އިތުރު 61 މީހަކު ކޮވިޑަށް ޕޮޒިޓިވްވެއްޖެ

ފާއިތުވި 24 ގަޑިއިރު ރާއްޖެއިން ކޮވިޑް-19 އަށް ޕޮޒިޓިވްވީ 61 މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭއިން އާންމުކޮށްފައިވާ މައުލޫމާތުގައިވާގޮތުން ބުރާސްފަތި ދުވަހުގެ އިރުއޮއްސި 06:00 އިން ހުކުރު ދުވަހުގެ އިރުއޮއްސި 06:00 އާއި ހަމައަށް 3،674 ސާމްޕަލެއް ވަނީ ޓެސްޓުކޮށްފައެވެ.

މީގެ ތެރެއިން 61 މީހަކު ޕޮޒިޓިވްވެފައިވާކަމަށާއި، މާލެ ސަރަހައްދުން ޕޮޒިޓިވްވީ 29 މީހުން ކަމަށް އެޗްޕީއޭއިން ހާމަކޮށްފައިވެއެވެ. އަތޮޅުތެރެއިން ޕޮޒިޓިވްވީ 24 މީހުން ކަމަށާއި، ރިސޯޓުތަކުން ޕޮޒިޓިވްވީ 8 މީހަކު ކަމަށް އެޗްޕީއޭއިން ހާމަކޮށްފައިވެއެވެ. މިއާއެކު މިހާތަނަށް ކޮވިޑަށް ޕޮޒިޓިވްވީ 84،164 މީހުން ކަމަށް އެޗްޕީއޭއިން ވަނީ ބުނެފައެވެ.

މިވަގުތު އެކްޓިވް ކޭސްގެ ގޮތުގައި 1،612 ކޭސްއެއް ގުނަމުންދެއެވެ. މީގެތެރެއިން 16 މީހަކަށް ފަރުވާދެމުންދަނީ ހޮސްޕިޓަލުތަކުގައި އެޑްމިޓުކޮށްގެންނެވެ.

މިހާތަނަށް ބަލިން ފަސޭހަވެފައިވަނީ 82،309 މީހުންނެވެ. 230 މީހަކު ވަނީ ބަލީގައި ނިޔާވެފައެވެ.