ތަހުގީގުކުރުމުގެ ޚާއްސަ ގަވާއިދު މުރާޖަޢާކުރުމަށް ސައީދު ހުށަހެޅި މައްސަލަ ބޭރުކޮށްލައިފި
ޒާތީ މިނިވަން ކަމަށް ހުރަސް އެޅޭ ކަމަށް
މުހައްމަދު ސައީދު - މާވަށު ދާއިރާގެ މެމްބަރ
ތަހުގީގުކުރުމުގެ ޚާއްސަ ގަވާއިދު މުރާޖަޢާކުރުމަށް މާވަށު ދާއިރާގެ މެމްބަރު މުހައްމަދު ސައީދު ހުށަހެޅުއްވި މައްސަލަ ބޭރުކޮށްލައިފިއެވެ.
މައްސަލަ ބަލައިގަންނަން ފެންނަ ކަމަށް ވޯޓި ދެއްވީ 7 މެމްބަރުންނެވެ. ބަލައިގަންނަން ނުފެންނަ ކަމަށް 22 މެމްބަރުން ވޯޓު ދެއްވިއެވެ. ސައީދު ހުށަހެޅި މި މައްސަލައިގައި ބުނެފައިވަނީ, ދިވެހި ފުލުހުންގެ ޚިދުމަތުގެ ގާނޫނުގެ ދަށުން އެކުލަވާލާފައިވާ ތަހުގީގުކުރުމުގެ ޚާއްސަ އުކުޅު ބޭނުންކުރުމުގެ ގަވާއިދާއި ގާނޫނު އަސާސީން ލިބިދޭ ބައެއް އަސާސީ ހައްގުތަކާއި މިނިވަންކަމާ ތައާރުޒްވާ ކަމަށެވެ.
އެ ގަވާއިދުގައި ބަޔާންކޮށްފައިވާ މާއްދާތަކުގެ ސަބަބުން ފަރުދުންގެ ޒާތީ މިނިވަންކަމަށް ހުރަސް އެޅޭ ކަމަށާއި, ފަރުދުންގެ އަމިއްލަ ހުރިހާ ހަރަކާތް ބަލައި ފާރަލުމާއި, އެހެނިހެން އިލެކްޓްރޯނިކް ވަސީލަތްތައް ބޭނުން ކޮށްގެން ފަރުދުންގެ މައުލޫމާތު ހޯދޭނެ ކަމަށް ގަވާއިދުގައި ބަޔާން ކޮށްފައިވާ ކަމަށެވެ. އެފަދަ ކަންކަމުގައި ކުށަށް އަރައިގަތުމުގެ ފުރުސަތު ލިބޭ ކަންކަން ހިމެނޭ ކަމަށް މައްސަލައިގައި ބުނެފައިވެއެވެ. މިއީ މިނިވަން ކަމަށް ހުރަސް އެޅޭ ކަމެއް ކަމަށް ސައީދު ހުށަހެޅި މައްސަލައިގައި ބުނެފައިވެެއެވެ.
އިތުރަށް ބުނެފައިވަނީ, ގާނޫނު އަސާސީން ލިބޭ ހައްގެން ގަވައިދަކުން ނިގުޅައި ނުގަނެވޭނެތީ, ތަހުގީގުކުރުމުގެ ޚާއްސަ އުކުޅު ހިމެނޭ ގަވާއިދު އަލުން މުރާޖަޢާކުރުމަށް ސަރުކާރުގެ ކަމާބެހޭ ފަރާތްތަކަށް ގޮވާލާ ކަމަށެވެ.
