ހުޅުމާލެ ދެވަނަ ފިޔަވައްސަށް ބަސް ދަތުރުގެ ޚިދުމަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ފަށައިފިއެވެ.

މި ޚިދުމަތް ދޭން ފަށާފައިވަނީ އޮކްޓޯބަރު މަހުގެ އެއްވަނަ ދުވަހުން ފެށިގެންނެވެ. އެމްޓީސީސީން ބުނީ މި މަސައްކަތަކީ ހުޅުމާލޭ ދެވަނަ ފިޔަވަހީގައި ދިރިއުޅޭ ރައްޔިތުންނަށް ދަތުރުފަތުރުކުރުމުގައި މިހާރު ދިމާވަމުން އަންނަ ދަތިތަކަށް ހައްލު ހޯދައިދިނުމަށްޓަކައި، ސަރުކާރުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންއާއި، ހުޅުމާލެ ޑިވެލޮޕްމަންޓް ކޯޕަރޭޝަނާއި އަދި އެކުންފުނި ގުޅިގެން ކުރެވުނު މަޝްވަރާތަކަށްފަހު ފަށާފައިވާ މަސައްކަތެއް ކަމަށެވެ. 

މިގޮތުން ބަސް ރޫޓަށް މިހާރު ބަދަލުތަކެއް ގެނެސްފައިވާކަމަށް އެމްޓީސީސީން ވަނީ ބުނެފައެވެ. ހުޅުމާލެ ފޭސް 1 އަދި ފޭސް 2 ގުޅުވައިދޭ މި ބަސް ރޫޓުން ވެސްޓް ޕާކް ބަސް ރޫޓާއި، ކާރނިވަލް ރޫޓާއި ވީއައިއޭ ބަސް ރޫޓުގެ އިތުރުން ހުޅުމާލެ ފެރީއާއި ގުޅުވައިދޭ ބަސްހުއްޓިތަކަށް ހުއްޓާނެކަމަށް އެމްޓީސީސީން ބުނެފައިވެއެވެ. އަަދި ފެރީ ދަތުރުތައް އޮންނާނެ ގަޑިތައްވެސް އެމްޓީސީސީން ވަނީ އާންމުކޮށްފައެވެ.

މި ޚިދުމަތަށް އަގުގެ ގޮތުގައި ނަގާނީ 5 ރުފިޔާ ކަމަށް އެމްޓީސީސީން ބުނެފައިވެއެވެ. އަދި އެ ކުންފުނިން މި ޚިދުމަތް ފޯރުކޮށްދިނުމުގެ އަމާޒަކީ ގްރޭޓަރ މާލެ ސަރަޙައްދުގައި ދިރިއުޅެމުންދާ ރައްޔިތުންނަށް ފެންވަރު ރަނގަޅު ޚިދުމަތްތަކެއް ފޯރުކޮށްދިނުން ކަމަށް އެމްޓީސީސީން ބުނެފައިވެއެވެ. މި ޚިދުމަތް ފުޅާކޮށް އެކަށީގެންވާ ފެންވަރެއްގައި ޚިދުމަތް ދިނުމަށް ބޭނުންވާނެ ބަސްތައް ގެނައުމާއި، އެއާ ގުޅިގެން ކުރަންޖެހޭ މަސައްކަތްތައް މިހާރު ކުރަމުންދާކަމަށް އެމްޓީސީސީން ބުނެފައިވެއެވެ.

ހުޅުމާލޭ ފޭސް 2އިން ހިޔާ ފްލެޓު ދޫކޮށްފައިވާއިރު، އެ ސަރަހައްދުގައި ދިރިއުޅޭ މީހުންނަށް ދަތުރުފަތުރުކުރުމުގައި ދަތިތަކެއް ހުރިކަން ވަނީ ފާހަގަކުރެވިފައެވެ. މިފަދަ ގިނަ ކަންބޮޑުވުންތަކެއް ހުރިއިރު، ދާދި ފަހުން ސޯޝަލް މީޑިއާގައި އާންމުކޮށްފައިވާ ޕޯސްޓަކުން ފެންނަނީ މަންމައަކު އޭނާގެ ދަރިފުޅު ކޮނޑަށް ލައިގެން ސްކޫލަށް ދާން ހިނގާފައިދާ މަންޒަރެވެ. މިއާއެކު މިކަމަށް ހައްލެއް ހޯދައިދިނުން އަވަސްކުރުމަށް ގިނަ ބަޔަކު ގެންދިޔައީ ގޮވާލަމުންނެވެ.