ވޯޓަކާ ނުލައި އެމްއާރުއެމްގެ ޒައީމަކަށް މައުމޫން އަދި ރައީސަކަށް ފާރިސް

ވޯޓަކާ ނުލައި އެމްއާރުއެމްގެ ޒައީމަކަށް ކުރީގެ ރައީސް މައުމޫން އަބްދުލްޤައްޔޫމާއި ރައީސަކަށް ފާރިސް މައުމޫން ހޮވިއްޖެއެވެ.

އަންނަ މަހުގެ ދެވަނަ ދުވަހު ބޭއްވުމަށް ހަމަޖެހިފައިވާ އެމްއާރުއެމް އިންތިޚާބުގައި 16 މަގާމަކަށް 72 މީހަކު ވަނީ ކުރިމަތިލާފައެވެ. އަދި މިމަގާމުތަކުގެ ތެރެއިން އިންތިޚާބު ކުރަންޖެހޭ އަދަދަށް ކުރިމަތިލާފައިވުމުން 12 މަގާމަކަށް މެމްބަރުން ވަނީ ވޯޓަކާއި ނުލައި ހޮވިފައެވެ. ރައީސް މައުމޫނާއި ފާރިސްއާ ނުލާ ދެން އަންހެން މެމްބަރުންގެ ތެރެއިން ނާއިބުރައީސް ކަމަށް ނާދިރާ ވަނީ ހޮވިފައެވެ.

އަންހެނުންގެ ކައުންސިލްގެ ރައީސާއި ނާއިބުރައީސް އިންތިޚާބުކުރާއިރު އަންހެނުންގެ ކައުންސިލަށް 20 މެމްބަރުން އިންތިޚާބުކުރާނެއެވެ. އިންތިޚާބު ކޮމިޓީ އާއި ސުލޫކު ކޮމިޓީ އަދި އިސްތިއުނާފް ކޮމެޓީއަށް މެމްބަރުން އިންތިޚާބުކުރާއިރު މިއިން ކޮންމެ ކޮމިޓީއަކަށްވެސް 5 މެމްބަރުން އިންތިޚާބުކުރުމަށް ވަނީ ހަމަޖެހިފައެވެ.

މި ހުރިހާ މަގާމަކަށްވެސް މީހުން ކުރިމަތިލާފައިވާކަމަށް އެމްއާރުއެމްއިން ވަނީ ބުނެފައެވެ. މި މަގާމުތަކަށް މީހުން ހޮވާނީ އަންނަ އޮކްޓޯބަރު މަހުގެ 2 ވަނަ ދުވަހު އޮންނަ އެޕާޓީގެ ނޭޝަނަލް ކޮންވެންޝަންގައެވެ. މައުމޫން އިސްވެ ހުންނަވައި އެމްއާރުއެމް އުފެއްދެވީ ޕީޕީއެމް ދެބައިވެ ޕީޕީއެމްގެ ބާރު ކުރީގެ ރައީސް އަދި މައުމޫންގެ ކޮއްކޯފުޅު އަބްދުﷲ ޔާމީން ހޯއްދެވުމުންނެވެ. ޕީޕީއެމްގެ ރައީސްކަމުގައި ހުންނަވައި ފެއްޓެވި އިސްލާހީ މަސައްކަތުގެ ތެރެއިން އެމްއާރުއެމް އުފެއްދެވިއިރު ޕީޕީއެމް އުފައްދަވާފައި ވަނީވެސް މައުމޫން އިސްވެ ހުންނަވައެވެ.

ޕީޕީއެމްގެ ކުރިން މައުމޫން ވަނީ ޑީއާރުޕީ އުފައްދަވާފައެވެ. އެޕާޓީވެސް އެމަނިކުފާނަށް ގެއްލުނީ އޭރު ޑީއާރުޕީ ހިންގަވަން ތިއްބެވި ބޭފުޅުންނާއި މައުމޫނާ ދެމެދު އުފެދުނު ސިޔާސީ ޚިޔާލުތަފާތުވުންތަކުގެ ސަބަބުންނެވެ.

އެމްއާރުއެމް އަކީ ރައީސް މައުމޫން އުފެއްދެވި ތިން ވަނަ ސިޔާސީ ޕާޓީއެވެ. އެމްއާރުއެމް ސިޔާސީ ޕާޓީއެއްގެ ގޮތުގައި ރަޖިސްޓްރީކޮށްފައިވަނީ 2019 ވަނަ އަހަރުގެ ނޮވެމްބަރ މަހުގެ 20 ވަނަ ދުވަހުއެވެ.