ޕާޓީ ހަލާކުވެގެން ގޮސްދާނެތީ ހާސްވާވަރުގެ ކަމެއް އަދި ނުފެންނަ ކަމަށް މިނިސްޓަރ އޮފް ޔޫތު، ސްޕޯޓްސް އެންޑް ކޮމިނިޓީ އެމްޕަވަރމެންޓް އަހުމަދު މަހްލޫފް ވިދާޅުވެއްޖެއެވެ.

ރާއްޖެޓީވީ ގެ 'ފަލަ ސުރުޚީ' ޕްރޮގްރާމްގައި ވާހަކަ ދައްކަވަމުން މަހްލޫފް ވިދާޅުވީ، ޚިޔާލު ތަފާތުވުން އެއީ އަބަދުވެސް އެމްޑީޕީގައި އޮންނަ ކަމެއް ކަމަށާއި، އެންމެ ފަހު ވަގުތު ހުރިހާ މެމްބަރުންވެސް ތިބޭނީ އެއްގޮތަކަށް ކަމަށެވެ. ރައީސް ނަޝީދާއި، ރައީސް ސާލިހުގެ ވާހަކަފުޅު ތަކުންވެސް އެކަން ދޭހަވާ ކަމަށް ވިދާޅުވިއެވެ.

މަހުލޫފް ވިދާޅުވީ، ޕާޓީގެ ރައީސާއި ލީޑަރުވެސް ވަކި ކެންޑިޑޭޓަކަށް ތާއީދު ކުރައްވާ ކެމްޕެއިން ކުރެއްވި މަންޒަރު ފެނިފައި ނުވާކަަމަށެވެ. ރައީސް ސާލިހާއި ރައީސް ނަޝީދު ދެކެވެސް ޕާޓީގެ މެމްބަރުން ލޯބިވާކަން ކަށަވަރު ކަމަށާއި، ރިޔާސީ އިންތިޚާބަކާ ހިސާބަށްދާއިރު، ދެ ބޭފުޅުން ތިއްބަވާނީ އެކުގައި ކަމަށް މަހްލޫފް ވިދާޅުވިއެވެ. ދެ ބޭފުޅުންވެސް ތިއްބަވަނީ ޕާޓީގެ މަސްލަހަތާ އެކުގައި ކަމަށެވެ. އެހެންކަމުން ޕާޓީ ހަލާކުވެގެން ގޮސްދާނެތީ ހާސްވާން ނުޖެހޭ ކަމަށް ވިދާޅުވިއެވެ.

ޚިޔާލު ތަފާތުވާއިރުވެސް ގަބޫލުކުރަންވީ ހަގީގަތަކީ މިވަގުތު ހުންނެވި ރައީސުލްޖުމްހޫރިއްޔާއަށް ޕާޓީ ތެރެއިން ދެވެން އޮތް އެއްބާރުލުމެއް ދިނުން ކަމަށެވެ. ސިޔާސީ މަގާމުތަކަށް އައްޔަން ކޮށްފައި ތިބި ބައެއް މީހުންގެ ފަރާތުން ސަރުކާރަށް ދޭން ޖެހޭ އެއްބާރުލުން ދެމުން ނުދާ ކަމަށް މަހްލޫފް ވިދާޅުވިއެވެ. ސަރުކާރުން ކުރާ މަސައްކަތްތަކުގެ ވާހަކަ ދައްކަން ޖެހޭ މީހުން އެ ވާހަކަ ނުދައްކާ ކަމަށާއި، ސަރުކާރު ޕްރޮމޯޓް ކުރުން ނުފެންނަ ކަމަށް ވިދާޅުވިއެވެ. އެހެން ސަރުކާރުތަކުން ތިން އަހަރުތެރޭގައި ކުރި މަސައްކަތްތަކާއި، މި ސަރުކާރުން ތިން އަހަރުތެރޭގައި ކުރި މަސައްކަތާ އަޅާ ކިޔާއިރު، މި ސަރުކާރުން ހިންގާ ޕްރޮޖެކްޓް ތަކުގެ އަދަދު ގިނަ ކަމަށް ވިދާޅުވިއެވެ.

އެމްޑީޕީގެ އެތެރޭގެ އިންތިޚާބާމެދު މަހުލޫފު ވިދާޅުވީ މިހާ ފޯރިގަދަ އިންތިޚާބެއް މީގެ ކުރިން އެއްވެސް ޕާޓީއަކުން ނުފެންނަ ކަމަށެވެ.

މަހުލޫފް ވިދާޅުވީ، އިންތިޚާބުގެ ނަތީޖާއިން އެނގިގެން ދިޔައީ އެމްޑީޕީގެ މެމްބަރުން އެމަނިކުފާނުގެ މަސައްކަތްތައް ބަލައިގެންފައިވާ ކަންކަމުގައެވެ.

ސަސްޕެންޝަނެއްގައި އެމަނިކުފާނު މިހާރު ހުންނަވަން ޖެހިވަޑައިގެންފައިވާ މައްސަލަޔަށް އިޝާރާތް ކުރައްވަމުން މަހުލޫފު ވިދާޅުވީ މިހާރު ޕީޖީގައި އޮތް މައްސަލަ ވީ އެންމެ އަވަހަށް ނިންމައި ދިނުމަށް އެދޭ ކަަމަށެވެ. މައްސަލައާމެދު ވަކި ގޮތެއް ނުނިންމައި އޮންނަތާ 100 ވަރަކަށް ދުވަސްވީ އިރު، އަދިވެސް ތަހުގީގު ނުނިމެނީތޯ މަހުލޫފް ސުވާލު އުފެއްދެވިއެވެ. މަހްލޫފް ވިދާޅުވީ، ހެކި ހުރި ނަމަ މިހާރު ދައުވާ ނުކުރަންވީ ސަބަބެއް ނެތް ކަމަށެވެ. ދައުވާކުރާ ހިސާބުން އެމަނިކުފާނުގެ އަތްޕުޅުގައި ހުރި ލިޔެކިޔުންތައް ހިއްސާކޮށް ކުށެއް ނެތްކަން ސާބިތު ކޮށްދެއްވާނެ ކަމަށް ވިދާޅުވިއެވެ.