އަމީން ދޫކޮށްލި މައްސަލަ ދައުލަތުން ސުޕްރީމް ކޯޓުގައި އިސްތިއުނާފުކޮށްފި
20 ސެޕްޓެމްބަރު 2021 | ހޯމަ 07:56ދައުވާ ކޮށްފައިވަނީ ދައުވާ ކުރަން ޖެހޭ މުއްދަތުގައި ކަަމަށް ޕީޖީ ވިދާޅުވި
ޓެރަރިޒަމް ދައުވާ އުފުލާފައިވާ މުހައްމަދު އަމީން
ޓެރަރިސްޓެއް ކަމަށް ބުނާ މުޙައްމަދު އަމީނުގެ މައްސަލައިގައި ހައިކޯޓުން ނިންމާފައިވާގޮތާމެދު ޕްރޮސެކިއުޓަރ ޖެނެރަލްގެ އޮފީހުން ހިތްހަމަ ނުޖެހޭތީ އެ ޤަޟިއްޔާ ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކޮށްފިއެވެ.
އެ މައްސަލަ ސުޕްރީމް ކޯޓުގައި އިސްތިއުނާފުކުރުމަށް ނިންމީ ދިވެހިރާއްޖޭގެ ހައިކޯޓުގެ ނިންމެވުމުގައި ޓެރަރިޒަމް މަނާކުރުމުގެ ޤާނޫނުގެ 26 ވަނަ މާއްދާގެ (ފ) މާނަ ކޮށްދީފައިވަނީ ރަނގަޅަށް ނޫންކަމަށް ދެކޭތީއާއި، ޓެރަރިޒަމް މަނާކުރުމުގެ ޤާނޫނުގެ 1-28ގައި ބަޔާންކޮށްފައިވާ ތަޙުޤީޤު ކުރުމާއި ދަޢުވާކުރުމުގެ ޚާއްޞަ މުއްދަތުތަކަށް ހައިކޯޓުގެ ނިންމުމުގައި ރިޢާޔަތް ކޮށްފައި ނުވުމުގެ އިތުރުން، އެ ނިންމުމުގެ ސަބަބުން ޓެރަރިޒަމްގެ ކުށްތައް ތަޙުޤީޤުކުރުމާއި ދަޢުވާކުރުމުގެ ޚާއްޞަ މުއްދަތުތަކެއް ޤާނޫނުގައި ކަނޑައެޅުމުގެ މަޤްޞަދު ގެއްލިދާތީ ކަމަށް ޕީޖީ އޮފީހުން މައުލޫމާތު ދެއެވެ.
މި މައްސަލަ ޕީޖީ އޮފީހުން ސުޕްރީމް ކޯޓުގައި އިސްތިއުނާފު ކޮށްފައިވަނީ ހޯމަ ދުވަހުއެވެ.
މިކަމާ ގުޅިގެން ރާއްޖެޓީވީއަށް ދެއްވި ފޯން އިންޓަވިއުއެއްގައި ޝަމީމް ވިދާޅުވީ ހައިކޯޓުން ނިންމެވި މައްސަލާގައި ޖިނާއީ އިޖުރާޢަތުގެ ޤާނޫނުގައި ބުނާ އުސޫލުތަކަށް އަމަލު ކުރަން ޖެހޭ ކަމަށް ބުނެފައިވާ ކަމަށެވެ.
އެހެންނަމަވެސް ޓެރަރިޒަމްގެ ޤާނޫނު އުފެއްދީ ޖިނާއީ އިޖުރާޢަތުގައި ހުރި ޤާނޫނުގެ އުސޫލުތައް ޓެރަރިޒަމްގެ މައްސަލަތަކަށް ހިންގަން ބަލާއިރު އުނދަގޫވާތީވެ ޚާއްސަ ޤާނޫނެއް އުފެއްދުމަށް ކަމަށާއި، ޚާއްސަ ޤާނޫނުގައި އާންމުކޮށް ޤާނޫނުގައި ނުހުންނަ ކަހަލަ ޚާއްސަ ބާރުތަކެއް ފުލުހުންނަށް ވެސް އަދި ޕީޖީ އޮފީހަށް ވެސް، ދައުލަތުގެ އިދާރާތަކަށް ވެސް ދީފައި އެބަހުރި ކަމަށް ޝަމީމް ވިދާޅުވިއެވެ.
އަމީންގެ މައްޗަށް ދައުލަތުން އުފުލާފައި ވަނީ ޓެރަރިޒަމްގެ އަމަލެއް ކުރަން ރޭވުމުގެ ކުށުގެ ދައުވާ އާއި ޓެރަރިސްޓު ޖަމާއަތެއްގައި ބައިވެރިވުމުގެ ކުށުގެ ދައުވާއެވެ.
އަމީނަކީ އެމެރިކާއިން ޓެރަރިސްޓުންގެ ގޮތުގައި ކަނޑައަޅާ މީހުންގެ ލިސްޓުގައި ހިމެނުނު ފުރަތަމަ ދިވެއްސެވެ. އަމީނަކީ ޓެރަރިސްޓެއް ކަމަށް ކަނޑައަޅައި، އެމެރިކާގެ ޑިޕާޓްމަންޓް އޮފް ދަ ޓްރެޜަރީޒް އޮފީސް އޮފް ފޮރިން އެފެއާޒް ކޮންޓްރޯލް (އޯއެފްއޭސީ)އިން އޭނާއަށް މާލީ ދަތިކުރުމުގެ ފިޔަވަޅު ވެސް އަޅާފައިވެއެވެ.
