އެމްޑީޕީގެ ދާއިރާތަކުގެ އިންތިޚާބު: ބައެއް މަރުކަޒުތަކުގައި ހަވީރު 6:00ށް ވޯޓުލުން ކުރިއަށްދާނެ
އެކިއެކި ސަބަބުތަކާހުރެ މެންދުރު 12:00ގެ ފަހުން ވޯޓުލާން ފެށި ތަންތަނުގެ ވޯޓުލުން ނިމޭނީ ހަވީރު 6:00ގައި
އެމްޑީޕީ ގައުމީ މަޖިލީހުގެ އިންތިޚާބު 2021
އެމްޑިޕީގެ ދާއިރާތަކުގެ އިންތިޚާބުގައި ބައެއް މަރުކަޒުތަކުގައި ހަވީރު 6:00 ހަމައަށް ވޯޓުލުން ކުރިއަަށްދާނެ ކަމަށް އެޕާޓީން ބުނެފިއެވެ.
އެމްޑީޕީން ބުނީ އެކިއެކި ސަބަބުތަކާހުރެ މެންދުރު 12:00ގެ ފަހުން ވޯޓުލާން ފެށި ތަންތަނުގެ ވޯޓުލުން ނިމޭނީ ހަވީރު 6:00ގައި ކަމަށެވެ. އެ މަރުކަޒުތަކުގައި ހަވީރު 5:00 ޖަހާއިރު ކިޔޫގައި މީހަކު ނެތަސް ވޯޓު ފޮށި ބަންދުކުރާނީ ހަވީރު 6:00ގައި ކަމަށެވެ. އަދި 6:00 ޖަހާއިރު ކިޔޫގައި މީހުން ތިބި ނަމަ އެމީހުން ވޯޓު ލައި ނިމެންދެން ފޮށި ބަންދު ނުކުރާނެ ކަމަށްވެސް އެޕާޓީން ބުނެއެވެ.
ވޯޓުލުން ކުރިޔަށް ގެންދިއުމަށް ހަމަޖެހިފައިވަނީ މާލޭގެ 15 ސްކޫލާއި، ސޯޝަލް ސެންޓަރުގެ އިތުރުން، މޮނިޓަރިންގެ ހާލަތުގައި ނެތް ރަށްރަށުގެ ތެރެއިން 3 ރަށް ފިޔަވާ އެހެން ހުރިހާ ރަށެއްގައިވެސް އެރަށެއްގެ ސްކޫލުގައެވެ. ވޯޓުލުމަށްޓަކައި މެމްބަރުން ދާއިރުގައި ފޮޓޯ ޖެހި އައިޑީއެއް ހިފައިގެން ދިއުމަށާއި، ވޯޓުލާ ނިމުމުން އެ މެމްބަރެއްގެ އިނގިލީގައި ފާހަގައެއް ޖަހާނެކަން ވަނީ ފާހަގަކޮށްފައެވެ. އިންތިޚާބުގެ ތެރޭގައި ދިމާވާ އެކިއެކި ކަންކަމުގައި ޝަކުވާ ހުށަހެޅުމަށް 3 ނަމްބަރެއްގެ ބޭނުން ކުރެވޭނެ ހޮޓްލައިނެއްވެސް ވަނީ ގާއިމް ކޮށްފައެވެ.
މިފަހަރުގެ އިންތިޚާބުގައި 733 ކެންޑިޑޭޓުން ވާދަކުރާއިރު ވޯޓުލުމުގެ ހައްގު ލިބިފައިވާ މީހުންގެ އަދަދު 93،000ން މައްޗަށް އަރައެވެ.
އެމްޑީޕީގެ ގައުމީ މަޖިލީސް އެކުލެވިގެން ވަނީ އެ ޕާޓީ ވެރިކަމުގައި އޮންނަނަމަ ރައީސުލްޖުމްހޫރިއްޔާ އާއި ވަޒީރުންގެ މަޖިލީހުގެ އެމްޑީޕީގެ މެމްބަރުންނާއި ޕާޓީގެ ލީޑަޝިޕާއި ޕާލަމެންޓްރީ ގްރޫޕްގެ މެމްބަރުންނާއި ދާއިރާތަކުގެ ރައީސުންނާއި އަންހެނުންގެ ރޫހާއި ޒުވާނުންގެ ހިތްވަރު އަދި އިސްލާމްދީނުގެ މަޝްވަރާ މަޖިލީހުގެ ރައީސް ހިމެނޭ ގޮތުންނެވެ.
