ދިއްދޫ ގޮނޑުދޮށް ހިމާޔަތް ކުރުމުގެ މަސައްކަތުގެ 73 އިންސައްތަ ނިންމާލައިފި
ގޮނޑުދޮށް ހިމާޔަތް ކުރުމުގެ މަޝްރޫއަކީ 10.02 މިލިއަން ރުފިޔާގެ މަޝްރޫއެއް
ހއ. ދިއްދޫ ގޮނޑުދޮށް ހިމާޔަތް ކުރުމުގެ މަޝްރޫއުގެ ތެރެއިން
ހއ.ދިއްދޫ ގޮނޑުދޮށް ހިމާޔަތް ކުރުމުގެ މަޝްރޫއުގެ 73 އިންސައްތަ ނިންމައިލައިފިއެވެ.
މި މަޝްރޫއުގެ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އާއެވެ. އެމްޓީސީސީން ބުނީ ބިންގަޑު ކޮނުމަށްފަހު އެއްވަރު ކުރަން 7,750 ކިއުބިކް މީޓަރުގެ ވެލި ބޭނުންކުރުމާއި ޖިއޯ ބޭގަށް އެޅުމަށް 1,926 ކިއުބިކް މީޓަރުގެ ވެލި ބޭނުން ކުރަން ޖެހޭ މަޝްރޫއެއް ކަމުގައެވެ. އޭގެ އިތުރުން ރަށް ގިރުމުން ސަލާމަތް ކުރުމަށްޓަކައި 310 މީޓަރުގެ ސަރަޙައްދެއްގައި ޖިއޯ ބޭގް ރިވެޓްމެންޓް ޖެހުމުގެ މަސައްކަތް ވެސް ހިމެނޭ ކަމަށް އެމްޓީސީސީން ބުނެއެވެ.
ދިއްދޫގެ ރަށް ގިރުމުގެ މައްސަލައަކީ އެރަށުގެ ރައްޔިތުން ވަރަށް ކަންބޮޑުވާ މައްސަލައެކެވެ. ދިއްދޫއަކީ 5000އާ ގާތްކުރާ އާބާދީއެއްގެ މީހުން ދިރިއުޅެމުން އަންނަ ރަށެކެވެ. މި އަހަރުގެ ބަޖެޓުގައި ދިއްދޫގެ ތަރައްގީގެ މަޝްރޫއުތަކަށް ޚާއްސަކޮށްގެން 40 މިލިއަނަށްވުރެ ގިނަ ރުފިޔާވަނީ ކަނޑައަޅާފައެވެ. ދިއްދޫގެ ބަނދަރު ފުންކުރުމުގެ މަސައްކަތް ވެސް އެމްޓީސީސީން އަންނަނީ ކުރަމުންނެވެ.
އެމްޓީސީސީއާ ހަވާލުކޮށްފައިވާ ދިއްދޫގެ ގޮނޑުދޮށް ހިމާޔަތް ކުރުމުގެ މަޝްރޫއަކީ 10.02 މިލިއަން ރުފިޔާގެ މަޝްރޫއެކެވެ.
