ޝައްފާނުގެ މަރުގެ މައްސަލައިގެ ޙުކުމް ކުރުން 25 އޮކްޓޯބަރުގައި

ތޫނު އެއްޗަކުން ހަމަލާދީ މަރާލާފައިވާ ށ. ފޭދޫ ހީނާމާގެ އިސްމާއިލް ޝައްފާން ޝަރީފްގެ މަރުގެ މައްސަލައިގެ ޝަރީއަތުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ޝައްފާން މަރާލި މައްސަލާގައި ދައުލަތުން ދައުވާކޮށްފައިވާ ހަތަރު މީހުންނަކީ، ސ. ހިތަދޫ، މަލަ، މުހައްމަދު އައިމަން ހަބީބް، ސ. މަރަދޫ މޫންލައިޓް ގްލޯރީ ހަސަން ނަބާހް, ސ. ހިތަދޫ، ޗަމަން، ހުސައިން ނިހާދު އަހްމަދު އަދި ކ. މާލެ، ޓޮމާޓޯފްލާވަރ ހުސެއިން ޖައިލަމްއެވެ.

އޭގެ ތެރެއިން ނިހާދުއާއި ޖައިލަމްގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ. ނަބާޙްއާއި އައިމަންގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާއެވެ.

މި މައްސަލައިގައި ދައުލަތާއި ދިފާއުން ވެސް މީގެ ކުރީގެ އަޑުއެހުންތަކުގައި ވަނީ ޚުލާސާ ބަޔާން އިއްވާފައެވެ.

ބަންދު މުރާޖައާ ބައި:

ބުދަ ދުވަހުގެ އަޑުއެހުމުގައި ވަނީ މި މައްސަލައިގެ ދައުވާ ލިބޭ މީހުންގެ ބަންދު މުރާޖައާ ކުރިއަށް ގެންގޮސްފައެވެ. އެމީހުންގެ ބަންދާމެދު ދައުލަތުގެ ގާނޫނީ ވަކީލު ވިދާޅުވީ އެމީހުން ބަންދު ކުރި ސަބަބާ ގުޅޭ ހާލަތު އަދިވެސް ދެމި އޮތް ކަމަށާއި، އެމީހުން ބަންދުގައި ބޭތިއްބުމަށް އެދޭކަމަށެވެ. އަދި އަވަހަށް މައްސަލައިގެ ނިހާއީ ޙުކުމް ކުރެއްވުމަށް އަޑުއެހުމެއް ބޭއްވުމަށް ދައުލަތުން ވަނީ އެދިފައެވެ. ނަމަވެސް ދިފާއީ ވަކީލު ވަނީ މި މައްސަލައިގެ ހެކިބަސް ވެސް ނަގާ ނިމިފައިވާކަން ފާހަގަކުރައްވައި، މި މައްސަލައިގައި ކުށް ސާބިތު ކުރެވޭ ވަރުގެ އެކަށީގެންވާ ހެކި ގަރީނާ ވެސް ނެތްކަަމަށް ވިދާޅުވެފައެވެ. ދިފާއީ ވަކީލު ވަނީ ބަންދަށް ލުއެއް ދެއްވުމަށް އެދިވަޑައިގެންފައެވެ.

ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވިދާޅުވީ، 25 އޮކްޓޯބަރުގައި މި މައްސަލައިގެ ޙުކުމް ކުރެއްވުމަށް އަޑުއެހުމެއް ބާއްވަވާނެ ކަމަށެވެ. އަދި މިހާރު އޮތް ބަންދުގެ ހާލަތު ދެމެހެއްޓުމަށް ޝަރީއަތުން ވަނީ ނިންމާފައެވެ.

މައްސަލައިގެ ޚުލާސާއެއް:

ތޫނު އެއްޗަކުން ހަމަލާދީ ޝައްފާނު މަރާލާފައިވަނީ ދެ ގްރޫޕެއްގެ ދެމެދުގައި ހިނގި ސިލްސިލާ މާރާމާރީތަކާ ގުޅިގެން ބަދަލުހިފުމުގެ ގޮތުން ކަމަށް އެ މައްސަލަތަކުގެ ތަހުގީގު ޓީމުން ބުނެފައިވެއެވެ.

އެގޮތުން، ގދ. ފަރެސްމާތޮޑާ، ކޮކާ، އިބްރާހިމް އާގިލް (19އ) މަރާލި މައްސަލައާ ގުޅޭ ގޮތުން ފުލުހުންގެ ތަހުގީގު ޓީމުން އޭރު ވިދާޅުވެފައިވަނީ، އާގިލް މަރާލީ 2018 އޮގަސްޓް 31 ވަނަ ދުވަހު ވ. ފުލިދޫ އަށް ކުރި ދަތުރެއް ނިންމާލުމަށް ފަހު މާލެއަށް ފޭބި ވަގުތު ބޮޑުތަކުރުފާނު މަގު އެމް.އެމް.އޭ ކުރިމަތީ އޮންނަ ތޮށިގަނޑު މަތިން ތޫނު އެއްޗަކުން ހަމަލާދީގެން ކަމަށެވެ. އާގިލް މެޔަށް ތޫނު އެއްޗަކުން ހަމަލާދީފައިވާ ކަމަށް ފުލުހުންގެ ތަހުގީގަށް ފާހަގަކުރެވިފައިވާ ކަމަށާއި އޭނާ ހޮސްޕިޓަލަށް ގެންދިޔަ އިރު ވެސް ދިރިހުރި ކަމުގެ ނިޝާނެއް ފެންނަން ނެތް ކަން ތަހުގީގު ޓީމުން ފާހަގަކޮށްފައިވެއެވެ.

މީގެ އިތުރުން 2018 އޮކްޓޫބަރު 11 ވަނަ ދުވަހުގެ ދަންވަރުގެ ވަގުތެއްގައި އިސްމާއިލް ޝައްފާން ޝަރީފް މަރާލީ އޭނާ ދިރިއުޅެމުން ދިޔަ ސަބުދެލިޔާ މަގު ގ. ރޯޒީ ކުރިމަތިން ބަޔަކު ތޫނު އެއްޗަކުން ހަމަލާދީ ކަމަށް ވެސް ފުލުހުންގެ ތަހުގީގު ޓީމުން ހާމަކޮށްފައިވެއެވެ. ޝައްފާންއަށް ހަމަލާދިންކަމުގެ މައުލޫމާތު ފުލުހުންނަށް ލިބުމާ އެކު އެ ސަރަހައްދަށް ދިޔަ ކަމަށާއި، އަދި ގާތްގަނޑަކަށް ފަސް ވަރަކަށް މިނެޓު ތެރޭގައި އޭނާ ހޮސްޕިޓަލަށް ގެންދެވުނު އިރު ވެސް އޭނާ ދިރިހުރި ކަމުގެ ނިޝާނެއް ފެންނަން ނެތް ކަމަށް ތަހުގީގު ޓީމުން ބުނެފައިވެއެވެ. އޭނާގެ ގައިގެ 8 ތަނަކަށް ތޫނު އެއްޗަކުން ހަމަލާ ދީފައިވާ ކަމަށް ފުލުހުންގެ ތަހުގީގަށް ފާހަގަކުރެވިފައިވާ ކަމަށް ވެސް ބުނެފައިވެއެވެ.