ޕްރިމިއާ ލީގުގައި ކުޅޭ ބްރެޒިލުގެ ކުޅުންތެރިން ސަސްޕެންޑްކޮށްފި

އިނގިރޭސި ޕްރިމިއާ ލީގުގައި ކުޅޭ ބްރެޒިލުގެ ކުޅުންތެރިން ސަސްޕެންޑްކުރަން ދުނިޔޭގެ ފުޓްބޯޅައިގެ މައި އިދާރާ، ފީފާއިން ނިންމައިފިއެވެ.

އިންގްލެންޑުން ކަނޑައަޅާފައިވާ ރެޑް ލިސްޓުގައި އޮތް ގައުމުތަކުގެ ތެރޭގައި ބްރެޒިލް ހިމެނޭއިރު، އެ ގައުމަށް ގޮސްފައި އެނބުރި އިންގްލެންޑަށް އައިސް 10 ދުވަހުގެ ކަރަންޓީނެއް ވާން ޖެހެއެވެ. އެހެންކަމުން މި ފަހަރުގެ ބައިނަލްއަގުވާމީ ބްރޭކުގައި ކުޅުނު ފީފާ ވޯލްޑް ކަޕުގެ ދެކުނު އެމެރިކާ ކޮލިފައިން މެޗުތަކަށް ޕްރިމިއާ ލީގުގެ ކުލަބުތަކުން ބްރެޒިލުގެ ކުޅުންތެރިން ދޫކޮށްފައެވެ.

ގައުމީ ޓީމަށް ކުލަބުތަކުން ބްރެޒިލުގެ ކުޅުންތެރިން ދޫކޮށްފައި ނުވާއިރު، މީގެ ކުރިން ފީފާއިން ވަނީ ގައުމީ ޓީމަށް ކުޅުންތެރިން ދޫކުރަން އިލްތިމާސްކޮށްފައެވެ. ފީފާގެ ގަވާއިދުގައިވާ ގޮތުން ކުލަބަކުން ގައުމީ ޓީމަށް ކުޅުންތެރިއަކު ދޫކުރަން ދެކޮޅު ހަދައިފިނަމަ، އެ ގައުމެއްގެ ފުޓްބޯޅަ އެސޯސިއޭޝަނުން އެދުމުން އެ ކުޅުންތެރިއަކު ފަސް ދުވަހުގެ މުއްދަތަކަށް ސަސްޕެންޑްކުރެވެއެވެ. އެއާއެކު ބުދަ ދުވަހު ބްރެޒިލުގެ ފުޓްބޯޅަ ފެޑެރޭޝަނުން ވަނީ ޕްރިމިއާ ލީގުގެ ކުލަބުތަކަށް ފިޔަވަޅު އަޅައި ދިނުމަށް ނިންމާފައެވެ.

އެހެންކަމުން ފީފާއިން މިހާރު ވަނީ އެ ކުޅުންތެރިންނަށް މި މަހު 10 ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށް ކުލަބު ފެންވަރުގެ މެޗެއް ނުކުޅެވޭ ގޮތަށް ސަސްޕެންޑްކޮށްފައެވެ. ފީފާގެ މި ސަސްޕެންޝަނަށް އަމަލުކުރަން ޖެހޭ ބްރެޒިލުގެ ކުޅުންތެރިންނަކީ ލިވަޕޫލުގެ ގޯލްކީޕަރު އެލިސަން ބެކާ އާއި، މިޑްފީލްޑަރު ފަބީނިއޯ އާއި، ފޯވާޑް ރޮބާޓޯ ފިރްމީނޯ އާއި، މެންޗެސްޓާ ސިޓީގެ ގޯލްކީޕަރު އެޑަސަން އާއި، އެ ޓީމުގެ ފޯވާޑް ގަބްރިއެލް ޖީސޫސް އަދި ޗެލްސީގެ ޑިފެންޑަރު ތިއާގޯ ސިލްވާ އާއި، މެންޗެސްޓާ ޔުނައިޓެޑުގެ މިޑްފީލްޑަރު ފްރެޑާއި، އެވަޓަންގެ ފޯވާޑް ރިޗާލިސަންގެ އިތުރުން ލީޑްސް ޔުނައިޓެޑުގެ މިޑްފީލްޑަރު ރަފީނިއާއެވެ.

މި ފަހަރުގެ ބައިނަލްއަގުވާމީ ބްރޭކަށް ޕްރިމިއާ ލީގުގެ ކުލަބުތަކުން ބްރެޒިލުގެ ކުޅުންތެރިން ދޫނުކުރަން ނިންމި ނަމަވެސް، ޕްރިމިއާ ލީގުގައި ކުޅޭ އާޖެންޓީނާގެ ހަތަރު ކުޅުންތެރިއަކު ވަނީ ކުލަބުތަކުން ހުއްދަދިނުމުން ކޮލިފައިން މެޗުތަކުގައި ކުޅެފައެވެ. އެގޮތުން ކޮލިފައިންއަށް އާޖެންޓީނާއިން އެކުލަވާލި ސްކޮޑުގައި ޕްރިމިއާ ލީގުގެ ހަތަރު ކުޅުންތެރިއަކު ހިމެނުނެވެ. އެއީ ޓޮޓެންހަމް ހޮޓްސްޕާއަށް ކުޅެމުން އަންނަ ޖިއޮވާނީ ލޮ ސެލްސޯ އާއި، ކްރިސްޓިއަން ރޮމޭރޯ އަދި އެސްޓަން ވިލާގެ ގޯލްކީޕަރު އެމިލިއާނޯ މާޓީނޭޒް އަދި އެމީ ބުއެންޑީއާއެވެ.

އެކަމަކު ކޮލިފައިންގައި ބްރެޒިލާއި އާޖެންޓީނާ ބައްދަލުކުރި މެޗަށް މި ކުޅުންތެރިން ބްރެޒިލަށް ދިޔުމާއެކު، އެ މެޗު ފެށިތާ ފަސް މިނެޓު ތެރޭ ފުލުހުންނާއެކު ސިއްހީ އޮފިޝަލުން ވަނީ ދަނޑަށް އަރައި މެޗު ހުއްޓުވާފައެވެ. އެއާއެކު އެ މެޗު ސަސްޕެންޑްކުރިއިރު، ފީފާގެ ޑިސިޕްލިނަރީ ކޮމިޓީން އަންނަނީ އެ މައްސަލަ ތަހުގީގުކުރަމުންނެވެ.

އާޖެންޓީނާގެ ފުޓްބޯޅަ އެސޯސިއޭޝަނުން ހާމަކޮށްފައިވާ ގޮތުން ބްރެޒިލުގެ ކަރަންޓީން އުސޫލާ ޚިލާފުވި ހަތަރު ކުޅުންތެރިން މިހާރު ވަނީ އެނބުރި އިންގްލެންޑަށް ދިޔުމަށް ނިންމާފައެވެ. އޭގެ ތެރެއިން މާޓިނޭޒާއި ބުއެންޑީއާ ނިންމާފައިވަނީ އިންގްލެންޑަށް އައުމުގެ ކުރިން ކްރޮއޭޝިއާގައި ވަކި މުއްދަތެއް ވަންދެން ތިބުމަށް ކަމަށް ރިޕޯޓުތައް ބުނެއެވެ. އެކަމަކު އިންގްލެންޑުގެ ކަރަންޓީނު އުސޫލުތަކާ ގުޅިގެން އެ ހަތަރު ކުޅުންތެރިންނަށްވެސް މި ހަފުތާ ބަންދުގައި ކުޅޭ ޕްރިމިއާ ލީގުގެ މެޗުތައް ގެއްލޭނެއެވެ.