ގައުމީ ފުޓްބޯޅަ ޓީމުތަކުގެ ސްޕޮންސާޝިޕް ބީއެމްއެލުން އިތުރުކޮށްފި

ރާއްޖޭގެ ގައުމީ ފުޓްބޯޅަ ޓީމުތަކަށް ބޭންކް އޮފް މޯލްޑިވްސް (ބީއެމްއެލް) ދޭ ސްޕޮންސާޝިޕް ދެ އަހަރުގެ މުއްދަތައް އިތުރުކޮށް އެއްބަސްވުމުގައި ސޮއިކޮށްފިއެވެ.

ގައުމީ ފުޓްބޯޅަ ޓީމުތަކުގެ ސްޕޮންސަރެއްގެ ގޮތުގައި ބީއެމްއެލް އެންމެ ފުރަތަމަ ހަޖައްސާފައިވަނީ 2017 ވަނަ އަހަރެވެ. އޭގެ ފަހުން 2019 ވަނަ އަހަރުގެ ޖުލައި މަހު ވަނީ އެ އެއްބަސްވުން އިތުރު ދެ އަހަރަށް އާކޮށްފައެވެ. އެހެންކަމުން އެ އެއްބަސްވުން މި އަހަރު ހަމަވާއިރު، ބުދަ ދުވަހު ބީއެމްއެލުން ވަނީ އަނެއްކާވެސް އެ އެއްބަސްވުން އިތުރު ދެ އަހަރަށް އާކޮށްފައެވެ.

އައު އެއްބަސްވުމުގައި ސޮއިކޮށްފައިވަނީ ބުދަ ދުވަހު ގައުމީ ފުޓްބޯޅަ ދަނޑުގައި ބޭއްވި ރަސްމިއްޔާތެއްގައެވެ. މި އެއްބަސްވުމުގައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފަރާތުން ސޮއިކުރެއްވީ އެ އެސޯސިއޭޝަނުގެ ރައީސް ބައްސާމް އަދީލް ޖަލީލެވެ. އަދި ބީއެމްއެލްގެ ފަރާތުން އެއްބަސްވުމުގައި ސޮއިކުރެއްވީ އެ ބޭންކުގެ ސީއީއޯ އަދި މެނޭޖިން ޑިރެކްޓަރު ޓިމް ސޯޔާއެވެ.

މި އެއްބަސްވުމުގެ ދަށުން ކުރިއަށް އޮތް ދެ އަހަރު ދުވަހުގެ މުއްދަތައް ރާއްޖޭގެ ފިރިހެން ސީނިއާ ގައުމީ ޓީމާއި، އަންހެން ސީނިއާ ގައުމީ ޓީމުގެ އިތުރުން އެކި އުމުރުފުރާތަކުގެ ގައުމީ ޓީމުތަކުގެ މެއިން ސްޕޮންސާޝިޕް ބީއެމްއެލަށް ލިބޭނެ ކަމަށް އެފްއޭއެމުން މައުލޫމާތުދެއެވެ.

މީގެ އިތުރުން ބުދަ ދުވަހު ގައުމީ ފުޓްބޯޅަ ދަނޑުގައި ބޭއްވި ރަސްމިއްޔާތުގައި ވަނީ އަންނަ އޮކްޓޯބަރު މަހު ރާއްޖޭގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތުގެ ބޭންކިން ޕާޓްނަރަކަށްވެސް ބީއެމްއެލް ހަމަޖައްސާފައެވެ.

ސާފް ޗެމްޕިއަންޝިޕުގެ ކެމްޕެއިން މިދިޔަ އާދީއްތަ ދުވަހުގެރޭ ފެށިއިރު، މި އަހަރުގެ އޮފިޝަލް ތީމް ނަމެއްގެ ގޮތުގައި "މަގޭ މަހަލްދީބް" ނަން ބޭނުން ކުރުމަށް ވަނީ ނިންމާފައެވެ. އަދި މި އަހަރުގެ ސާފް ޗެމްޕިއަންޝިޕުގެ ކެމްޕެއިންގެ ސްލޯގަން އެއްގެ ގޮތުގައި ބޭނުންކުރާނީ، "ތިންވަނަ ފަހަރު، މީ އެ ފަހަރު" އެވެ.

މި އަހަރުގެ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ސާފް ޗެމްޕިއަންޝިޕް ރާއްޖޭގައި ބާއްވާއިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން 2008 ވަނަ އަހަރުގެ މުބާރާތް ރާއްޖެ އާއި ސްރީ ލަންކާގައި ބޭއްވިއިރު، ރާއްޖެއިން ވަނީ އެ ފަހަރުގެ މުބާރާތް ކާމިޔާބުކޮށްފައެވެ. އެއީ ރާއްޖެއިން ސާފް ޗެމްޕިއަންޝިޕް ކާމިޔާބުކުރި ފުރަތަމަ ފަހަރެވެ. އަދި މި މުބާރާތް އެންމެ ފަހުން ބަންގްލަދޭޝްގައި ބޭއްވިއިރު، ރާއްޖެއިން ވަނީ ޑާކާގައި 2018 ވަނަ އަހަރު ބޭއްވި މުބާރާތުގެ ފައިނަލުގައި އިންޑިއާ ބަލިކޮށް ޗެމްޕިއަންކަން ހޯދާފައެވެ.