ރާއްޖެޓީވީ ރޯކޮށްލި މައްސަލަ ހިމެނޭގޮތަށް އޮމްބަޑްސްޕަރސަން އޮފީހަށް ހުށަހެޅި މައްސަލަތައް ބަލަން ނިންމައިފި
މޯލްޑިވްސް ބްރޯޑްކާސްޓިން ކޮމިޝަންގެ ފަރާތުން ފިޔަވަޅު އަޅާފައިވާ މައްސަލަ ހިމެނޭ
ރާއްޖެޓީވީ ރޯކޮށްލުމުގެ ސަބަބުން ސްޓޭޝަނަށް 11.6 މިލިއަނަށްވުރެ ގިނަ ރުފިޔާގެ ގެއްލުން ލިބިފައިވޭ
ރާއްޖެޓީވީން އިންތިގާލީ އިންސާފުގެ އޮމްބަޑްސްޕާރސަންގެ އޮފީހަށް ހުށަހެޅި 3 މައްސަލަ ބަލަން އެ އޮފީހުން ނިންމައިފިއެވެ.
ރާއްޖެޓީވީން އެއް މައްސަލައަކަށް ހުށަހަޅާފައިވަނީ، 7 އޮކްޓޯބަރ 2013ގައި ހަތިޔާރާއެކު ބަޔަކު ވަދެ ރާއްޖެޓީވީގެ މައި ސްޓޫޑިއޯގެ ތެރެއަށް ޕެޓްރޯލް އަޅައި ރޯކޮށްލުމުގެ ސަބަބުން ލިބުނު ގެއްލުމުގެ ބަދަލާއި ހައްގުތައް ހޯދުމަށެވެ. މި މަންޒަރު އެ އިމާރާތުގެ ސީސީޓީވީ ކެމެރާތަކަށް ރެކޯޑްކުރެވިފައި ހުރިކަމަށް މައްސަލައިގައި ބަޔާން ކޮށްފައިވެއެވެ. ސްޓޭޝަނުގައި ރޯކޮށްލާފައިވަނީ، ކުރިން ވެސް އެކިފަހަރުމަތިން ސްޓޭޝަންގެ މަސައްކަތްތައް ހުއްޓުވުމަށް އޭރު ތިއްބެވި ސިޔާސީ އެކި ބޭފުޅުން މަސައްކަތްކޮށް ކާމިޔާބުނުވުމުން ކަމަށް ބެލެވޭ ކަމަށް ވެސް ބުނެފައިވެއެވެ.
މިކަމުގެ ސަބަބުން ރާއްޖެޓީވީއަށް 11.6 މިލިއަނަށްވުރެ ގިނަ ރުފިޔާގެ ގެއްލުން ލިބިފައިވާކަމަށް ވެސް ބުނެފައިވެއެވެ. މި މައްސަލަ ކަމާ ގުޅުންހުރި އިދާރާތަކުން ބަލާފައި ނުވާތީ، ރާއްޖެޓީވީއަށް އިންސާފު ލިބޭނެ ގޮތަކަށް މައްސަލަ ބަލައި ދިނުމަށް ވަނީ އެދިފައެވެ.
ދެވަނަ މައްސަލައަކަށް ހުށަހަޅާފައިވަނީ 26 އޮކްޓޯބަރ 2016ވަނަ ދުވަހުގެރޭ ރާއްޖެޓީވީން ލައިވްކުރި ޕްރޮގްރާމެއްގައި، ކުރީގެ ރައީސް ޔާމީންއަބްދުލް ގައްޔޫމްގެ އަބުރު ގެއްލޭފަދަ ގޮތަކަށް ވާހަކަދައްކާފައިވާ ކަމަށް ބުނެ މޯލްޑިވްސް ބްރޯޑްކާސްޓިން ކޮމިޝަނުން ފިޔަވަޅު އަޅާފައިވަނީ، ގާނޫނީ އިމުގެ ބޭރުން ކަމަށްވާތީ މިކަމާ ގުޅިގެން ރާއްޖެޓީވީއަށް ސީދާ އެއް މިލިއަން ރުފިޔާގެ ގެއްލުން ލިބިފައިވާތީ، އެ ލިބުނު ގެއްލުމުގެ ބަދަލު ހޯދައިދިނުމަށެވެ.
ތިންވަނަ މައްސަލައަކީ، 28 ޖުލައި 2017 ގައި ރާއްޖެޓީވީން ވަގުތުން ގެނެސްދިން ޕްރޮގްރާމެއްގައި އޭރު ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރ މުހައްމަދު މުސްތަފާ ދައްކަވާފައިވާ ވާހަކަތަކަކާ ގުޅިގެން މޯލްޑިވްސް ބްރޯޑްކާސްޓިން ކޮމިޝަންގެ ފަރާތުން ފިޔަވަޅު އަޅާފައިވާ މައްސަލައެވެ. ރާއްޖެޓީވީން އެދިފައިވަނީ، އެ ފިޔަވަޅަކީ، ގާނޫނީ އިމުގެ ބޭރުން އަޅަފައިވާ ފިޔަވަޅެއް ކަމަށް ކަނޑައަޅައިދިނުމަށާއި، ޖޫރިމަނާގެ ގޮތުގައި ދައުލަތަށް ދައްކަން ޖެހުނު ފަސް ލައްކަ ރުފިޔާ އަނބުރާ ރުޖޫއަކުރުމަށް ކަމާ ގުޅުން ހުރި މުއައްސަސާތަކަށް އަންގައި ދިނުމަށެވެ.
މި 3 މައްސަލަ ވެސް ބަލަން ނިންމާފައިވާކަން އެ އޮފީހުން ވަނީ ރާއްޖެޓީވީއަށް ލިއުމުން އަންގާފައެވެ.
އޮމްބަޑްސްޕާރސަންގެ އޮފީހުން ބަލަނީ، 1 ޖެނުއަރީ 1953ން ފެށިގެން 17 ނޮވެމްބަރ 2018 އާ ހަމައަށް ހިނގާފައިވާ މައްސަލަތަކެވެ. އާއްމުން ހުށަހަޅާ މައްސަލަތަކުގެ އިތުރުން އަމިއްލައަށް އިސްނަގައިގެން ވެސް މައްސަލަ ބެލުމުގެ ބާރު އެ އޮފީހަށް ލިބިގެންވާއިރު، އެގޮތަށް ބަލާނީ ޕަބްލިކް އިންޓަރެސްޓް ހިމެނޭ މައްސަލަތައްކަަމަށް ވެސް އެ އޮފީހުން ބުނެއެވެ. ޕަބްލިކް ހިއަރިންއަކަށް ދާން ޖެހޭ މައްސަލަތަކުގައި އެކަން އެގޮތަށް ކުރާނެ ކަމަށް ވެސް އެ އޮފީހުން ވަނީ މައުލޫމާތުދީފައެވެ.
ޖިނާއީ ދައުވާ ކުރުމަށްޓަކައި ޕްރޮސެކިއުޓަރ ޖެނެރަލްގެ އޮފީހަށް ފޮނުވުމާއި، ތަހުގީގުކުރި މައްސަލައެއްގެ މަދަނީ ގެއްލުމުގެ ބަދަލު ހޯދުމާއި، މުދަލާއި ފައިސާ އަނބުރާ ހޯދުމުގެ ކަންކަން ހިމެނޭނަމަ، ފިޔަވަޅު އެޅުމަށްޓަކައި އެޓަރނީ ޖެނެރަލްގެ އޮފީހަށް ފޮނުވުމުގެ ބާރު އެ އޮފީހަށް ލިބިގެންވެއެވެ.
