އަމީނުގެ ޝަރީއަތް މާދަމާ ކްރިމިނަލް ކޯޓުގައި އަނެއްކާވެސް ފަށަނީ
9 އޮކްޓޯބަރު 2021 | ހޮނިހިރު 07:11އަމީނުގެ މައްޗަށް 1 މަސް ދުވަހުގެ މޮނިކޮން އަމުރެއްވެސް ވަނީ ނެރެފައި
ޓެރަރިސްޓެއް ކަމަށް ބުނާ މުޙައްމަދު އަމީނު
އަމީނުގެ ދައުވާތައް ހައިކޯޓުން ބާތިލުކުރީ ރަނގަޅަށް ނޫންކަމަށާއި އެ މައްސަލަ ކްރިމިނަލް ކޯޓުގައި ބަލަމުންދިޔަ ހިސާބުން ކުރިއަށް ގެންދިއުމަށް ދިވެހިރާއްޖޭގެ ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާގުން ޙުކުމް ކުރެއްވުމާއި ގުޅިގެން، އެ މައްސަލަ ކްރިމިނަލް ކޯޓުގައި އަނެއްކާވެސް ތާވަލުކޮށްފިއެވެ.
ކްރިމިނަލް ކޯޓުގައި މި މައްސަލަ ތާވަލު ކޮށްފައިއޮތީ އާދިއްތަ ދުވަހުގެ މެންދުރު 13:00 އަށެވެ.
އަމީނުގެ ދައުވާތައް ބާތިލުކުރުމަށް ހައިކޯޓުން ނިންމާފައިވާގޮތާމެދު ޕްރޮސެކިއުޓަރ ޖެނެރަލްގެ އޮފީހުން ހިތްހަމަ ނުޖެހޭތީ އެ ގަޒިއްޔާ ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކޮށްގެން، އެ ދައުވާތައް ބާތިލުކުރީ ރަނގަޅަށް ނޫންކަމަށް ދިވެހިރާއްޖޭގެ ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާގުން ދާދި ފަހުން ވަނީ ހުކުމް ކޮށްފައެވެ. އަދި އަމީންގެ މައްސަލަ ކްރިމިނަލް ކޯޓުގައި އޭރު ބަލަމުން ދިޔަ ހިސާބުން ކުރިއަށް ގެންދިއުމަށް ވެސް ހުކުމުގައި ބަޔާންކޮށްފައިވެއެވެ.
"މިގޮތަށް މި މައްސަލަ ނިމުމުން، ކްރިމިނަލް ކޯޓުން ބަލަމުންދިޔަ (853 އަދި 854 ވަނަ ގަޒިއްޔާ) ތަކުން ބަލަމުންދިޔަ މައްސަލަތައް ހައިކޯޓުން އެ ގަޒިއްޔާތައް ބާތިލު ކުރުމުގެ ކުރިން ބަލަމުން ދިޔަ ހިސާބުން އެ މައްސަލަ ބެއްލެވި ފަނޑިޔާރުން ކުރިއަށް ގެންދަންޖެހޭނެކަމަށް ދެކެން، މިގޮތުން މައްސަލަ ބަލާއިރު އިދާރީ ގޮތުން ހުރި ކަންކަން ފުރިހަމަ ކުރުމަށްޓަކައި މި މައްސަލައަށް އާ ގަޒިއްޔާ ނަންބަރުތަކެއް ދީގެން ކުރިއަށް ގެންދިއުމަށް ހުރަހެއް އޮތްކަމަށް ނުދެކެން"ސުޕްރީމް ކޯޓުގެ ހުކުމުގައި ބަޔާންކޮށްފައިވެއެވެ.
އެކަމާއި ގުޅިގެން ޕީޖީ އޮފީހުން ވަނީ އަމީން، ޝަރީއަތް ނިމެންދެން ބަންދު ކުރުމުގެ އަމުރަކަށްވެސް ކްރިމިނަލް ކޯޓުގައި އެދިފައެވެ.
އޭގެ އިތުރުން، އަމީނުގެ މައްޗަށް 1 މަސް ދުވަހުގެ މޮނިކޮން އަމުރެއްވެސް ވަނީ ނެރެފައެވެ.
އަމީނުގެ މައްޗަށް މޮނިކޮން އަމުރެއް ނެރެފައިވަނީ ހައިކޯޓުންނެވެ. މި އަމުރު ނެރެފައިވަނީ 1 މަސް ދުވަހަށެވެ. އަމީނުގެ މައްޗަށް ނެރެފައިވާ މޮނިކޮން އަމުރުގައި ވަނީ އޭނާއަށް، އިރުއޮއްސި 6:00 އިން ހެނދުނު 6:00 އަށް ބޭރަށް ނުކުމެ އުޅުން މަނާކޮށްފައެވެ. މީގެ އިތުރުން މާލެއިން ބޭރަށް ދެވޭނީ ފުލުހުންގެ ހުއްދަ ހޯދައިގެން ކަމަށް މި އަމުރުގައިވެއެވެ.
