އަންހެނުން ބާރުވެރިކުރުވުމުގެ ގަވައިދުތަކާއި އެކްޝަން ޕްލޭން ތަންފީޒުވުމާއެކު, ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ބާރުތަކެއް ލިބިގެންދާނެ ކަމަށް ޖެންޑަރ މިނިސްޓަރ ޢާއިޝަތު މުޙައްމަދު ދީދީ ވިދާޅުވެއްޖެއެވެ.

މިއަހަރުގެ ރެހެންދި އެވޯޑް ޙަފްލާގައި ވާހަކަދައްކަވަމުން ޖެންޑަރ މިނިސްޓަރ ވިދާޅުވީ, އަންހެނުން ބާރުވެރިކުރުވުމާއި ހަމަހަމަ ފުރުސަތު ހޯދައިދިނުމަށް، މިކަމާގުޅޭ ޤާނޫނުތައް ތަންފީޒުކޮށް, ގަވައިދުތައް އެކުލަވާލައި، ޖެންޑަރ އީކުއަލިޓީ އެކްޝަން ޕްލޭނެއް އެކުލަވާލުމުގެ މަސައްކަތް މިހާރު ފަށާފައިވާކަމަށެވެ. މި ގަވައިދުތަކާއި އެކްޝަން ޕްލޭން އެކުލަވާލައި ތަންފީޒުކުރެވުމާއެކު ލާމަރުކަޒީ އުސޫލުން މިންތީގެ ހަމަހަމަކަން ޤާއިމްކުރުމަށް, ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ބާރުތަކެއް ލިބިގެންދާނެ ކަމަށް މިނިސްޓަރ ވިދާޅުވިއެވެ.

މި ބާރުތައް ދިނުމުގެ މަސައްކަތް ކުރުމަށްޓަކައި، ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ބޭނުންވާ ތައުލީމާއި ތަމްރީނާއި ޤާބިލުކަން ހޯދައިދިނުމަށް މަސައްކަތްކޮށްދޭނެ ކަމުގެ ޔަގީންކަން މިނިސްޓަރ ވަނީ ދެއްވާފައެވެ.

މީގެ އިތުރުންވެސް ޖެންޑަރ އީކުއަލިޓީ ގާނޫނުގައިވާ ކަންކަން ތަންފީޒުވުމުން, ހަމަހަމަކަން ޤާއިމްކުރެވުމާއި, ރާއްޖެއިން ބައިވެރިވާ މުއާހަދާތައް އިތުރުވުމާއި، ދެމެހެއްޓެނިވި ތަރައްގީގެ ލަނޑުދަނޑިތަކުގައި ހުރި ކަންކަން ހާސިލްކުރެވޭނެ ކަމަށް މިނިސްޓަރ ވިދާޅުވިއެވެ. މިކަން ކުރެވޭނީ ހުރިހާ ދާއިރާއަކުންވެސް އަންހެނުންނަށް ފުރުސަތުތައް ފަހިކޮށްދީ، މިކަމުގައި ގެންގުޅޭ ވިސްނުން ބަދަލުކޮށްގެން ކަމަށާއި, އަދި ތުއްތު އިރުން ފެށިގެން ކުއްޖާގެ ގައިގައި ހުރި ހުނަރުތައް ދެނެގަނެގެން ކަމަށް މިނިސްޓަރ ވަނީ ވިދާޅުވެފައެވެ. މި ލަނޑުދަނޑިތަކާއެކު ޖެންޑަރ އީކުއަލިޓީ އެކްޝަން ޕްލޭން ތަންފީޒުކުރުމަށް މުޅި މުޖުތަމަޢު ގުޅިގެން މަސައްކަތްކޮށްދިނުމަށް މިނިސްޓަރ ވަނީ އެދިވަޑައިގެންފައެވެ.

މިއަހަރު ރެހެންދި އެވޯޑް ދިނުމަށް ބޭއްވި ޙަފްލާގައި ވަނީ 2020 ވަނަ އަހަރު އަދި 2021 ވަނަ އަހަރު ރެހެންދި އެވޯޑް ހާސިލްކުރި އަންހެނުންނަށް އެވޯޑް ދީފައެވެ. 2020 ވަނަ އަހަރުގެ ރެހެންދި އެވޯޑް ލިބިފައިވަނީ ފާޠިމަތު އިބްރާހީމް, މަރިޔަމް ޝުނާނާ, ޢާއިޝަތު ޙުސައިން މަނިކު, އަމީނާ ނަޢީމް, ޙައްވާ ލަޠީފް, މިންޙާ ފާއިޒު އަދި ޝިފްޒާ މުސްޠަފާއަށެވެ. 2021 ވަނަ އަހަރުގެ އެވޯޑް ލިބިފައިވަނީ އަހުމީމާ ލުޠުފީ, އާމިނަތު ޝާހާ ހާޝިމް, ޒީނިއާ އަޙުމަދު ޙަމީދު, ނާދިޔާ ޢަބްދުލްޣަފޫރު, ޙައްވާ ރާމިޒާ, ސަރޖަންޓް ފަސްޓް ކްލާސް ނަސްރީނާ ޙަސަން, ޝިޔާމާ އަޙުމަދު އަދި ފޮނަދޫ އަންހެނުންގެ ތަރައްޤީއަށް މަަސައްކަތް ކުރާ ކޮމެޓީއަށެވެ.