ޒިޔާދު ބާޤިރު ޝަރީއަތް: ހެއްކާ ގުޅޭގޮތުން ދެފަރާތުން ވާހަކަ ދައްކައިފި
މި މައްސަލައިގެ އަޑުއެހުންތައް ދެ މަސް ދުވަހުގެ ތެރޭގައި ނިންމުމަށް މަސައްކަތް ކުރައްވާނެ
ކުރީގެ ރައީސް ޢަބްދުﷲ ޔާމީންގެ ވެރިކަމުގައި އިސްލާމިކް މިނިސްޓަރުކަން ކުރެއްވި، ޑރ. އަޙުމަދު ޒިޔާދު ބާޤިރު
ކުރީގެ ރައީސް ޢަބްދުﷲ ޔާމީންގެ ވެރިކަމުގައި އިސްލާމިކް މިނިސްޓަރުކަން ކުރެއްވި، ޑރ. އަޙުމަދު ޒިޔާދު ބާޤިރުގެ މައްޗަށް ދައުލަތުން އުފުލާފައިވާ ކޮރަޕްޝަނުގެ މައްސަލައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ޑރ. ޒިޔާދުގެ މައްޗަށް އުފުލާފައިވާ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގެ ދައުވާގެ އަޑުއެހުން ކުރިއަށް ގެންގޮސްފައިވަނީ, މި މައްސަލައިގައި އޭނާއާއެކު ދައުވާ އުފުލާފައިވާ މ. މުހައްމަދީއާބާދު އިބްރާހީމް ޢަބްދުﷲ ސަޢީދުގެ މައްސަލައާ ވެސް އެކުގައެވެ. މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަނީ މައްސަލައިގެ ޝަރީއަތް ފަށައި ހެކި ހުށައަޅާފައެވެ. އެދުވަހު ދައުލަތުން ހުށައެޅި ހެކިވެރިންގެ ތެރެއިން މުހިންމު ހެކިވެރިއަކު ހާޒިރު ނުވުމުން، ބަންދުގައި ބަހައްޓައިގެން ވިޔަސް އޭނާ ހާޒިރު ކުރުމަށް ދައުލަތުން އެދުމުން އެ އަޑުއެހުން ނިންމަވަމުން ޝަރީއަތުން ވަނީ ޝަރީއަތް ކުރުމާބެހޭ ޖިނާއީ އިޖުރާއަތުގެ ދަށުން ހެކިވެރިޔާ ހާޒިރު ކުރުމަށް ނިންމަވާފައެވެ. އަދި ބަންދުގައި ބަހައްޓައިގެން ހެކިވެރިޔާ ހާޒިރުކުރަން ޖެހުނުނަމަވެސް، އެގޮތަށްވެސް ހާޒިރު ކުރެވިދާނެކަމަށް ޝަރީއަތުން ވަނީ ނިންމަވާފައެވެ.
އެދުވަހުގެ އަޑުއެހުން ނިންމަވާލެއްވީ ދެން އޮންނަ އަޑުއެހުމެއްގައި ހަތަރުވަނަ ހެއްކެއްގެ ގޮތުން ދައުލަތުން ހުށައެޅި އަޙުމަދު އަކްމަލްގެ ހެކިބަސް ނެގުމާއި، ދިފާއީ ހެކިންގެ ހެކިބަސް ނެގުމަށް ތާވަލުކޮށްފައެވެ.
އަންގާރަ ދުވަހުގެ އަޑުއެހުމުގައި ވަނީ މި މައްސަލައިގައި ދައުލަތާއި ދިފާއުން ވަނީ ހެއްކާ ގުޅޭގޮތުން ވާހަކަ ދައްކަވާފައެވެ. ދެން މި މައްސަލައިގައި އޮންނާނީ ޚުލާސާ ބަޔާން އިއްވުމެވެ.
މި މައްސަލައަކީ، އިސްލާމިކް މިނިސްޓްރީން ޒިކުރާ މިސްކިތް އިމާރާތްކުރުމަށް އެސްޖޭ ކޮންސްޓްރަކްޝަނާއެކު ވެފައިވާ އެއްބަސްވުމުގައި ކޮރަޕްޝަނަށް މަގުފަހިވާ ކަންތައްތަކެއް އެކުލެވޭތީ އެންޓި ކޮރަޕްޝަން ކޮމިޝަން (އޭސީސީ)އިން އެ މައްސަލަ ތަހުގީގުކޮށް ނިންމައި، މި މައްސަލާގައި ތުހުމަތު ކުރެވޭ މީހުންގެ މައްޗަށް ދައުވާ ކޮށްދިނުމަށް މިދިޔަ ސެޕްޓެމްބަރު މަހުގެ 17 ވަނަ ދުވަހު އޭސީސީން ޕްރޮސެކިއުޓަރ (ޕީޖީ)ގެ އޮފީހަށް ފޮނުވި މައްސަލައެކެވެ
