އެމްޑީޕީގެ އެތެރޭގެ އިންތިޚާބުގައި ވޯޓުލާ މީހުންގެ ދާއިމީ ލިސްޓު އާންމުކޮށްފި

ސެޕްޓެމްބަރ މަހުގެ 25 ވަނަ ދުވަހު ބާއްވާ އެމްޑީޕީގެ އެތެރޭގެ އިންތިޚާބުގައި ވޯޓުލާ މީހުންގެ ދާއިމީ ލިސްޓު އާންމުކޮށްފިއެވެ.

އެމްޑީޕީން ބުނީ ސެޕްޓެމްބަރ މަހުގެ 11ވަނަ ދުވަހު އިޢުލާނުކުރި, އެމްޑީޕީގެ ދާއިރާތަކުގެ އިންތިޚާބުގެ ވޯޓުލާ މީހުންގެ ދާއިމީ ލިސްޓަށް ޝަކުވާ ހުށަހެޅުމަށް ހުޅުވާލި ފުރުސަތުގައި ހުށަހަޅާފައިވާ ޝަކުވާތަކާއި, އިންތިޚާބާ ބެހޭ ކޮމިޓީއަށް ފާހަގަކުރެވިފައިވާ ކަންކަމުގެ މައްޗަށް ރިއާޔަތްކުރުމަށްފަހު, ދާއިރާތަކުގެ އިންތިޚާބުގައި ވޯޓުލާ މީހުންގެ ދާއިމީ ލިސްޓު އިޢުލާނު ކުރާކަމަށެވެ.

މި ލިސްޓު ފައިނަލްކުރުމުގައި މައިގަނޑު 3 ކެޓެގެރީއެއްގެ މީހުންގެ ޝަކުވާއަށް ރިއާޔަތްކުރެވިފައިވާ ކަމަށް އެމްޑީޕީން ބުނެއެވެ. އެކަންކަމަކީ:

ޕާޓީގެ މެންބަރުންގެ ގޮތުގައި ތިބި ބައެއް ފަރާތްތަކުގެ ނަން އުނިވެފައިވާ ކެޓެގެރީ އާއި، ޕާޓީގެ މެންބަރުން ނޫން އެހެން ފަރާތްތައް މެންބަރުންގެ ގޮތުގައި ތިބި ކަމަށް ބުނާ ކެޓެގެރީގައި ހިމެނޭ ފަރާތްތަކާ ގުޅޭގޮތުން ހުށަހަޅާފައިވާ ޝަކުވާތަކުގައި އިންތިޚާބާބެހޭ ކޮމިޓީން ބަލާފައިވަނީ، އެފަރާތްތައް ޕާޓީއަށް ފޯމު ހުށަހެޅުމުން ފޯމު ބަލައިގަތުމަށްފަހު އެފަރާތަކަށް ދޫކުރާ ރަސީދު (ޝަކުވާ ހުށަހެޅުމުގެ މުއްދަތުގައި) ޕާޓީއަށް ހުށަހެޅުމުން, އެފަރާތެއްގެ ޝަކުވާއަކީ ސައްހަ ޝަކުވާއެއްކަމުގައި ބެލުމުގެ އުސޫލުންކަމަށް އެމްޑީޕީން ބުނެއެވެ. އެހެންކަމުން، ވޯޓުލާ މީހުންގެ ލިސްޓުގައި މިހާރު އެވަނީ އެގޮތަށް އަމަލުކޮށްފައިވާ ފަރާތްތައް ހިމަނާފައި ކަމަށް އެޕާޓީން ބުނެއެވެ.

މީގެއިތުރުން އެހެން ޕާޓީއެއްގެ މެންބަރެއްގެ ގޮތުގައި ނަން އޮވެގެން ނަން އުނިކުރި ފަރާތްތައް، އެހެން ޕާޓީއެއްގެ ދަފްތަރުގައި ރަޖިސްޓަރީވެފައިވަނީ ކޮން ތާރީޚެއްގައިކަން އިލެކްޝަންސް ކޮމިޝަނުން ޗެކްކުރުމަށްފަހު، އެތާރީޚަކީ މި އިންތިޚާބުގެ ވޯޓުލުމުގެ ހައްގު ލިބިފައިވާ މެންބަރުންގެ ދަފްތަރުގައި ނަން ހިމެނުމަށް އޮތް އެންމެ ފަހު ތާރީޚުކަމުގައިވާ 24 އޭޕްރީލް 2021ގެ ކުރީގެ ތާރީޚެއް ނަމަ، އެފަރާތެއްގެ ނަން ވޯޓުލާ މީހުންގެ ދާއިމީ ލިސްޓުގައި މިހާރު ހިމަނާފައިވާ ކަމަށްވެސް އެމްޑީޕީން ބުނެއެވެ.

އެމްޑީޕީގެ އިންތިޚާބުގައި 733 ކެންޑިޑޭޓުން ވާދަކުރެއެވެ.