އަސްލަމަށް އަނިޔާކުރި ކަމަށް ބުނެ ފަތުރަނީ ދޮގު ޚަބަރެއް: ކަރެކްޝަންސް
އަސްލަމްގެ ބޮލަށް ގެއްލުން ލިބުނީ އޭނާ އިށީނދެ އިންދައި ވެއްޓުމާއި ގުޅިގެން
މޯލްޑިވްސް ކަރެކްޝަނަލް ސަރވިސް
ހުޅުމާލެ ޖަލުގައި، 3 އަހަރުގެެ ހުކުމެއް ތަންފީޒު ކުރަމުންދިޔަ ގދ. ވާދޫ/ ޖަނަވަރީގެ މުޙައްމަދު އަސްލަމް ހޯމަ ދުވަހުގެ ރޭ ނިޔާވުމާއި ގުޅިގެން އަސްލަމަށް އަނިޔާކޮށްފައިވާ ކަމަށް ބުނެ އާއިލާއާ ހަވާލާދީ ފަތުރާ ޚަބަރަކީ ސައްހަ މައުލޫމާތެއް ނޫން ކަމަށް މޯލްޑިވްސް ކަރެކްޝަނަލް ސަރވިސް އިން ބުނެފިއެވެ.
މިކަމާއި ގުޅިގެން އަންގާރަ ދުވަހު ކަރެކްޝަންސް އިން ނެރުނު ބަޔާނެއްގައި ބުނީ ސެޕްޓެމްބަރު 13 ވަނަ ދުވަހުގެ ރޭ ގާތްގަޑަކަށް 18:00 ހާއިރު އަސްލަމް ޔާޑު ސަރަަހައްދުގައި އިށީނދެގެން އިންދާ ކުއްލިއަކަށް ވެއްޓުމާއި ގުޅިގެން 8 މިނެޓް ތެރޭ އެމަރޖެންސީ ހާލަތުގައި ހުޅުމާލެ ހޮސްޕިޓަލަށް ގެންގޮސް ފަރުވާދޭން ފެށި ކަމަށެވެ. އަދި އާއިލާއަށް 18:30 ގައި ގުޅުމަށް މަސައްކަތްކޮށް، ގުޅިފައިވަނީ 18:42 ހާއިރު ކަމަށެވެ. އޭނާ އަކީ އެއްވެސް ބޮޑު ބައްޔަކަށް ބޭސްފަރުވާ ކުރަމުންދިޔަ މީހެއް ނޫން ކަމަށާއި އަސްލަމްގެ ބޮލަށް ގެއްލުން ލިބުނީ އޭނާ އިށީނދެ އިންދައި ވެއްޓުމާއި ގުޅިގެން ކަމަށް ވެސް ކަރެކްޝަންސް އިން ބުންޏެވެ. އަދި މަންޒަރު ހުޅުމާލެ ޖަލުގެ ސީސީޓީވީ ފުޓޭޖުން ސާފުކޮށް ފެންނަ ކަމަށް ވެސް ވަނީ ބުނެފައެވެ.
ހުޅުމާލެ ހޮސްޕިޓަލުން އަސްލަމަށް ފަރުވާ ދިނުމަށްފަހު އޭނާ ނިޔާވި ކަމަށް އަންގާފައިވަނީ 20:23 ގައި ކަމަށާއި މަރުގެ ސެޓްފިކެޓްގައި މަރުގެ ސަބަބު ދެނެގަނެފައި ނުވާ ކަމަށާއި ނިޔާވެފައިވާ ވަގުތަކީ 18:55 ކަމަށް ބަޔާންކޮށްފައިވާ ކަމަށް ވެސް ކަރެކްޝަންސް އިން ބުންޏެވެ. ކަރެކްޝަންސް އިން އިތުރަށް ބުނީ މި ހާދިސާއާ ގުޅިގެން ސެޕްޓެމްބަރު 13 ވަނަ ދުވަހުގެ ރޭ އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށް އަންގާފައިވާ ކަމަށާއި އަދި އެ ފަރާތްތަކުން ހޯދުމަށް އެދޭ އެންމެހާ މައުލޫމާތު ފޯރުކޮށްދެމުންދާއިރު އިންޓަރނަލް ތަހުގީގެއް ވެސް ފަށާފައިވާ ކަމަށެވެ.
ކަރެކްޝަންސް އިން ބުނީ އަސްލަމަށް އަނިޔާ ދީފައިނުވާ ކަމަށާއި ހަގީގަތް އޮޅޭފަދަ ގޮތްގޮތަށް ޚަބަރުތައް ފަތުރަމުންދާތީ އެކަމާ މެދު އެ ސަރވިސް އިން ކަންބޮޑުވާ ކަމަށެވެ. މުޙައްމަދު އަސްލަމަކީ މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޒު ކުރަމުންދިޔަ މީހެކެވެ. ބޮޑު ބައްޔަކަށް ބޭސްފަރުވާ ކުރަމުންދިޔަ މީހެއް ނޫންކަމަށްވެސް ކަރެކްޝަންސް އިން ބުނެއެވެ.
