ހިޔާ ފްލެޓްގެ ޕްރޮކިއުމަންޓްގެ މަސައްކަތް ޗައިނާ ކުންފުންޏާ ހަވާލުކޮށްފައި އޮތުމުން ފެނުގެ މައްސަލަ ހައްލުކުރަން ދަތިވޭ: ޝާހު

ހިޔާ ފްލެޓްގެ ކޮންޓްރެކްޓް އޮތް ގޮތުން ފެނުގެ މައްސަލަ ހައްލުކުރަން ދަތިވާ ކަމަށް މާލެ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ) ގެ މެނޭޖިންގ ޑިރެކްޓަރ ހަސަން ޝާހު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި އަންގާރަ ދުވަހުގެ ރޭ ވާހަކަ ދައްކަވަމުން ޝާހު ވިދާޅުވީ އެމްޑަބްލިޔުއެސްސީ އިން ހިޔާ ފްލެޓްގެ އެއްވެސް އެޕާޓްމަންޓަކަށް އަދި ބިލް ނުފޮނުވާ ކަމަށެވެ. ގަބޫލުނުކުރެވޭ ވަރަށް ފެން ބޭނުން ކުރެވޭކަން ކުންފުންޏަށް ފާހަގަވާނަމަ އެކަން އަބަދުވެސް ބަލާ ކަމަށް ވެސް ވިދާޅުވިއެވެ.

އެގޮތުން ބެލިބެލުމުން ސިސްޓަމުން 16 ފްލެޓްގައި ގަބޫލުނުކުރެވޭ ވަރަށް ފެން ބޭނުން ކުރެވިފައި ހުރިކަން ފާހަގަވި ކަމަށް ޝާހު ވިދާޅުވިއެވެ. އަދި އެޕާޓްމަންޓްގެ މީހުންނަށް ގުޅާ، ފެން ލީކެއް އުޅޭތޯ ސުވާލުކުރި ކަމަށް ވެސް ވިދާޅުވިއެވެ.

ބަޔަކު ބޭނުން ނުކުރާ ޚިދުމަތަކަށް ޗާޖު ކުރުމަކީ ކުންފުނިން ކުރަން ބޭނުންވާ ކަމެއް ނޫންކަން ފާހަގަކުރައްވާ ޝާހު ވިދާޅުވީ މިކަންތައްތަކުގައި އެހެން އިދާރާތަކާއެކު ވެސް މަޝްވަރާ ކުރެއްވި ކަމަށެވެ. ކުރީގެ ރައީސް ޔާމީންގެ ސަރުކާރުގައި ހިޔާ ފްލެޓްގެ ކަންތައްތައް ކުރިއަށް ގެންދިޔަ ގޮތުން މިހާރު އެކަމުގެ ދަތިތައް ފެންނަން ފަށާފައިވާ ކަމަށް ވެސް ވިދާޅުވިއެވެ.

ޝާހު އިތުރަށް ވިދާޅުވީ ހިޔާ ފްލެޓްތަކުގައި ހަރުކޮށްފައި ހުރީ އެމްޑަބްލިޔުއެސްސީގެ މީޓަރުތަކެއް ނޫން ކަމަށާއި އަޅާފައި ބޭނުންކޮށްފައި ހުރި ހޮޅިތަކަކީ ވެސް އެބްޑަބްލިޔުއެސްސީގެ ހޮޅިތަކެއް ނޫން ކަމަށެވެ.

ކުރީ ސަރުކާރުން ހުރިހާ ޕްރޮޖެކްޓެއްތައް ހަވާލުކޮށްފައި ހުރީ ޗައިނާގެ ކުންފުނިތަކަށް ކަމަށާއި ޗައިނާ ކޮންޓްރެކްޓަރުން އެމީހުންގެ އަމިއްލަ މީޓަރުތައް ހަރުކޮށްފައިވާ ކަމަށް ވެސް ޝާހު ވިދޅާވިއެވެ.

އަދި އިތުރަށް ބެލިބެލުމުން ޗައިނާ ކުންފުންޏާއެކު ކޮންޓްރެކްޓްގައި އިންނަ ގޮތުން ޕްރޮކިއުމަންޓް މަސައްކަތް ވެސް ކުރިއަށް ގެންދަން ޖެހޭނީ ޗައިނާގެ ކޮންޓްރެކްޓަރުން ކަމަށާއި އެހެންވުމުން ދަތިތަކާއި ކުރިމަތިވ ކަމަށް ޝާހު ވިދާޅުވިއެވެ. މި އުސޫލުގެ ދަށުން ހިޔާ ފްލެޓްގައި ވެސް ހަރުކޮށްފައިވަނީ ޗައިނާ ކުންފުނީގެ މީޓަރުތައް ކަމަށެވެ.

އެމްޑަބްލިޔުއެސްސީގެ މިންގަނޑަށް ނުފެތޭ މީޓަރާއި ހޮޅިތައް ގެނައުމުން އެއަށް ބޭނުންވާ އިކުއިޕްމަންޓާއި ޓޫލްސްތައް ހޯދަން ޖެހޭކަން ފާހަގަކުރައްވާ ޝާހު ވިދާޅުވީ މިހެން މިކަންތައްތައް ވުމުން ފެނުގެ މައްސަލަ ހައްލުކުރަން ދަތިވާ ކަމަށެވެ. އަދި މިފަދަ އެނޫން ކަންތައްތައް ވެސް ދިމާވާ ކަމަށެވެ.

ފްލެޓްތަކުގައި ދިރިއުޅޭ މީހުން ވެސް ފެން ބޭނުންކުރެވޭ ނިސްބަތް ކުންފުނީގެ އެޕްލިކޭޝަން މެދުވެރިކޮށް ބަލާ، ގަބޫލު ނުކުރެވޭ ކަމެއް އުޅޭނަމަ އެކަން އެންގުމަށް ޝާހު އެދިވަޑައިގެންނެވިއެވެ.