އިންތިޚާބަކާނުލާ ހޮވޭ ކެންޑިޑޭޓުންގެ ލިސްޓް ދެދުވަސްތެރޭގައި އިއުލާން ކުރާނެ - ހަސަން ލަތިފް
ހަސަން ލަތީފް - އެމްޑީޕީގެ ޗެއަރޕާސަން
އެމްޑީޕީގެ އެތެރޭގެ އިންތިޚާބުގައި ވާދަކުރާ ކެންޑިޓޭޓުންގެ ތެރެއިން އިންތިޚާބަކާ ނުލާ ހޮވޭ ކެންޑިޑޭޓުންގެ ލިސްޓް ދެދުވަސްތެރޭގައި އިއުލާން ކުރައްވާނެ ކަމަށް އެމްޑީޕީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
އިންތިޚާބާ ބެހޭ އެންމެ ފަހުގެ މައުލޫމާތު ހިއްސާކުރެއްވުމަށް އެމްޑީޕީގެ އޮފީހުގައި އޮތް ނޫސްވެރިންގެ ބައްދަލުވުމުގައި ހަސަން ލަތީފް ވިދާޅުވީ، އިންތިޚާބުގެ ކަންކަން ވަރަށް ފުރިހަމައަށް ކުރިއަށްދާ ކަމަށެވެ. އަދި މި އިންތިޚާބަކީ ވެސް ފޯރިގަދަ އިންތިޚާބަކަށް ވެގެންދާނެ ކަމުގެ ޔަގީންކަން އެބައޮތް ކަމަށެވެ. މިހާރު ކުރިއަށްދަނީ އިންތިޚާބަށް އޮފިޝަލުން ހޮވުމުގެ މަސައްކަތް ކަމަށާއި، ކޮންމެ ރަށެއްގައި ވޯޓު ފޮށްޓެއް ބަހައްޓާއިރު، ރަށްރަށުގައި ތިބި އެމްޑީޕީ މެމްބަރުންގެ ފަރާތުން މިކަމުގައި އެއްބާރުލުން ބޭނުންވާ ކަމަށް ވިދާޅުވިއެވެ. ދާއިރާތަކުގައި ވާދަކުރައްވާ ކެންޑިޑޭޓުންގެ ތެރެއިން އެއް ކެންޑިޑޭޓަކު ކުރިމަތިލައްވާފައިވާ ދާއިރާތަކުގައި އިންތިޚާބަކާ ނުލާ ގޮނޑި ޔަގީންވާނެ ކަމަށާއި، ލިސްޓް ދެދުވަސްތެރޭގައި އާއްމު ކުރައްވާނެ ކަމަށެވެ.
އިންތިޚާބުގައި 733 ކެންޑިޑޭޓުން ވާދަކުރައްވާއިރު، މިހާރު ލިސްޓް އާއްމު ކޮށްފައިވާނެ ކަމަށެވެ. އެތެރޭގެ އިންތިޚާބުގައި ވޯޓު ލުމުގެ ހައްގު ލިބިގެންވާ 93،165 މީހުން އެބަތިބި ކަމަށާއި، ޝަކުވާ ހުށަހެޅުމަށް ހުޅުވާލި ފުރުސަތުގައި ލިބުނު ޝަކުވާ ތަކަށް ބަލުމަށްފަހު މި މަހުގެ 11 ވަނަ ދުވަހު ފައިނަލް ލިސްޓް އާއްމު ކޮށްފައިވާނެ ކަމަށް ވިދާޅުވިއެވެ.
ޝަކުވާ ހުށަހެޅުމަށް ހުޅުވާލުމުން ލިބުނު ޝަކުވާތަކަށް ބަލައި، 918 މީހަކު ވޯޓު ލުމުގެ ހައްގު ލިބިފައިވާ މީހުންގެ ލިސްޓުން އުނި ކޮށްފައިވާ ކަމަށް ވެސް ހަސަން ލަތީފް ވިދާޅުވިއެވެ.
ވޯޓާރސް ލިސްޓަށް ޝަކުވާ ހުށަހެޅުމަށް 11 ސެޕްޓެމްބަރުވީ ހޮނިހިރު ދުވަހުން ފެށިގެން 13 ސެޕްޓެމްބަރުވާ ހޯމަ ދުވަހުގެ މެންދަމު 12:00އާ ހަމައަށް ވަނީ ފުރުސަތު ހުޅުވާލާފައެވެ. މިހާރު އާއްމުކޮށްފައިވާ ލިސްޓަކީ 25 އޭޕްރީލް 2021ގައި ލިސްޓަށް ޝަކުވާ ހުށަހެޅުއްވުމަށް ހުޅުވާލެވި، 28 އޭޕްރީލް 2021ގައި ޝަކުވާ ހުށަހެޅުއްވުމަށް ވަގުތު އިތުރުކޮށް, ދެވުނު ފުރުސަތުގައި ޝަކުވާ ހުށަހެޅި ބޭފުޅުންގެ ޝަކުވާތައް ބަލައި ގެންނަންޖެހޭ ބަދަލުތައް ގެނައުމަށްފަހު އާންމު ކޮށްފައިވާ ދާއިމީ ލިސްޓު ކަމަށް އެމްޑީޕީން ބުނެފައިވެއެވެ.
އެމްޑީޕީން ބުނީ މި ބަދަލުތައް ގެނައުމަށްފަހު މިހާރު އާންމުކޮށްފައިވާ ލިސްޓަށް ޝަކުވާ ހުށަހެޅުމަށް ހުޅުވާލާފައިވާއިރު، ޝަކުވާ ހުށަހެޅުމުގެ ފޯމު މެދުވެރިކޮށް ޝަކުވާ ހުށަހެޅޭނެ ކަމަށެވެ. އަދި ޝަކުވާ ހުށަހަޅާއިރު، ކުރިން ޝަކުވާ ހުށަހަޅަން ބޭނުން ކުރި އައިޑީކާޑު ނަންބަރު ބޭނުންކޮށްގެން މިފަހަރުވެސް ޝަކުވާ ހުށަހެޅޭނެ ކަމަށެވެ. އެހެން ގޮތްގޮތުން ފޮނުވާ ޝަކުވާ ބަލައިނުގަނެވޭނެ ކަމަށް އެމްޑީޕީން ބުނެފައިވެއެވެ.
އެމްޑީޕީގެ ދާއިރާތަކުގެ އިންތިޚާބު 25 ސެޕްޓެމްބަރު ވާ ހޮނިހިރު ދުވަހު ބޭއްވުމަށް އެ ޕާޓީން ވަނީ ނިންމާފައެވެ. އެމްޑީޕީން، ކުރިން ދާއިރާތަކުގެ އިންތިޚާބު ބޭއްވުމަށް ނިންމީ މެއި މަހުގެ ތެރޭގައެވެ. އެހެންނަމަވެސް ފަހުން ވަނީ ސެޕްޓެމްބަރަށް ފަސްކޮށްފައެވެ.
އެމްޑީޕީން މިނިންމުން ނިންމީ ޕާޓީގެ ރައީސް، ރައީސް މުޙައްމަދު ނަޝީދުގެ ފުރާނަފުޅު ދުއްވާލުމަށް ނުރައްކާތެރި ޓެރަރިސްޓް ހަމަލާއެއްދީ، އެމަނިކުފާނުގެ ހާލުކޮޅު ސީރިއަސްވެ، އެމަނިކުފާނު ފަރުވާ ހޯއްދަވަމުން ގެންދަވާތީ ދާއިރާތަކުގެ އިންތިޚާބު 29 މެއި 2021ގައި ބޭއްވުމަކީ ރަނގަޅު ކަމެއް ކަމުގައި ނުފެންނާތީއެވެ.
