ޓްރެވަލް އެޖެންސީ ގަވާއިދާއެކު، ޓްރެވަލް އެޖެންޓުންނަށް ފައިދާތަކެއް ވާނެ - ރިފްޢަތު
4 ސެޕްޓެމްބަރު 2021 | ހޮނިހިރު 17:16ޕެންޑަމިކްގެ ސަބަބުން އެންމެ ބޮޑު ގޮންޖެހުމެއް ދިމާވީ ފަތުރުވެރިކަމުގެ ޞިނާޢަތަށް
ރާއްޖެއަށް ޒިޔާރަތްކުރި ފަތުރުވެރިންތަކެއް
ޓްރެވަލް އެޖެންސީގެ ގަވާއިދު ފަރުމާ ކުރުމުގެ މަސައްކަތް ފަތުރުވެރިކަމާބެހޭ ވުޒާރާއިން ފަށާފައިވާ ކަމަށާއި، އެ ގަވާއިދާއެކު ރާއްޖޭގެ ޓްރެވަލް އެޖެންޓުންނަށް ފައިދާތަކެއް ވާނެކަމަށް ގަބޫލުކުރައްވާ ކަމަށް އެސޯސިއޭޝަން އޮފް ޓްރެވަލް އެޖެންސީގެ ރައީސް އަދި ކެޕިޓަލް ޓުއަރސްގެ މެނޭޖިންގ ޑިރެކްޓަރު ޔޫސުފް ރިފްޢަތު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ވާހަކަ ދައްކަމުން ރިފްޢަތު ވިދާޅުވީ، ކޮވިޑް-19 ގެ ޕެންޑަމިކާއެކު އެންމެ ބޮޑު ގެއްލުމަކާ ކުރިމަތިލާން ޖެހުނީ ހޮސްޕިޓަލިޓީ އިންޑަސްޓްރީއަށް ކަމަށާއި، އެގޮތުން ކޮވިޑާއިއެކު މުޅި ޞިނާޢަތް ހުއްޓުމަކަށް އައި ކަމަށެވެ. ނަމަވެސް ސަރުކާރުން އެޅި ފިޔަވަޅުތަކާއި، ފަތުރުވެރިކަމުގެ ޞިނާޢަތުގައި ހަރަކާތްތެރިވާ ފަރާތްތަކަށް ދެއްވި އެހީއާއެކު ޕެންޑަމިކުގެ ސަބަބުން ކުރިމަތިލާން ޖެހުނު ގެއްލުންތަކުން އަރައިގަތުމަށް ފަސޭހަވިކަމަށެވެ.
ރިފްޢަތު ވިދާޅުވީ ޕެންޑަމިކާއެކު، ރިސޯޓުތަކުން ޓާގެޓުކުރީ ޓްރެވަލް އެޖެންސީތަކުގެ ބަދަލުގައި އޮންލައިން ޕްލެޓްފޯމަށް ކަމަށާއި، އޭގެ ސަބަބުން ރާއްޖޭގެ ޓްރެވަލް އެޖެންޓުންނަށް އޭގެ ގެއްލުމާ ކުރިމަތިލާން ޖެހުނު ކަމަށެވެ. އަދި މިހާރުވެސް ބައެއް ރިސޯޓުތަކުން އޮންލައިން ޕްލެޓްފޯމް ބޭނުން ކުރަމުން އަންނަ ކަމަށާއި، އެކަމުގެ ހައްލަކީ ޓްރެވަލް އެޖެންސީ ގަވާއިދު ކަމަށް ގަބޫލު ކުރައްވާ ކަމަށެވެ.
ރިފްޢަތު ވިދާޅުވީ ކޮވިޑްގެ ހާލަތާއެކު ފަތުރުވެރިކަމުގެ ޞިނާޢަތުން ކުރިމަތިލާން ޖެހުނު ގޮންޖެހުންތަކުން އަރައިގަތުމުގައި ފަތުރުވެރިކަމާބެހޭ ވަޒީރު ޑރ. ޢަބްދުﷲ މަޢުޞޫމް ގިނަ މަސައްކަތްތަކެއް ކުރެއްވި ކަމަށެވެ. އެގޮތުން މި ޞިނާޢަތުގައި ހުރި ގޮންޖެހުންތަކުން އަރައިގަތުމަށް ކުރެވިދާނެ ކަންކަމާ ގުޅޭގޮތުން މުޅި ޞިނާޢަތުގައި މަސައްކަތްކުރާ އެސޯސިއޭޝަންތަކާ ބައްދަލުކުރައްވައި ހުރިހާ ފަރާތްތަކެއްގެ ޚިޔާލު ހޯއްދަވާ ކަމަށް ރިފްޢަތު ވިދާޅުވިއެވެ.
