ކޯޓުގެ އަމުރާ އެއްގޮތަށް އަމީން ހައްޔަރަށް

ޓެރަރިސްޓް ޖަމާއަތްތަކަށް މީހުން ރެކްރޫޓް ކުރާކަމުގެ ތުހުމަތުގައި ހައްޔަރު ކުރި މުހައްމަދު އަމީނު ހައްޔަރުކޮށްފިއެވެ.

އަމީން ހައްޔަރު ކޮށްފައިވަނީ އަމީނުގެ ދައުވާތައް ހައިކޯޓުން ބާތިލުކުރީ ރަނގަޅަށް ނޫންކަމަށާއި އެ މައްސަލަ ކްރިމިނަލް ކޯޓުގައި ބަލަމުންދިޔަ ހިސާބުން ކުރިއަށް ގެންދިއުމަށް ދިވެހިރާއްޖޭގެ ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާގުން ޙުކުމް ކުރެއްވުމާއި ގުޅިގެން، އެ މައްސަލައިގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސް ނެރުނު އަމުރަކާއި ގުޅިގެންނެވެ.

އެ އަޑުއެހުމަކީ އަމީންގެ ބަންދާއިމެދު ގޮތެއް ނިންމުމަށްޓަކައި ބާއްވާފައިވާ އަޑުއެހުމެކެވެ. އެގޮތުން މި މައްސަލައަކީ ޖިނާއީ ބޮޑު މައްސަލައެއް ކަމަށާއި، މި މައްސަލައިގައި ތުހުމަތު ކުރެވޭ މިންވަރަށް އެކަށީގެންވާ ހެކި ދައުލަތުން ހުށައަޅާފައިވާ ކަމަށް އެ އަޑުއެހުމުގައި ގާޒީ ވިދާޅުވިއެވެ. ގާޒީ ވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައި 30 ދުވަހުގެ މުއްދަތަށް އަމީން ކަސްޓޯޑިއަލް ޖަލެއްގައި ބެހެއްޓުމަށް އަމުުރު ކުރައްވާފައެވެ.

އެއާއެކު ފުލުހުން ވަނީ ކޯޓުގެ އަމުރާ އެއްގޮތަށް އަމީން ހައްޔަރުކޮށްފައެވެ. އޭނާގެ މައްޗަށް ވަނީ 30 ދުވަހުގެ ބަންދުގެ މުއްދަތުވެސް ޖަހާފައެވެ.

އަމީނުގެ މައްޗަށް 1 މަސް ދުވަހުގެ މޮނިކޮން އަމުރެއްވެސް މިހާރު ވަނީ ނެރެފައެވެ. އަމީނުގެ މައްޗަށް މޮނިކޮން އަމުރެއް ނެރެފައިވަނީ ހައިކޯޓުންނެވެ. މި އަމުރު ނެރެފައިވަނީ 1 މަސް ދުވަހަށެވެ. އަމީނުގެ މައްޗަށް ނެރެފައިވާ މޮނިކޮން އަމުރުގައި ވަނީ އޭނާއަށް، އިރުއޮއްސި 6:00 އިން ހެނދުނު 6:00 އަށް ބޭރަށް ނުކުމެ އުޅުން މަނާކޮށްފައެވެ. މާލެއިން ބޭރަށް ދެވޭނީ ފުލުހުންގެ ހުއްދަ ހޯދައިގެން ކަމަށް މި އަމުރުގައިވެއެވެ.