މީޑިއާ ކޮންޓްރޯލް ބިލު ފާސް ކުރިޔަސް އެ ބިލަށް ތަބާ ނުވާތި: މޭޔަރު އާޒިމް
މިނިވަންކަމަށް ހުރަސް އެޅޭ އެއްވެސް ބިލަކަށް ތަބާވާން ނުޖެހޭނެ ކަމަށް މޭޔަރު ވިދާޅުވި
މާލެ ސިޓީ މޭޔަރު އާދަމް އާޒިމް
މިނިވަން މީޑިއާ ތަޅުއަޅުވާ ބިލު ފާސްކުރިޔަސް އެ ބިލަށް އެއްވެސް ބޭފުޅަކު ތަބާ ނުވުމަށް މާލެ ސިޓީގެ މޭޔަރު އާދަމް އާޒިމް ގޮވާލައްވައިފި އެވެ.
ހިޔާލާއި ފިކުރު ކަފުނަށް ނަމުގައި ބޭއްވި ފޯރަމުގައި ވާހަކަ ދައްކަވަމުން އާޒިމް ވިދާޅުވި، ރައްޔިތުންނަށް މިނިވަން ކަންމަތި އުޅެވެންޖެހޭނެ ކަމަށާއި މިނިވަންކަމަށް ހުރަސް އެޅޭ އެއްވެސް ބިލަކަށް ތަބާ ވާން ނުޖެހޭނެ ކަމަށެވެ. އަދި މިއީ ހަމައެކަނި ނޫސްވެރިންގެ މިނިވަން ކަމަށް އެޅޭ ހުރަހެއް ނޫންކަމަށާއި މިއީ ހިޔާލު ފާޅުކުރާ ކޮންމެ މީހެއްގެ މިނިވަންކަން ނިގުޅައިގަތުމަށް ކުރާ ކަމެއް ކަމަށް އާޒިމް ވިދާޅުވި އެވެ.
އަދި ރައްޔިތުން އިންތިހާބު ކޮށްފައިވާ މެންބަރުންނާއި ވެރިން ވައްކަން ކުރަންޏާ އެވާހަކަ ދައްކާނެ ކަމަށާއި އަދި އެވާހަކަ ދެއްކެން ޖެހޭނެ ކަމަށް އާޒިމް ވިދާޅުވި އެވެ. އެ މެންބަރުންނާއި ވެރިން ހަމަ މަގަށް އަޅުވަން ތިބީ ރައްޔިތުން ކަމަށާއި އެމީހުންގެ އަނގައިގައި މަލަން އެޅުއްވުމުން ނިކުންނަ ނަތީޖާ ގޯސްވާނެ ކަމަށް އާޒިމް ވިދާޅުވި އެވެ.
ތިބޭފުޅުން ފިލަން އުޅޭނެ ކަމެއް ނެތް. މިގައުމަކަށް ކުރިއެރުމެއް ނުލިބޭނެ މީޑިއާ ބަންދު ކޮށްފިއްޔާ. ސޯޝަލް މީޑިއާ ބަންދު ކޮށްފިއްޔާ. އަޅުގަނޑު ބުނަން އޮތް ވާހަކައަކި އެއްވެސް ބޭފުޅަކު އެ ފާސްކުރިޔަސް އެއަށް ތަބާ ނުވައްޗޭ. އަޅުގަނޑު ތަބައެއް ނުވާނަން. އެއްވެސް ބޭފުޅަކު ފާސްކުރިޔަސް ތަބާ ނުވައްޗޭ.އާޒިމް
އާޒިމް ވިދާޅުވީ މިނިވަން ކަންމަތީ ބޭނުންވާ ވާހަކައެއް ދެއްކުމުގެ މިނިވަންކަން އޮންނަންޖެހޭނީ ރައްޔިތުން މަޖިލީހުގެ މެންބަރުންނަށް އެކަނި ނޫންކަމަށައި ކޮންމެ ރައްޔިތަކަށްވެސް އެ މިނިވަންކަން އޮންނަން ޖެހޭނެ ކަމަށެވެ. އަދި މަގާމުތަކަށް މީހުން އައްޔަން ކުރަންވާނީ ވެސް އާންމު ރައްޔިތުންނާއި މީޑިއާތައް މިނިވަންކޮށް ބާއްވާފަ ކަމަށާއި އެނޫންގޮތަކަށް އެކަން ވާނަމަ އެއި ރަނގަޅު މަގަކުން ދާނެ ކަމެއް ނޫން ކަމަށް އާޒިމް ވިދާޅުވި އެވެ.
މިގައުމަކީ މުއްސަނދި ގައުމެއް ކަމަށާއި އެހެން ނަމަވެސް މިގައުމުގެ ރައްޔިތުން މިހާ ނިކަމެތިކޮށް މިތިބޭ ސަބަބަކީ މިގައުމަށް ވަންނަ ފައިސާ ވިޔާނުދާކޮށް ބޭނުންކުރާތީ ކަމަށް އާޒިމް ވިދާޅުވި އެވެ.
