"މި ބަލަނީ، މި ޗެކްކޮށްލަނީ، އަޅުގަނޑު ޗުއްޓީގައި"

.މާލެސިޓީ އަކީ ކާރޫބާރު ބޮޑު ސިޓީއެކެވެ. އެތަނުން ގިނަ ޚިދުމަތްތަކެއް ލިބުނު ނަމަވެސް ހޯދަން އުނދަގޫ ކަންކަންތަކެއް ވެއެވެ. މީހުން ބުނާ ގޮތުންނަމަ މާލެއިން ހޯދަން އުނދަގުލީ ތިން ކަމަކެވެ. އެއީ އުޅަނދު ޕާކު ކުރާނެ ތަނަކާއި ބޯހިޔަވާހިކަމާއި މައުލޫމާތެވެ. މިއީ މުޅިއަކުން ދޮގު ވާހަކައެއް ވެސް ނޫނެވެ.

އަޅުގަނޑު ނޫސްވެރިއެއްގެ ހައިސިއްޔަތުން އެއްޗެއްކޭ ދަންނަވާނަމަ ދެންނެވެން އޮތީ މައުލޫމާތު ހޯދުމަކީ ވަރަށް އުނދަގޫ ކަމެކެވެ. ތަނެއްގައި ހިނގި ހާދިސާއަކާއި ގުޅިގެން ވިޔަސް ހިންގަމުންދާ ޕްރޮޖެކްޓެއްގެ މައުލޫމާތު ހޯދަން ވިޔަސް ކަމެއް ހިނގައިދިޔަ ގޮތް އިތުރަށް ސާފުކުރަން ބޭނުންވިޔަސް އެ މައުލޫމާތު ވަގުތުން ވަގުތަށް ހޯދުމަކީ ވަރަށް ދަތިކަމެކެވެ. އެހާމެ އުނދަގޫ ކަމެކެވެ. ސަރުކާރުގެ މުއައްސަސާތަކުން މައުލޫމާތު ހޯދުމަކީ ވަރަށް ބޮޑު ވޭނެކޭ ބުންޏަސް ދޮގަކަށް ނުވާނެއެވެ.

ކަމަކާއި ގުޅިގެން މައުލޫމާތު ހޯދަން ގުޅާލުމުން ފޯނަށް ޖަވާބު ނުދޭ ފަހަރު ގިނައެވެ. މިސްކޯލް ފެނިގެން އަނބުރާ ނުގުޅާ ފަހަރު ވެސް ގިނައެވެ. އަދި ފޯނު ނަގައިފިނަމަ "މި ބަލަނީ، މި ޗެކްކޮށްލަނީ، އަޅުގަނޑު ޗުއްޓީގައި" މިފަދަ ޖަވާބުތައް ކަންފަތުގައި ނުޖެހޭ ފަހަރެއް ނުދާނެއެވެ. މި ބަލަނީއޭ ބުނުމަށްފަހު އޭގެ ދެ ހަފުތާ ފަހުން ވެސް އެކަމުގެ އެންމެ އެދެވޭ ޖަވާބެއް ނުލިބެއެވެ.

ސަރުކާރުގެ މުއައްސާސަތަކުގައި ވެސް ވަކިން މީޑިއާ ސެކްޝަންތައް ހުރެއެވެ. އެ ސެކްޝަނަކުން މައުލޫމާތު ފޯރުކޮށްދޭން ވަކި މީހަކު ވެސް ކަނޑައަޅާފައިވެއެވެ. އެހެންނަމަވެސް މައުލޫމާތެއް ހޯދަން ވެއްޖެނަމަ އެކަކަށް ގުޅާ އަނެކަކަށް ގުޅާ، އެކަމުގެ މައުލޫމާތު ނުލިބިގެން އުޅެން ޖެހެއެވެ.

ކަން މިހެން ހުރިއިރު މި ސަރުކާރަކީ ޚިޔާލުފާޅުކުރުމުގެ މިނިވަންކަމާއި މައުލޫމާތު ފޯރުކޮށްދިނުމަށް މަސައްކަތް ކުރާ ސަރުކާރެކެވެ. އެގޮތުން ބައެއް ޓީވީ ޗެނަލްތަކުންނާއި އޮންލައިން ނޫސް މަޖައްލާތަކުން ގައުމުގެ އެންމެ މަތިވެރިޔާ ރައީސުލުޖުމްހޫރިއްޔާ އިބްރާހިމް މުހައްމަދު ސާލިހުގެ އަބުރު ކަތިލާ، ހެއްދެވި ނެހެއްދެވިއަށް ގޮވަމުންދާއިރު ވެސް އެތަންތަނާ މެދު ސަރުކާރުން ފިޔަވަޅެއް ނާޅައެވެ. ސަރުކާރުން މިހެން ކަންތައްތައް ކުރާއިރު ސަރުކާރުގެ މުއައްސަސާތަކުން މައުލޫމާތު ހޯދުން މިހާ އުނދަގޫކަމަކަށްވަނީ ކީއްވެގެންތޯ ހަމަ ހިތާހިތާ ސުވާލު އުފެދެއެވެ.

އިންފޮރމޭޝަން ކޮމިޝަނަރުގެ އޮފީހުން ބުނާގޮތުން މައުލޫމާތު ހޯދައި ލިބިގަތުމަކީ ކޮންމެ ރައްޔިތެއްގެ ވެސް ހައްގެކެވެ. އެ ރައްޔިތަކު މައުލޫމާތެއް ހޯދަން އެދިއްޖެ ހާލަތެއްގައި އެ މުއައްސަސާއަކުން ޖަވާބުދާރީ ވާންޖެހޭނެއެވެ. މައުލޫމާތު ފޯރުކޮށްނުދީ ހިފެހެއްޓޭ ހާލަތްތަކަށް ބަލާއިރު ހޯދުމަށް އެދޭ މައުލޫމާތަކީ ގައުމީ ސަލާމަތާއި ގުޅިފައިވާ މައުލޫމާތެއްނަމަ އެ މައުލޫމާތު ނުދީ ހިފެހެއްޓިދާނެއެވެ. މި ނޫން ހާލަތެއްގައި މައުލޫމާތު ފޯރުކޮށްދިނުމަކީ ލާޒިމްކަމަކެވެ.

މުއައްސަސާތަކުން މީޑިއާތަކަށް މައުލޫމާތު ފޯރުކޮށްދޭއިރު ތަފާތު ކުރާ މައްސަލައަކީ ވެސް ބޮޑު މައްސަލައެކެވެ. އެއްކަމެއްގައި ދެ މީޑިއާއަކުން ގުޅިޔަސް އެއް މީޑިއާއަށް ވަގުތުން މައުލޫމާތު ފޯރުކޮށްދިނުމަށްފަހު އަނެއް މީޑިއާއަށް އެ މައުލޫމާތު ނުދީ ހިފައްޓާތަން ވެސް އެބަ އާދެއެވެ. މިއީ ވަރަށް ހިތާމަވެރިކަމެކެވެ.

ކަން މިހެން ހުރިއިރު ސަރުކާރުގެ ބައެއް މުއައްސަސާތަކަކީ މައުލޫމާތު ފޯރުކޮށްދިނުމަށްވުރެ ބޮޑަށް އެމީހުންގެ އަމިއްލަ ޕީއާރް ފާރމްތަކޭ ސިފަވާ ކަހަލައެވެ. އެއީ މައުލޫމާތު ހޯދުމަށް އަޅުގަނޑުމެން ގުޅާ ގުޅާ ޖަވާބު ނުދިނުމަށްފަހު އެމީހުންގެ ޕްރޮމޯޝަނަލް ކަމެއް ހިންގަން ބޭނުންވުމުން އެއްކަލަ މީޑިއާ މަތިން ހަނދާންވެއެވެ. ދެއިރު ކާ ބޭސް ގުޅައެއް ހެން އެމީހުން ބޭނުންވާ ކަންތައްތަކުގައި އެދެވޭ ޖަވާބު ލިބިގެންދެން ހަމަ ގުޅާލަ ގުޅާލައި އެބަތިބެއެވެ.

ރައްޔިތުންނަށް މައުލޫމާތު ހޯދައި ދިނުމާއި ހަލުވި މިނެއްގައި ކަންތައްތަކުގެ މައުލޫމާތު ފޯރުކޮށްދިނުމަށް މިކަމުގެ ސަބަބުން ހުރަސްތަކެއް އެޅިގެން އެބަދެއެވެ. ބައެއް ފަހަރު އެ މުއައްސަސާއަކަށް ގުޅަން ފޫހިވާ ފަހަރުވެސް އާދެއެވެ. އެއީ ފޯނަށް ޖަވާބު ނުދޭނެކަން ނުވަތަ އެ ހޯދަން އުޅޭ މައުލޫމާތެއް ނުލިބޭނެކަން އެނގޭނެތީއެވެ.

މައުލޫމާތު ހޯދައި، އެ މައުލޫމާތު ރައްޔިތުންނާއި ހަމައަށް ފޯރުކޮށްދިނުމަށް މުއައްސަސާތަކުގެ ވެރިންނާއި މީޑިއާ ސެކްޝަންތަކުގެ މީހުންގެ އެއްބާރުލުން ނުހަނު ބޭނުންވެއެވެ. ޒަމާން ތަރައްގީވެ، ދުނިޔެ ކުރިއަރާ ދާއިރު ގިނަ ޚިދުމަތްތައް ވެސް އޮންލައިންކޮށް ދެވޭ ޒަމާނެއްގައި މައުލޫމާތު ހޯދުމަކީ މިހާ އުނދަގޫ ކަމަށް ވެގެނެއް ނުވާނެއެވެ. އެ ބައެއްގެ ޒިންމާ އެބަޔަކު އެބަ އަދާކުރަން ޖެހެއެވެ.

"މި ބަލަނީ، މި ޗެކްކޮށްލަނީ، އަޅުގަނޑު ޗުއްޓީގައި" މިހެން ބުނުމުގެ ބަދަލުގައި ވަގުތުން އެ މައުލޫމާތެއް ފޯރުކޮށްދެވޭނެ ގޮތްތައް އެބަ ފަހިކޮށްދޭން ޖެހެއެވެ. އަޅުގަނޑުމެންގެ ޒިންމާ އަދާކުރެވެން އޮތީ މައުލޫމާތު ހޯދައިގެން ކަމަށްވާތީ މިކަމަށް ހުރިހާ މުއައްސަސާއެއްގެ އެއްބާރުލުން ބޭނުންވެއެވެ. އެއީ ފަސްކުރެވެން އޮތް ކަމެއް ނޫނެވެ.