ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ސްމާޓް ސިޓީ ތަރައްގީކުރުމުގެ މަޝްރޫއުގައި ބައިވެރިވާން ބޭނުންވާ ފަރާތްތަކަށް އެ ކުންފުނިން އެ ފުރުސަތު ހުޅުވާލައިފިއެވެ.
ސްމާޓް ސިޓީ މަޝްރޫޢުއަކީ ރާއްޖޭގައި ހިންގޭ މިފަދަ ފުރަތަމަ މަޝްރޫއުއެވެ. މި މަޝްރޫއުގައި މި ދަޢުވަތުގެ ދަށުން ބައިވެރިވާ ފަރާތްތަކަށް، ޑިޖިޓަލް ޚިދުމަތެއް ނުވަތަ އުފެއްދުމެއް ތަޢާރަފު ކުރާނަމަ މިހާރަށްވުރެ ފުޅާ ދާއިރާއެއްގައި އެ އުފެއްދުމެއް ނުވަތަ ޚިދުމަތެއް ޓެސްޓްކުރުމުގެ ފުރުސަތު ފަހިވެގެންދާނެއެވެ. އަދި އެޗްޑީސީއިން މިފަދަ ސިޓީއެއް އުފެއްދުމަށް ބޭނުންވާ އުމްރާނީ އޮނިގަނޑު ގާއިމު ކުރާއިރު މުޖުތަމަޢުއަށް ބޭނުންހުރި ޑިޖިޓަލް ވަސީލަތްތަކާއި ޚިދުމަތްތައް މި އިންފްރާސްޓްރަކްޗަރގެ ދަށުން ތައާރަފްކޮށް ހިންގާނީ މުޖުތަމަޢުގައި ތިބި ފަންނީ މީހުންނާއި ކުންފުނިތަކުންނެވެ.
ދިވެހިރާއްޖޭގައި ފުރަތަމަ ފަހަރަށް ގާއިމު ކުރެވޭ ސްމާޓް ސިޓީއަކީ ހުޅުމާލެކަމަށް ވާއިރު، މި މަޝްރޫޢުގެ ދަށުން ހުޅުމާލެ ވެގެންދާނީ ފަހުގެ ޓެކްނޮލޮޖީއާއި އައު އީޖާދީ ވަސީލަތްތައް ތަރައްގީވެ ކުރިއަރާނެ ތަނަކަށެވެ.
އަދި މިފަދަ ޑިޖިޓަލް ޓެކްނޮލޮޖީތަކާއި ވަސީލަތްތަކަށް ރަށްވެހިން ފަރިތަވުމުން ދިރިއުޅުމާއި މަސައްކަތުގެ އެކި ދާއިރާތަކުން ވެސް އެކިގޮތް ގޮތުން ގިނަ ފަސޭހަތަކެއް ވެގެންދާނެއެވެ. އަދި ހުޅުމާލޭގެ ރަށްވެހިންނަށް ޒަމާނީ ޓެކްނޮލޮޖީގެ އަލީގައި ދުޅަހެޔޮ އުފާވެރި މާހައުލެއްގައި ދިރިއުޅުން ބިނާކުރަން ފުރުސަތު ލިބޭނެއެވެ.
