ރާއްޖެ ހިމެނޭގޮތަށް އދ.ގެ ހިއުމަން ރައިޓްސް ކައުންސިލަށް ހުށައެޅި ގަރާރު ފާސްވެއްޖެ
8 އޮކްޓޯބަރު 2021 | ހުކުރު 18:36ގަރާރު ފުރަތަމަ ހުށައަޅާފައިވަނީ 1990 ވަނަ އަހަރު
އދ ގެ ހިއުމަން ރައިޓްސް ކައުންސިލް
ދިވެހިރާއްޖެ ހިމެނޭ ގޮތަށް އދ ގެ ހިއުމަން ރައިޓްސް ކައުންސިލަށް ރައްކާތެރި ސާފު ވެއްޓެއްގެއި އުޅުމަކީ އިންސާނީ ހައްގެއްގެ ގޮތުގައި ކަނޑައެޅުމަށް ހުށައެޅި ގަރާރު އެކައުންސިލުން ފާސްކޮށްފިއެވެ.
މި ގަރާރު ފުރަތަމަ ހުށައަޅާފައިވަނީ 1990 ވަނަ އަހަރުގައެވެ. އެއަހަރު ފާސްނުވެ މިއަދު ފާސްވެގެން ދިއުމަކީ އިންސާނީ ހައްގުތަކަށް ކުރަމުންދާ މަސައްކަތުގައި ވަރަށް މުހިންމު، އަދި ފާހަގަކުރަންޖެހޭ ވަރުގެ ކާމިޔާބީއެއް ކަމަށާއި، މި ގަރާރަކީ ކޮންމެ އަހަރަކު ތިމާވެށި ތަޣައްޔަރުވުމުގެ ސަބަބުން މަރުވަމުންދާ އެތައް ފުރާނައެއް ސަލާމަތްވެގެންދާނޭ ވަރުގެ ކަމެއްކަމަށް އދ ގެ އިންސާނީ ހައްގުތަކާއި ބެހޭ ޚާއްސަ ރެޕެޓުއަރ ޑޭވިޑް ބޮއިޑް ވިދާޅުވިއެވެ.
މިކަމަށް ބާރުދީ ދުނިޔޭގެ ސިއްހަތު ޖަމްއިއްޔާއިންވެސް ބުނެފައިވަނީ، ކޮންމެ އަހަރަކު އާއްމުކޮށް މީހުން މަރުވަމުންދާ އަދަދަށް ބަލާއިރު، އޭގެ ތެރެއިން 24.3 އިންސައްތަ މަރަކީ ނުތާހިރު ވެއްޓެއްގައި އުޅުމުގެ ސަބަބުންވާ މަރެއް ކަމަށެވެ. އަދި މިކަން މިގޮތަށް ދިމާވާ މައިގަނޑު ދެ ކަމަކީ ޖައްވު ނުސާފުވުމާއި، ވިހަ ކެމިކަލްތަކަށް އިންސާނާ ހުށައެޅިގެން ދިޔުންކަމަށެވެ.
މިފެށޭ ހަފުތާގެ ތެރޭގައި އދ ގެ ހިއުމަން ރައިޓްސް ކައުންސިލުން މި ގަރާރަށް އަމަލު ކުރަން ފަށާނެއެވެ. އަމަލު ކުރަން ފަށައިފިނަމަ، 100 އަށް ވުރެ ގިނަ ގައުމު މިކަމުގައި އެކަތިގަނޑަކަށް ވާނެެއެވެ.
ދިވެހިރާއްޖެ، ކޮސްޓަރީކާ، މޮރޮކޯ އަދި ސްލޮވީނިއާގެ ފަރާތުން ހުށައެޅި މި ގަރާރު ފާސްވެފައިވަނީ 43 ވޯޓާއިއެކުގައެވެ. 4 ގައުމަކުން ވަކިގޮތަކަށް ވޯޓުލާފައިނުވާއިރު، އެމެރިކާ ވޯޓުގައި ބައިވެރިވެފައިނުވަނީ އެގައުމަކީ މިވަގުތު 47 މެމްބަރުންގެ މި މިކައުންސިލްގެ މެމްބަރެއްކަމުގައި ނުވާތީއެވެ.
ދިވެހިރާއްޖެއަކީ އަބަދުވެސް ތިމާވެއްޓާއި، އިންސާނީ ހައްގުތަކާ ގުޅޭގޮތުން ބައިނަލްއަގްވާމީ ޕޯޑިއަމްތަކުގައި ވަކާލާތުކުރަމުންދާ ގައުމެކެވެ. މި ގަރާރު ފާސްވެގެން ދިއުމަކީ އަނެއްކާވެސް އދ ގައި ދިވެހިންނަށް ލިބިގެން ދިޔަ އަގުބޮޑު ކާމިޔާބީއެކެވެ.
