ހޮނިހިރު ދުވަހު ވެކްސިން ފުރިހަމަކުރީ 633 މީހުން
މާލެ ސަރަހައްދުން ވެކްސިންގެ ދެވަނަ ޑޯޒު ޖަހާފައިވަނީ 134 މީހުން
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ހޮނިހިރު ދުވަހު ވެކްސިން ފުރިހަމަކޮށްފައިވަނީ 633 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން އެންމެ ފަހުން ނެރުނު ތަފާސް ހިސާބުތައް ދައްކާ ގޮތުން ހޮނިހިރު ދުވަހު ވެކްސިންގެ ފުރަތަމަ ޑޯޒު ޖަހާފައިވަނީ 156 މީހުންނެވެ. އެއީ މާލެ ސަރަހައްދުން ވެކްސިން ޖެހި 52 މީހުންނާއި، އަތޮޅު ތެރެއިން ވެކްސިން ޖެހި 104 މީހުންނެވެ. މީގެ އިތުރުން ވެކްސިންގެ ދެވަނަ ޑޯޒު 633 މީހުން ޖަހާފައިވާއިރު، އެއީ މާލެ ސަރަހައްދުން ވެކްސިން ޖެހި 134 މީހުންނާއި، އަތޮޅުތެރެއިން ވެކްސިން ޖެހި 499 މީހުންނެވެ.
އެއާއެކު ރާއްޖެއިން ވެކްސިންގެ ފުރަތަމަ ޑޯޒު ޖެހި މީހުންގެ އަދަދު ވަނީ 391،738 ށް އަރާފައެވެ. އަދި ވެކްސިންގެ ދެވަނަ ޑޯޒު ޖެހި މީހުންގެ އަދަދު 335،926 ށް ވަނީ އަރާފައެވެ.
ވެކްސިން ޖެހުމުގެ މަސައްކަތުގެ ތެރެއިން ސަރުކާރުން މިހާރު ވަނީ ދުނިޔެ ބަލައިގަންނާނެ ގޮތަށް ކޮވިޑް-19 ވެކްސިންގެ ޑިޖިޓަލް ވެކްސިން ޕާސްޕޯޓު ތައާރަފުކޮށްފައެވެ. މިނިސްޓްރީ އޮފް ހެލްތުގެ ރަސްމީ ކޮވިޑް-19 ޑިޖިޓަލް ވެކްސިން ޕާސްޕޯޓަކީ ރާއްޖޭގެ ކޮވިޑްސޭފް ޕޯޓަލްއެވެ. ކޮވިޑްސޭފް އިން 4 ހާލަތެއް ޑިޖިޓަލްކޮށް ކަށަވަރު ކޮށްދެއެވެ. އެއީ އެމީހަކު ފުރިހަމަކޮށްފައިވާ ވެކްސިން ޑޯޒާއި އެމީހެއްގެ ކޮވިޑް-19ގެ ސިއްހީ ހާލަތާއި ކަރަންޓީނުގެ ހާލަތު އަދި އެންމެފަހުން އެމީހަކު ހަދާފައިވާ ޕީސީއާރު ޓެސްޓްތަކުގެ ނަތީޖާއެވެ.
ރާއްޖޭގެ އާބާދީގެ ބޮޑުބައެއް އަދިވެސް ވެކްސިން ނުޖަހާ ތިބިކަމަށް އެޗްޕީއޭއިން ބުނެފައިވެއެވެ. އެގޮތުން މިހާތަނަށް ވެކްސިން ނުޖަހާ ތިބި މީހުން ދެނެގަތުމުގެ މަސައްކަތް ފަށަން ސަރުކާރުން ވަނީ ނިންމާފައެވެ. މިގޮތަށް ވެކްސިން ނުޖަހާ ގިނަ މީހުންނަކީ ބޭރު ގައުމުތަކުގައި ތިބި މީހުން ކަމަށްވެސް ސަރުކާރުން ވަނީ ހާމަކޮށްފައެވެ.
