އަންނަ ހުކުރު ދުވަހު ވެސް ޕީޕީއެމް/ޕީއެންސީގެ ޚާއްސަ ޖަލްސާއެއް
ގައުމުގެ މިހާރުގެ ހާލަތު ދަނީ ދަށަށް
ޕީޕީއެމް/ޕީއެންސީން ކުރިއަށް ގެންދިޔަ މުޒާހަރާއެއްގެ ތެރެއިން
އަންނަ ހުކުރު ދުވަހު އިދިކޮޅު ޕީޕީއެމް/ޕީއެންސީން ކާނިވާ ސަރަހައްދުގައި ބޮޑު ޖަލްސާއެއް ބާއްވަން ނިންމައިފިއެވެ.
ޕީޕީއެމުން ބުނީ ''މިނިވަން ކަމުގެ ދިފާއުގައި ދިވެހީން'' ގައުމީ ހަރަކާތް ލޯންޗް ކުރުމަށް 24 ސެޕްޓެމްބަރ 2021ވާ ހުކުރު ދުވަހުގެ ރޭ 8:15ގައި ކާނިވާ ސަރަހައްދުގައި ޚާއްސަ ޖަލްސާއެއް އޮންނާނެ ކަމަށެވެ. އަދި ހުކުރު ދުވަހު ބާއްވާ ޖަލްސާއަކީ ގައުމުގެ ހާލަތާމެދު އޮތް ކަންބޮޑުވުން ފާޅުކުރުމުގެ ގޮތުން ބާއްވާ ޖަލްސާއެއް ކަމަށެވެ.
ޕީޕީއެމުން ބުނީ ގައުމުގެ މިހާރުގެ ހާލަތު ދަނީ ދަށަށް ކަމަށާއި، މިނިވަންކަން ނަގަހައްޓައި, ގައުމުގެ ހައްގުގައި މަސައްކަތް ކުރަން ޖެހޭ ކަމަށެވެ. ހުކުރު ދުވަހުގެ ރޭ ބާއްވާ ޖަލްސާ ވަރަށް ޚާއްސަވާނެ ކަމަށް ޕީޕީއެމުން ބުނެއެވެ. ވީހާ ވެސް ގިނަ ރައްޔިތުން މިޖަލްސާގައި ބައިވެރިވުމަށް ދައުވަތު ދީފައިވާއިރު، މިޖަލްސާގައި ޕީޕީއެމް/ޕީއެންސީގެ އިސް ބޭފުޅުން ބައިވެރިވަޑައިގަންނަވާނެ ކަމަށް އެޕާޓީން ބުނެއެވެ.
"މިނިވަންކަމުގެ ދިފާއުގައި ދިވެހީން" ހަރަކާތުގެ ރަސްމީ ލޯގޯއާއި ލަަވައެއް ވެސް އެ ޖަލްސާގެ ތެރެއިން ލޯންޗު ކުރާނެއެވެ.
އަންނަ ހުކުރު ދުވަހު ކާނިވާ ސަރަހައްދުގައި ޖަލްސާއެއް ބާއްވަން ނިންމާފައިވާއިރު، އާދީއްތަ ދުވަހުގެ ރޭ ވެސް އިދިކޮޅު ފަރާތްތަކުން މަގުމައްޗަށް ނުކުމެ މުޒާހަރާކޮށްފައިވެއެވެ. މިމަހުގެ 3 ވަނަ ދުވަހުގެ ރޭ ''އައްޑަނަ''ގެ ނަމުގައި ވެސް ބޮޑު ޖަލްސާއެއް ބާއްވާފައިވެއެވެ. މީގެ އިތުރުން ޖަލު ހުކުމެއް ތަންފީޒު ކުރައްވަމުން ގެންދަވާ, ކުރީގެ ރައީސް ޢަބްދުﷲ ޔާމީން މިނިވަން ކުރުމަށް ގޮވާލާ ޕީޕީއެމް/ޕީއެންސީން މިމަހުގެ 10ވީ ހުކުރު ދުވަހު ''އިންސާފު ކޮބާ" ނަމުގައި މުޒާހަރާކޮށްފައިވެއެވެ. އަދި އެމަނިކުފާނުގެ ޝަރީއަތްތައް ކުރިއަށްދާ ދުވަސްތަކުގައި ކޯޓު ކައިރިއަށް ވެސް އިދިކޮޅު ފަރާތްތަކުން އެއްވެ މުޒާހަރާ ކުރެއެވެ.
