ޒާހިރު ސްޕޯޓްސް އެކެޑަމީގެ ވެބްސައިޓް ލޯންޗުކޮށްފިއެވެ. އެކެޑަމީގެ ވެބްސައިޓް ލޯބްޗުކޮށްފައިވަނީ އެކަމަށްޓަކައި ބުރާސްފަތި ދުވަހުގެ ހަވީރު ބޭއްވުނު ހާއްސަ ރަސްމިއްޔާތެއްގައެވެ.

މި ރަސްމިއްޔާތު ޝަރަފްވެރިކޮށްދެއްވައި ވެބްސައިޓް ލޯންޗުކޮށްދެއްވީ ހދ. ނޭކުރެންދޫގެ ކުރީގެ މަޝްހޫރު ފުޓްބޯޅަ ކުޅުންތެރިއެއް ކަމަށްވާ އަލްފާޟިލް ދާއޫދު އިބްރާހީމެވެ. އެކެޑަމީގެ ފަރާތުން ޝުކުރު ދެންނެވުމުގެ ގޮތުން މި ރަސްމިއްޔާތުގައި ވާހަކަދެއްކެވީ އެކެޑަމީގެ ރައީސް މުޙައްމަދު ޒާހިރެވެ. ޒާހިރުގެ ވާހަކައިގައި އެކެޑަމީގެ އެންމެހައި ކަންކަމުގައި އެހީތެރިވެދެއްވާ އެންމެހާ ބޭފުޅުންނަށް ޝުކުރުއަދާކުރެއްވިއެވެ. އަދި އެކެޑަމީގެ ފަރާތުން ގްރޭޑް 5 ން 10 ގެ އަންހެން ދަރިވަރުންނަށް ހޭންޑްބޯޅަ ކްލާސްތަކެއް ކުރިއަށް ގެންދިއުމަށް ނިންމާފައިވާކަން އިއުލާނުކުރެއްވިއެވެ.

މި ރަސްމިއްޔާތުގައި އެކެޑަމީގެ ވެބްސައިޓާ ބެހޭގޮތުން މައުލޫމާތު ހިއްސާކުރެއްވީ އެކެޑަމީގެ އެޑްމިން އޮފިސަރު އަލީ ނިޔާޒެވެ. މި ރަސްމިއްޔާތުގައި ވަނީ އެ އެކެޑަމީން ކޮންމެ މަހަކު ހޮވާ އެންމެ ރަނގަޅު ދަރިވަރުންގެ ތެރެއިން މި އަހަރުގެ އޮގަސްޓް މަހުގެ އެންމެ ރަނގަޅު ދަރިވަރަށް ސެޓްފިކެޓުވެސް ހަވާލުކޮށްފައެވެ. މިގޮތުން ސެޓްފިކެޓް ހަވާލުކޮށްދެއްވީ ނޭކުރެންދޫގައި ކުޅިވަރުގެ ދާއިރާއަށް ގިނަ ޚިދުމަތްތަކެއް ކޮށްދެއްވާފައިވާ ބޭފުޅެއް ކަމުގައިވާ އަލްފާޟިލް ހަސަން އިބްރާހީމެވެ.

މިރަސްމިއްޔާތުގައި އެކެޑަމީގެ ދަރިވަރުންނާއި، ބެލެނިވެރިންގެ އިތުރުން ކުލަބު ޖަމުއިއްޔާތަކުގެ މެންބަރުންނާއި، ކުޅިވަރަށް ސަޕޯޓުކުރާ ބޭފުޅުން ބައިވެރިވެފައިވެއެވެ.