިއްކުރާ މީހާއަކީ މޮޔައެއް ކަމަށާއި އެހެން ނަމަވެސް އެ ވަޒަނުން ރެކި ދުޝްމަނު މީހާ މަރާލާ މީހާއަކީ މޮޅު މީހާ ކަމަށް ޔުނައިޓެޑް ވިކްޓްރީގެ ކޯޗު މުހައްމަދު ނަޒީހު ބުނެފިއެވެ.

ޔޫވީ އާއި އީގަލްސް ބައްދަލުކުރި މެޗަށްފަހު ވާހަކަ ދައްކަމުން ނަޒީހު ބުނީ މެޗުގައި ޔޫވީގެ ފަރާތުން މޮޅު ކުޅުމެއް ފެނިގެންދިޔަ ކަމަށާއި އެހެން ނަމަވެސް މެޗު ގެއްލިގެންދިޔައީ ހެދުނު އެންމެ މިސްޓޭކެއްގެ ސަބަބުން ކަމަށެވެ.

ވަޒަން ޖެހީމަ އެއަށް ނިތްކުރި ދިއްކުރާ މީހާއަކީ މޮޔައެކޭ ބުނެ މިސާލު ޖަހަމުން ނަޒީހު ބުނީ އެޓީމުގެ ގޯލު އޭރިޔާ ތެރޭގައި އޮތް ބޯޅައެއް ޑިފެންޑަރު ކޮއްޓަން ހަދައިގެން އިދިކޮޅު ކުޅުންތެރިޔާއަށް ލިބުމަކީ ވަޒަނަށް ނިތްކުރި ދިއްކުރުން ކަމަށެވެ. އަދި މޮޅު މީހާއަކީ އެ ވަޒަނުން ރެކި ދުޝްމަނު މީހާ މަރާލުން ކަމަށް ބުނެފައި ވަނީ އޭރިޔާ ތެރެއިން ލިބުނު ބޯޅަ އިދިކޮޅު ކުޅުންތެރިޔާއަށް ލިބުމުގެ ކުރިން މޮޅު ގޮތް ނުހަދާ ކޯނަރަކަށް ނުވަތަ އެއްލުމަކަށް ބޭރުން ކޮށްލުމެވެ.

ނަޒީހު މިގޮތަށް މާނަކުރި އިރު، އީގަލްސް އިން ގޯލު ޖަހާފައި ވަނީ ޔޫވީގެ ޑިފެންޑަރަށް ލިބުނު ބޯޅައެއް ސާފުކޮށް ނުލެވި އުޅެނިކޮށެވެ. މި ލަނޑު އީގަލްސްއަށް ކާމިޔާބުކޮށްދިނީ އަހުމަދު ނައުފަލް އެވެ.

ނަޒީހު ބުނީ މެޗުން ބަލިވި ނަމަވެސް ޖުމްލަކޮށް ބަލާއިރު ޓީމުން ދެއްކި ކުޅުން ގޯސް ނޫން ކަމަށާއި އެހެން ނަމަވެސް މި މެޗުގައި ވެސް އެޓީމުގެ ފުރަތަމަ 11 ގައި ކުޅޭ ގިނަ ކުޅުންތެރިން ޓީމުން ބާކީ ކުރަން ޖެހުނު ކަމަށެވެ.

މި މެޗުން ވި ބައްޔާއެކު ޔޫވީ އޮތީ ތިން ޕޮއިންޓާއެކު ލީގުގެ 7 ވަނައިގައެވެ. އަދި މެޗުން މޮޅުވި އީގަލްސް އޮތީ 10 ޕޮއިންޓާއެކު ލީގުގެ ހަތަރު ވަނައިގައެވެ.