ބޯޓުދަތުރުފަތުރު ކުރާ ފަރާތްތަކުގެ ހައްޤުތައް ރައްކާތެރި ކޮށްދޭނެ ބިލެއް ތައްޔާރުކުރުމުގެ މަސައްކަތް ފަަށައިފި - މިނިސްޓަރ
ސިނާޢަތް ތަރައްޤީކޮށް ކުރިއެރުވުމަކީ ވަރަށް މުހިއްމުކަމެއް
ޓްރާންސްޕޯޓް މިނިސްޓަރ އައިޝަތު ނަހުލާ
ބޯޓުދަތުރުފަތުރު ކުރާ ފަރާތްތަކުގެ ހައްޤުތައް ރައްކާތެރި ކޮށްދޭނެ ބިލެއް ތައްޔާރުކުރުމުގެ މަސައްކަތް ސަރުކާރާއި ސީފެއަރާސް ރައިޓްސް އިންޓަރނޭޝަނަލް (އެސްއާރުއައި) އާ ގުޅިގެން ކުރަމުންދާކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
ދުނިޔޭގެ ކަނޑުދަތުރު ފަތުރުގެ ދުވަހާ ގުޅިގެން ދެއްވި ހިތާބުގައި މިނިސްޓަރ ނަހުލާ ވިދާޅުވީ ބޯޓުދަތުރުފަތުރު ކުރާ ފަރާތްތަކުގެ ހައްޤުތައް ރައްކާތެރި ކޮށްދޭނެ ބިލެއް ތައްޔާރުކުރުމުގެ މަސައްކަތް ސަރުކާރާއި ސީފެއަރާސް ރައިޓްސް އިންޓަރނޭޝަނަލް (އެސްއާރުއައި) އާ ގުޅިގެން ކުރެވެމުންދާ ކަމަށެވެ. އަދި މި ސިނާއަތުގައި މަސައްކަތްކުރާ ފަރާތްތަކުން މިދާއިރާއަށް މީހުން ބިނާ ކުރުމަށާއި މިދާއިރާ ތަރައްގީކުރުމަށް ކުރެވެން ހުރި ހުރިހާ މަސައްކަތްތަކަށް ސަރުކާރުގެ ފުރިހަމަ އެއްބާރުލުން ލިބޭނެކަމުގެ ޔަޤީންކަން އަރުވާ ކަމަށެވެ. އަދި މިކަމަށް ސަރުކާރުގެ ކުންފުނިތަކުން ވެސް އިސްނެގުމަށް މިނިސްޓަރު ވަނީ ގޮވާލާފައެވެ.
މިނިސްޓަރު ވިދާޅުވީ ކަނޑުދަތުރުފަތުރު މެދުވެރިކޮށް މުދާ އުފުލުމަކީ ފާއިތުވެދިޔަ އެތައްހާސް އަހަރެއްގެތެރޭގައި ދުނިޔޭގެ ވިޔަފާރީގެ މައިބަދަ ކަމުގައި ވެގެންގޮސްފައިވާކަމުގައެވެ. ދުނިޔޭގެ ވިޔަފާރީގެ 90 އިންސައްތަ މުދާ އެއްބައްރުން އަނެއް ބައްރަށް އުފުލުމަށް ބޭނުންކުރެވޭ އެންމެ އިތުބާރުކުރެވޭ، ޚަރަދުކުޑަ ވަޞީލަތަކީ ކަނޑުމަގުން މުދާ އުފުލުން ކަމަށެވެ. އިޤްތިޞާދީ މަންފާ ޤައުމީ އަދި ފަރުދީ ފެންވަރުގައި ލިބި، ފުދުންތެރި އިޤްތިޞާދެއް ބިނާކުރުމަށް މިކަމުން އެހީތެރިކަން ލިބޭ ކަމަށެވެ.
މީގެ އިތުުރުން ކޮވިޑްގެ ބަލިމަޑުކަމުގައި ބޭހާއި، ކާބޯތަކެތި އަދި ޒަރޫރީ ބޭނުންތަކަށް ކޮންމެހެން ބޭނުންވާ ތަކެތި މުޅި ދުނިޔޭގެ އެކި ކަންކޮޅުތަކަށް ފޯރުކޮށް ދިނުމަށް ބޯޓު ދަތުރުކުރާ 2 މިލިއަނެއްހާ މީހުން ކުރި ބުރަ މަސައްކަތާއި ވީޤުރުބާނީ ފާހަގަ ވެގެންދިޔަ ކަމަށް މިނިސްޓަރ ވިދާޅުވިއެވެ. އަދި ބަލިމަޑުކަމުގެ ތެރޭގައި ގިނަ ގޮންޖެހުންތަކާ އެކުވެސް ޝިޕިންގް އިންޑަސްޓްރީން ކުރި މަސައްކަތް ބައިނަލްއަޤވާމީ ފެންވަރުގައި ފާހަގަކުރެވޭ ކަމަށް މިނިސްޓަރ ވިދާޅުވިއެވެ. މިނިސްޓަރ ނަހުލާ ވިދާޅުވީ އައިއެމްއޯ އަދި އިންޓަރނޭޝަނަލް ލޭބަރ އޯގަނައިޒޭޝަން (އައިއެލްއޯ) ގެ އެދުމުގެ މަތިން އިންސާނިއްޔަތަށް ޚިދުމަތް ކުރުމުގެ ގޮތުން ބަނދަރުތަކާއި ބޯޑަރު، ހުޅުވައި ޚިދުމަތްދޭން ފެށުނީ ކޮވިޑްގެ އެންމެ ދަތި އުނދަގޫ ވަގުތުގައި ކަމަށެވެ.
އަދި ދަތުރުފަތުރުގެ ކަންކަމާ ހަވާލުވެހުރި ވަޒީރުގެ ހައިސިއްޔަތުން ބޯޓު ދަތުރުކުރާ ފަރާތްތަކާއި ޕޯޓުތަކުގެ ޚިދުމަތްތެރިން މިބަލިމަޑުކަމުގެ ތެރޭގައި ކުރި ދަތި އުދަގޫ މަސައްކަތުގެ އަގު ވަޒަންކޮށް އެފަރާތްތަކަށް ވަރަށް ޚާއްޞަ ޝުކުރެއް އަދާކުރާ ކަމަށެވެ.
ބައިނަލްއަޤްވާމީ ކަނޑުދަތުރުފަތުރާ ބެހޭ ދުވަހަށް މިއަހަރަށް ކަނޑަ އަޅާފައިވާ ޝިއާރަކީ "ސީފެއަރާސް: އެޓް ދަ ކޯ އޮފް ޝިޕިންގ ފިޔުޗަރ" އެވެ. މިނިސްޓަރ ވިދާޅުވީ މިސިނާޢަތް ތަރައްޤީކޮށް ކުރިއެރުވުމަކީ ވަރަށް މުހިއްމުކަމެއް ކަމަށެވެ. މި ސިނާޢަތް ކުރިއެރުވުމަށް އެންމެ ބޭނުންވަނީ މިކަމުގެ ތަޢުލީމާއި ތަޖުރިބާ ލިބިފައިވާ ޤާބިލް މީހުން އުފެއްދުން ކަމަށާއި، އެހެންކަމުން މިދާއިރާއަށް ބޭނުންވާ މީހުން އުފެއްދުމަށްޓަކައި ޤައުމީ ޔުނިވަރސިޓީއާއެކު އެމްއޯޔޫ އެއްގައި ސޮއިކޮށްފައިވާ ކަމަށް މިނިސްޓަރ ވިދާޅުވިއެވެ. އަދި މި އެމްއޯޔޫގެ ދަށުން ޑެކް އޮފިސަރުންނާއި އިންޖީނު އޮފިސަރުން ތަމްރީނު ކުރެވިގެން ދާނެ ކަމަށެވެ.
ކަނޑު ދަތުރުފަތުރުގެ ދުވަސް ފާހަގަ ކުރަމުންދާއިރު، މި ސިނާޢަތް ކުރިއަރުވާ ތަރައްޤީ ކުރުމަށްޓަކައި ރާއްޖޭގެ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙް ދެއްވާ އިރުޝާދާއި އެއްބާރުލެއްވުމަށް މިނިސްޓަރ ވަނީ ޝުކުރު އަދާކުރައްވާފައެވެ.
ބައިނަލްއަޤްވާމީ ކަނޑުދަތުރުފަތުރާ ބެހޭ ޖަމްއިއްޔާ އިންޓަރނޭޝަނަލް މެރިޓަމް އޯގަނައިޒޭޝަން (އައި.އެމް.އޯ) ވުޖޫދުވެގެން އައިސްފައިވަނީ 17 މާރިޗު 1948 ގައި. ދިވެހިރާއްޖެއިން މިޖަމިއްޔާގެ މެމްބަރަކަށް ވެފައިވަނީ 31 މެއި 1967 ގައެވެ. އަދި ފުރަތަމަ ފަހަރަށް އައި.އެމް.އޯ އަށް ދިވެހިރާއްޖޭގެ ފަރާތުން ދާއިމީ މަމްދޫބެއް ކަނޑައެޅިގެން ދިޔައީ 06 ޖުލައި 2021 ގައެވެ.
