މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ފަރާތުން ޒުވާނުނަނަށް ޚާއްސަކޮށްގެން ސްކޮލަރޝިޕްތަކެއް ތައާރަފް ކޮށްފިއެވެ.

އެމްޕީއެލްއިން ތައާރަފްކުރި ސްކޮލަރޝިޕްތަކާއި ގުޅޭގޮތުން މޯލްޑިވްސް ނޭޝަނަލް ޔުނިވަރސިޓީ(އެމްއެންޔޫ)ގެ ދަރިވަރުންނަށް މައުލޫމާތު ދިނުމުގެ ސެޝަނެއް ވެސް އާދިއްތަ ދުވަހު ވަނީ ކުރިއަށް ގެންގޮސްފައެވެ.

އެމްޕީއެލް ޕޯޓްސް ޓްރެއިނިންގް ސެންޓަރުގެ ހެޑް ނީޝާ ޚަލީލް ވިދާޅުވީ ތަފާތު ދާއިރާތަކުން ސްކޮލަރޝިޕްތަކަށް ހުޅުވާލާފައިވާކަމަށެވެ. މުޅިއެކު 5 ދާއިރާއަކުން ސްކޮލަރޝިޕް ދޭން ނިންމާފައިވާއިރު، އެ ދާއިރާތަކަކީ ބެޗްލާސް ޑިގްރީ އިން މެރިޓައިމް އެންޑް ލޮޖިސްޓިކްސް، ބެޗްލާސް ޑިގްރީ އިން މެރިޓައިމް އޮޕަރޭޝަންސް، ބެޗްލާސް ޑިގްރީ އިން އޮކިއުޕޭޝަނަލް ސޭފްޓީ އެންޑް ހެލްތް، ބެޗްލާސް ޑިގްރީ އިން ނަވަލް އާކިޓެކްޗާރ އަދި އެސޯސިއޭޝަން އޮފް ޗާޓާޑް ސެޓިފައިޑް އެކައުންޓެންޓްސްއެވެ.

ނީޝާ ވިދާޅުވީ ކޯސް ހަދާ ދުވަސްވަރު ހިނގާ ހުރިހާ ޚަރަދެއް އެމްޕީއެލުން ބަލަހައްޓާނެ ކަމަށެވެ. ޗުއްޓީ ދުވަސްވަރު ރާއްޖެ އަންނަން ބޭނުންނަމަ ޓިކެޓަށް ދާ ޚަރަދުވެސް އެމްޕީއެލުން ކަވަރު ކުރާނެ ކަމަށް ނީޝާ ވިދާޅުވިއެވެ. މީގެ އިތުރުން، މިކޯސްތައް ނިމުމުން އެމްޕީއެލްގެ ފަރާތުން ދަރިވަރުންނަށް ވަޒީފާ ލިބޭނެކަމުގެ ޔަގީންކަންވެސް ނީޝާ ވަނީ ދެއްވާފައެވެ.

މީގެ އިތުރުން، އެމްޕީއެލްގެ އެސިސްޓެންޓް ޖެނެރަލް މެނޭޖަރ އަހުމަދް އާތިފް ވިދާޅުވީ މި ކޯސްތައް ބޮޑަށް އަމާޒުވެފައިވަނީ އޭލެވެލް ނިންމައިފައިވާ ކުދިންނަށް ކަމަށެވެ. މި ކޯސްތަކަށް ހުށަހެޅުމުގެ ފުރުސަތު ސެޕްޓެމްބަރ މަހު 21 ވަނަ ދުވަހުގެ ނިޔަލަށް ހުޅުވާލާފައިވާ ކަމަށާއި، ސްކޮލަރޝިޕްތަކަށް ގިނަ އަދަދެއްގެ މީހުން ކުރިމަތިލާނެކަމަށް އުންމީދު ކުރާކަމަށް އާތިފް ވިދާޅުވިއެވެ. ސްކޯލާޝިޕްތަކުގެ އިތުރުން އެހެނިހެން ޕްރޮގްރާމުތައް ވެސް އެ ކުންފުނިން ރާވައި ކުރިއަށް ގެންދާނެ ކަމަށް އާތިފް ވިދާޅުވިއެވެ.