ބުދަ ދުވަހުގެ ރޭ ރާއްޖެއާއި އިންޑިއާ ބައްދަލުކުރާ މެޗު ބެލުމަށް ކާނިވަލުގައި ކުރިއަށްގެންދާ އިންތިޒާމްތަކުގެ ތެރެއިން މިއުޒިކް ޝޯ އޮންނާނެކަމަށް ދެކެވުނު ވާހަކައާ ގުޅިގެން ހޫނުފެނަށް ވެއްޓުމުން މާލެ ސިޓީގެ މޭޔަރ ޑރ. މުހައްމަދު މުއިއްޒުގެ ރާގު ބަދަލުކުރައްވައިފިއެވެ.
ގަލޮޅު ރަސްމީ ދަނޑުގެ ހާލަތުގެ ސަބަބުން ގިނަ ސަޕޯޓަރުންނަށް ނުވަދެވޭ މައްސަލައިގައި ސިޓީކައުންސިލާއި، ޔޫތް މިނިސްޓްރީ އަދި އެފްއޭއެމް ގުޅިގެން ކާނިވާ ސްޓޭޖް ސަރަހައްދުގައި ބޮޑު ސްކްރީންގައި މެޗް ބެލުމަށް އިންތިޒާމްތަކެއް ރާވަން ފެށިއެވެ. މިކަން އިންތިޒާމް ކުރަނީ މާލެ ސިޓީ ކައުންސިލުން އިސް ނަގައިގެންނެވެ.
މިކަމާ ގުޅިގެން ޔޫތް މިނިސްޓަރ އަހުމަދު މަހްލޫފް ކުރެއްވި ޓްވީޓެއްގައި ވިދާޅުވީ ފޯރިނަގާލާ، ގިނަބަޔަކަށް ބައިވެރިވުމުގެ ފުރުސަތު ދިނުމަށް ޔޫތު މިނިސްޓްރީ، އުރީދޫ އަދި މާލެ ސިޓީ ކައުންސިލާއި އެފްއޭއެމް ގުޅިގެން ބުދަ ދުވަހުގެ ހަވީރުން ފެށިގެން ކާނިވަލުގަ މެޗު ބެލުން އަދި މިޔުޒިކް ޝޯވް ގެންދަން ރޭވިފައިވާ ކަމަށެވެ. އަދި މޮޅުވެއްޖެނަމަ ފައިނަލް މެޗާ ހަމަޔަށް ކޮންމެ ރެޔަކު ޝޯވް ބާއްވާނެ ކަމަށެވެ.
މިނިސްޓަރ މަހްލޫފްގެ ޓްވީޓް، މޭޔަރ މުއިއްޒު ވަނީ ރިޓްވީޓް ކުރައްވާފައެވެ. އަދި ސިޓީ ކައުންސިލްގެ ރަސްމީ ޓްވިޓާ އެކައުންޓުން ވެސް ބުދަ ދުވަހުގެ ހަވީރުން ފެށިގެން މިއުޒިކް ޝޯއެއް ކުރިއަށް ގެންދަން ހަމަޖެހިފައިވާކަމަށް ބުނެ ޓްވީޓް ކޮށްފައިވެއެވެ.
މި ޓްވީޓުގައި ސިޓީ ކައުންސިލުން ބުނެފައިވަނީ މިއީ މާލެ ސިޓީ ކައުންސިލުން އިސް ނަގައިގެން ކުރާ ކަމެއް ކަމުގައެވެ. މާލެ ސިޓީ ކައުންސިލުން ކުރި ޓްވީޓުގައި ޕޯސްޓަރެއް ވެސް ހަދާފައިވެއެވެ. އަންގާރަ ދުވަހު ސިޓީ ކައުންސިލުން ކުރި ޓްވީޓުގައިވާ އެ ޕޯސްޓަރުގައި ވަނީ މާދަމާ ހަވީރުން ފެށިގެން ކާނިވަލުގައި މިއުޒިކް ޝޯ އަދި މެޗު ބެލުން އޮންނާނެ ކަމަށެވެ.
ނަމަވެސް މިއުޒިކް ޝޯއެއް ބާއްވާކަމަށް ބުނެ ޓްވީޓް ކުރި ހިސާބުން ބައެއް ފަރާތްތަކާއި ދީނީ އިލްމުވެރިންގެ ނުރުހުން އަމާޒުވި ހިސާބުން އެއީ ސިޓީ ކައުންސިލުން ކުރާ ކަމެއް ނޫންކަމަށް ދެއްކުމުގެ ގޮތުން ސިޓީ ކައުންސިލުން ވަނީ ޓްވީޓް ޑިލީޓްކޮށްފައެވެ. އަދި މޭޔަރ މުއިއްޒު ވަނީ މާލެ ސިޓީ ކައުންސިލުން ބާއްވާ އެއްވެސް މިއުޒިކު ޝޯއެއް ނޯންނާނެކަމަށް ވިދާޅުވެ ޓްވީޓް ކުރައްވާފައެވެ. އަދި ސިޓީ ކައުންސިލުން އިސްނަގައިގެން އޮގަނައިޒް ކުރީ ދަނޑަށް ނުވަދެވޭ ފަރާތްތަކަށް އެއްތަނެއްގައި ތިބެގެން މެޗުތައް ބެލޭނެ އިންތިޒާމް ކަމަށެވެ.
ނަމަވެސް މިއުޒިކް ޝޯ އޮންނާނެކަމަށް ވިދާޅުވެ މިނިސްޓަރ މަހްލޫފް ކުރެއްވި ޓްވީޓް މޭޔަރ މުއިއްޒު ރިޓްވީޓް ކުރެއްވި ގޮތަށް ޑިލީޓެއް ނުކުރައްވައެވެ.
