ކޮވިޑްގެ އެހެން ވޭރިއަންޓްތަކަށްވުރެ ޑެލްޓާ ވޭރިއަންޓްގެ ނުރައްކާ މާބަނޑު މީހުންނަށް ބޮޑު

ވެކްސިން ނުޖަހާ ތިބޭ މާބަނޑު މީހުންނަށް ކޮވިޑްގެ ކުރީކޮޅު ފެނުނު ވޭރިއަންޓްތަކަށްވުރެ ޑެލްޓާ ވޭރިއަންޓުން ކުރާ އަސަރު ބޮޑުކަމަށް ދިރާސާއަކުން ހާމަވެއްޖެއެވެ.

މިދިރާސާ ކުރިޔަށް ގެންދިޔުމަށްޓަކައި ކޮވިޑް ޖެހިފައިވާ 1515 މާބަނޑު މީހުން ބައިވެރިކޮށްފައިވެއެވެ. މިމީހުންނަކީ 2020 ވަނަ އަހަރުގެ މެއި މަހުން ފެށިގެން މިއަހަރުގެ ސެޕްޓެމްބަރ މަހުގެ 4 ވަނަ ދުވަހާ ހަމައަށް ފަރުވާދީފައިވާ މީހުންނެވެ. މީގެތެރެއިން 82 މީހުންނަކީ ވެކްސިން ނުޖަހާ ތިބި މީހުންނެވެ. މިމީހުންގެ ތެރެއިން 81 މީހުންނަށް ވަނީ ކޮވިޑްގެ އަސަރު ވަރަށް ބޮޑަށްކޮށް ނުރައްކާތެރި ހާލަތަށް ގޮސްފައެވެ. އޭގެތެރެއިން 10 މީހުންނަށް ވެންޓިލޭޓަރުގައި ފަރުވާދިންއިރު ދެ މީހުން ވަނީ މަރުވެފައެވެ.

ހާލަތު ގޯސްވި މީހުންގެ ނިސްބަތް މިއަހަރުގެ ކުރީކޮޅާ ހަމައަށް އުޅުނީ 5 އިންސައްތައިގައެވެ. އަދި އެމީހުން ފެނުނީ ވަރަށް މަދުންކަމަށް މިދިރާސާއަށްފަހު ނެރެފައިވާ ބަޔާނުގައި ބުނެފައިވެއެވެ. އެހެންނަމަވެސް ޑެލްޓާ ވޭރިއަންޓާއެކު ހާލަތު ގޯސްވެގެންދިޔަ ދުވަސްވަރު މާބަނޑު މީހުންގެ ތެރެއިން 10 އިންސައްތަ އާއި 15 އިންސައްތަ މީހުން ހޮސްޕިޓަލްތަކުގައި އެޑްމިޓްކޮށްގެން ފަރުވާދޭން ޖެހުނުކަމަށް މިބަޔާނުގައި ބުނެފައިވެއެވެ.

މާބަނޑު މީހުންނަށް ކޮވިޑް ޖެހުމުގެ ސަބަބުން އެމީހުންގެ ނޭވާލާ ނިޒާމަށް ވަރަށް ބޮޑަށް ގެއްލުންވާކަމަށާއި އަދި އެހެންކަމުން ޑެލްޓާ ވޭރިއަންޓްގެ ސަބަބުން ހާލަތު ގޯސްވުމާ ހަމައަށް ދިޔުމުގައި ވެކްސިން ނުޖަހާ ތިބުން އެއީ ސަބަބެއްކަމަށް މިދިރާސާގައި ބުނެފައިވެއެވެ.

މިދިރާސާ އާންމުކޮށްފައިވާއިރު އެމެރިކާގެ ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަނުން ވަނީ މާބަނޑު މީހުންނަށް ވެކްސިން ދިނުމުގެ ކަންކަން އަވަސްކުރާނެކަމަށް ބުނެފައެވެ. އޭގެތެރޭގައި ގާތުންދޭ މައިންނާއި ކައިރި މުސްތަގްބަލެއްގައި މާބަނޑުވާނެކަމަށް ބެލެވޭ މީހުންވެސް ހިމެނޭކަމަށް ސީޑީސީން ވަނީ ބުނެފައެވެ.