ނާކާމިޔާބު ކޮށްލި ބަޣާވާތަށް އެއް އަހަރުފުރުން ތުރުކީގައި ފާހަގަކޮށްފި

ރައީސް ރަޖަބް ތައްޔިބް އޮރްދޮޣާން މަގާމުން ދުރުކުރުމަށް ރޭވި ބަޣާވާތް ނާކާމިޔާބު ކޮށްލެވުން ފާހަގަ ކުރުމަށް އިސްތަންބޫލްގައި އެތައް ހާސްބަޔަކު ބައިވެރިވި ބޮޑުއެއްވުމެއް ބާއްވައިފިއެވެ.

ބޮސްފަރަސް ބްރިޖް ނުވަތަ މިހާރު ކިޔާ އުޅޭގޮތުންނަމަ 15 ޖުލައިގެ ޝަހީދުންގެ ބްރިޖްގައި ހޮނިހިރު ދުވަހު އެއްވެ ތިބި ފަރާތްތަކާ ބައިވެރިވެ ވަޑައިގެން ރައީސް އޮރްދޮޣާން ވަނީ ބަޣާވާތުގައި ބައިވެރިވި ފަރާތްތަކުގެ"ބޯތަށް ޗިސްޗިސް ކޮށްލައްވާނެކަމަށް"ވިދާޅުވެ އިންޒާރު ދެއްވާފައެވެ.

"އެންމެ ފުރަތަމަ ބޯތަށް ޗިސްޗިސް ކޮށްލާނީ އެ ޣައްދާރުންގެ" މަރުގެ އަދަބު ތަންފީޒު ކުރަންޖެހޭ އެއްވެސް ގާނޫނެއް ފާސްކޮށްފިނަމަ ތަސްދީގު ކުރައްވާނެކަމުގެ ޔަގީންކަން ދެއްވަމުން އޮރްދޮޣާން ވިދާޅުވިއެވެ.

"މިއީ މިއީ ގާނޫނުގެ ބާރު ހިނގާ ދައުލަތެއް. ގާނޫނު ހަދާ މަޖިލީހުން ފާސްވެ އަޅުގަނޑާ ހަމައަށް އަތުވެއްޖެނަމަ އަޅަނގަނޑު އޭގައި ސޮއިކުރާނަން"އޮރްދޮޣާން ވިދާޅުވިއެވެ.

އެ ގައުމުން މަރުގެ އަދަބު ތަންފީޒު ކުރުމުގެ ގާނޫނެއް ތަންފީޒުކޮށްފިނަމަ ޔޫރަޕިއަން ޔޫނިއަންގެ މެމްބަރަކަށްވުމަށް ކުރަމުން އަންނަ މަސައްކަތް ހުއްޓާލަން ޖެހޭނެއެވެ.

ރައީސް އޮރްދޮޣާން ވަނީ ހަތިޔާރާއެކު ބަޣާވާތް ރޭވި ފަރާތްތަކާ ކުރިމަތިލީ ރައްޔިތުންނަށް ތައުރީފް ކުރައްވާފައެވެ.

ވެރިރަށް އަންކާރާއިން އިސްތަންބޫލަށް ރައީސް އޮރްދޮޣާން ވަޑައިގެންފައިވަނީ ރަސްމީ މަތިންދާ ބޯޓް ކޮޅުގެ އިތުރުން އެކުގައި ދަތުރުކުރި އެފް 16 ހަނގުރާމަމަތީ ބޯޓަކާވެސް އެކުގައެވެ.

ތުރުކީގެ އިދާރާތަކުންވަނީ ޖުލައި 15 ވަނަ ދުވަހަކީ ތުރުކީގެ ޑިމޮކްރަސީއަށް ނަސްރު ލިބުނުދުވަހެއްގެ ގޮތުގައި ފާހަގަކޮށް" ޑިމޮކްރަސީއާ އެއްބައިވަންތަކަމުގެ ދުވަހު"ގެ ގޮތުގައި އެ ދުވަސް ފާހަގަކުރުމަށް ހަމަޖައްސާފައެވެ.

ނާކާމިޔާބު ބަޣާވާތަށްފަހު ތުރުކީއިން 50،000 މީހުން ހައްޔަރުކޮށް އޭގެ ތިންގުނަ މީހުން ވަޒީފާތަކުން ވަނީ ވަކިކޮށްފައެވެ. މިއީ އެގައުމުގެ ތާރީޚްގައި މިހާ ގިނަ އަދަދެއްގެ ބަޔަކު އެއްފަހަރާ ވަޒީފާތަކުން ސޮއިކުރި ފުރަތަމަ ފަހަރެވެ.

ރައީސް އޮރްދޮޣާންވަނީ މި އަހަރުގެ ކުރީކޮޅު ނެގި ފެން ނުފެންނަ ވޯޓް ކާމިޔާބް ކުރައްވައި ބާރުތައް ވަރުގަދަ ކުރައްވާފައެވެ.

އެންމެ ފަހުން މިދިޔަ ހުކުރުދުވަހުވެސް ވަނީ އިތުރު 7،563 ސިފައިންނާ ފުލުހުން އަދި ދައުލަތުގެ ވަޒީފާތަކުގައި ތިބި ފަރާތްތައް މަގާމުތަކުން ވަކިކޮށްފައެވެ.

މިދިޔަ އަހަރުގެ ޖުލައިމަހުގެ 20 ން ފެށިގެން ތުރުކީގައި އަދިވެސް އޮތީ ކުއްލި ހާލަތު އިއުލާނުކޮށްފައެވެ.