ގްރޭޑް 1ގެ ގުރުއާން ފޮތުން ކުށެއް ރަނގަޅުކުރަނީ
ކުށް ރަނގަޅުކުރުމުގެ މަސައްކަތް ނޭޝަނަލް އިންސްޓިޓިއުޓް އޮފް އެޑިއުކޭޝަނުން ވަނީ ފަށާފައި
ގްރޭޑް 1 ގެ ގުރުއާން ފޮތުގައި އިން ކުށް
ގްރޭޑް 1ގެ ގުރުއާން ފޮތުގައި ގުރުއާނުގެ އާޔަތެއް ނުބައިކޮށް ލިޔެވިފައިވާތީ އެކަން ހައްލުކުރުމުގެ މަސައްކަތް ފަށައިފިއެވެ.
އެޑިއުކޭޝަން މިނިސްޓްރީން ބުނީ ގްރޭޑް 1ގެ ގުރުއާން މާއްދާގެ ދަރިވަރުންގެ ފޮތް ޗާޕުކުރިއިރު، ދެ ސޫރަތެއްގެ އާޔަތްތައް އެކުވެފައިވާކަން މި މިނިސްޓްރީއަށް ފާހަގަވެފައިވާކަމަށެވެ. މިކަން ފާހަގަވި ހިސާބުން ފެށިގެން އެކަން ހައްލު ކުރުމުގެ މަސައްކަތް ނޭޝަނަލް އިންސްޓިޓިއުޓް އޮފް އެޑިއުކޭޝަނުން ފަށާފައިވާ ކަމަށް ބުނެފައިވެއެވެ.
މި މަސައްކަތުގެ ތެރެއިން މައްސަލަ ޖެހިފައިވާ ސަފްހާ ބަދަލުކުރުމަށްޓަކައި އަމަލު ކުރަންޖެހޭ ގޮތް ސްކޫލްތަކާ ހިއްސާކޮށް، ސްކޫލްތައް މެދުވެރިކޮށް ބެލެނިވެރިންނަށް އަންގަމުން ގެންދާނެ ކަމަށްވެސް އެޑިއުކޭޝަން މިނިސްޓްރީން ބުނެފައިވެއެވެ.
އެޑިއުކޭޝަން މިނިސްޓްރީން ބުނީ މި ފޮތްތައް ޗާޕުކުރުމުގެ ކުރިން އެންއައިއީ އަދި މިނިސްޓްރީ އޮފް އިސްލާމިކް އެފެއާރޒުން ބަލައި ޗެކްކޮށްފައިވާކަމަށެވެ. މި ފޮތުގައި މައްސަލަ ދިމާވި ސަބަބު ދެނެގަތުމަށްވެސް މިހާރު މަސައްކަތް ފަށާފައިވާކަމަށް އެޑިއުކޭޝަން މިނިސްޓްރީން ބުނެފައިވެއެވެ.
މައުލޫމާތު ލިބޭގޮތުގައި ގްރޭޑް 1ގެ ގުރުއާން ފޮތުގައި ފިލާވަޅެއްގެ މެދު ތެރެއިން އެހެން ސޫރަތެއް އިނީ ފެށިފައެވެ. މިކަމާއި ގުޅިގެން ބެލެނިވެރިން ވަނީ ކަންބޮޑުވުން ފާޅުކޮށްފައެވެ.
