ވަރަށް އަވަހަށް ބޮމެއް ގޮއްވާލާނެކަމަށް ލިޔެފައިވާ މައްސަލައެއް ބަލަނީ

ރާއްޖޭގައި އިތުރު ބޮމެއް ގޮއްވާލާނެކަމުގެ އިންޒާރު ދީފައިވާ މައްސަލައެއް ފުލުހުން ބަލަން ފަށައިފިއެވެ.

މި އިންޒާރު ދީފައިވަނީ ކޮން ބައެއްކަން އަދި ސާފެއް ނުވެއެވެ. ނަމަވެސް ނޫރު މިސްކިތުގެ ތަނބެއްގައި އެފަދަ އިންޒާރުތަކެއް ލިއެފައިވުމާ ގުޅިގެން އެ ތަން ބަންދުކޮށް، އާދިއްތަ ދުވަހު ފުލުހުން ޙަރަކާތްތެރިވެފައިވެއެވެ.

މި ލިއުމުގައި ބުނެފައިވަނީ "މި ތަނުގައި ގަދަވާނީ ބަންގާޅީން" ކަމަށާއި، ބޭނުން ގޮތެއް ހަދާނެ ކަމަށެވެ. އަދި ވަރަށް އަވަހަށް ބޮމެއް ގޮއްވާލާނެކަމަށާއި، ދިވެހި ޤައުމު ސުންނާފަތި ކޮށްލާނެކަމަށް މި ލިއުމުގައި ބުނެފައިވެއެވެ. އެކަމާ ގުޅޭ ގޮތުން ފުލުހުންގެ މީޑިއާ އޮފިޝަލު ވިދާޅުވީ، މި މައްސަލައާ ގުޅިގެން ބަލަންޖެހޭ ކަންކަން ފުލުހުން ބަލަމުން ގެންދާ ކަމަށެވެ.

މެއި 6 ގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްްޓު ޙަމަލާއަށްފަހު، ރާއްޖޭގެ އެކި ކަންކޮޅުތަކުގައި ސަލާމަތީ ބާރުތަކުން ގެންދަނީ ޚާއްސަ އޮޕަރޭޝަންތަކެއް ހިންގަމުންނެވެ. އަދި މި ޙަމަލާއަށްފަހު، ޚާއްސަ އިސްކަމެއް ދީގެން މިފަދަ ކަންކަން އެމްއެންޑީއެފުން ގެންދަނީ ބަލަމުންނެވެ. އެގޮތުން މާލޭގެ ރަށްދެބައިމަގުގައި ހުންނަ ބިހުރޯޒުކަމަނާ މިސްކިތުގެ ތެރޭގައި ގޮތްނޭނގޭ އެއްޗެއް އޮވެގެން ދާދި ފަހުން ސިފައިން އެ ސަރަޙައްދު ބަލާފައިވާއިރު، ސުޕްރީމް ކޯޓު ސަރަޙައްދުގައި އޮތް ކާރެއް ފެނިގެން ވެސް ސިފައިން ހަރަކާތްތެރިވެފައިވެއެވެ. ނަމަވެސް އެ ދެ ފަހަރުވެސް ގެއްލުމެއްވާ ޒާތުގެ އެއްޗެއް ފެނިފައެއް ނުވެއެވެ.