ކްރިސްޓިއާނޯ ރޮނާލްޑޯ އާއި ލިއޮނަލް މެސީއަށްވުރެ ލިވަޕޫލްގެ ތަރި މުހައްމަދު ސަލާހު މޮޅުކަމަށް ބްލެކްބާން ރޯވާސްގެ ކުރީގެ ފޯވާޑް ކްރިސް ސެޓޮން ބުނެފިއެވެ.

ހޯމަ ދުވަހު މެންޗެސްޓާ ސިޓީއާ ދެކޮޅަށް ލިވަޕޫލުން ކުޅުނު މެޗުގައި ސަލާހު ޖެހި ލަނޑަށް ގިނަބަޔަކު ތައުރީފް ކުރަމުން އަންނައިރު، އިންގްލެންޑް ގައުމީ ޓީމުގެ ކުރީގެ ފޯވާޑް އެލެން ޝެއެރާ ވަނީ އެއީ އިންގްލެންޑްގެ ޕްރިމިއާ ލީގު ތާރީހުގައި ޖެހި އެންމެ މޮޅު އެއް ލަނޑު ކަމަށް ބުނެފައެވެ.  

އުމުރުން 29 އަހަރުގެ ސަލާހު ވަނީ މިސީޒަނުގައި ލިވަޕޫލަށް ކުޅެދިން ނުވަ މެޗުން ނުވަ ލަނޑު އެޓީމަށް ކާމިޔާބު ކޮށްދީފައެވެ.

ކްރިސް ބުނީ މިވަގުތަށް ބަލާނަމަ ސަލާހަކީ ދުނިޔޭގައި ހުރި އެންމެ މޮޅު ދެ ފޯވާޑުން ކަމަށްވާ މެސީއާ ރޮނާލްޑޯއަށްވުރެ މޮޅު ކުޅުންތެރިއެއް ކަމަށެވެ.

ކްރިސް ބުނީ ސަލާހަކީ މިފަހުން އެއް ފެންވަރެއްގައި އެންމެ ގިނަ ދުވަހު ޕްރިމިއާ ލީގުގައި ހިފަހައްޓާލެވުނު ކުޅުންތެރިޔާ ކަމަށާއި، އެގޮތުން މިދިޔަ ތިން ސީޒަނުގައިވެސް ސަލާހު ވަނީ އެވްރެޖުކޮށް 20 ލަނޑު ލީގުގައި ކާމިޔާބު ކޮށްފައިކަމަށެވެ.

ލިވަޕޫލުން އުމުރުން 29 އަހަރުގެ ސަލާހު ގަތީ 2017 ވަނަ އަހަރުގެ ޖޫން މަހު ރޯމާއަށް 35 މިލިޔަން ޕައުންޑް ދެއްކުމަށްފަހުއެވެ. އޭގެ ފަހުން 2018 ވަނަ އަހަރު ސަލާހު ލިވަޕޫލުގެ އެއްބަސްވުން އާކުރިއިރު، އެ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ހޫނު މޫސުމުގައެވެ.

ލިވަޕޫލަށް ބަދަލުވެ ސަލާހު ގިނަ ރިކޯޑުތަކެއް މުގުރާލާފައިވާއިރު، އޭނާ ވަނީ މިހާތަނަށް ލިވަޕޫލަށް ކުޅެދިން 212 މެޗުގައި 134 ލަނޑު ޖަހާފައެވެ. އަދި މި ފަހުން ލިވަޕޫލުން ހޯދި ކާމިޔާބީތަކުގައި ސަލާހު ވަނީ މުހިންމު ދައުރެއް އަދާކޮށްފައެވެ. އެގޮތުން ސަލާހު ވަނީ ލިވަޕޫލާއެކު އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕުވެސް ކާމިޔާބުކޮށްފައެވެ.