ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުގައި ހުކުރު ޚުތުބާ ސިޔާސީ ނުކުރާ ކަމަށާއި، އެފަދަ ވާހަކަތައް ފެތުރުމަކީ ވަރަށް ދެރަ ކަމެއް ކަމަށް އިސްލާމިކް މިނިސްޓަރ ޑރ. އަޙުމަދު ޒާހިރު ޢަލީ ވިދާޅުވެއްޖެއެވެ.
ހުކުރު ދުވަހުގެ ރޭ ޕީޕީއެމް/ޕީއެންސީ ބޭއްވި އަައްޑަނަ ޖަލްސާގައި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަޙުމަދު ޝިޔާމް މިސަރުކާރަށް ވަރަށް ބޮޑަށް ފާޑު ވިދާޅުވެ، ޚުތުބާގައި ސިޔާސީ ކުލަޖެހިފައިވާ ކަމަށް ވިދާޅުވެފައިވެއެވެ. އަދި މިމަހުގެ 3ވީ ހުކުރު ދުވަހު އިއްވި ޚުތުބާއަކީ ސިޔާސީ ޚުތުބާއެއްކަމަށް ވިދާޅުވެފައިވެއެވެ. ޚުތުބާގެ މައުޟޫޢަކީ "އިސްލާމް ދީނުގައި މަަސައްކަތުގެ މަޤާމު"އެވެ.
ޝިޔާމްގެ ވާހަކަތަކާއި ގުޅިގެން ރާއްޖެއެމްވީއަށް މިނިސްޓަރު ޒާހިރު ވިދާޅުވީ ޚުތުބާ ޚާއްސަކުރަނީ މުޖުތަމައުގައި އޮންނަ މައްސަލައަކަށް ކަމަށާއި، އެވަގުތާއި ހާލަތަށް އަބަދުވެސް ބަލާ ކަމަށެވެ. އެގޮތުން އެއިރެއްގައި އޮންނަ މައްސަލައަކާއި، ރައްޔިތުންގެ ކަންބޮޑުވުންތަކާއި އަދި ރައްޔިތުންނަށް އިސްލާމް ދީނުގެ ތަރަހައިގެން ތެރެއިން ދޭން ބޭނުންވާ މެސެޖްތައް ޚުތުބާއިން ދެމުންދާކަން މިނިސްޓަރު ފާހަގަކުރެއްވިއެވެ.
މިއީ މިއުންމަތުގެ ރަސޫލާ މުޙައްމަދުގެފާނުގެ ވެސް އަމަލުކުރެއްވި ގޮތްކަން ފާހަގަކުރައްވައި މިނިސްޓަރު ވިދާޅުވީ މިސަރުކާރުން މިހާތަނަށް ވަކި މައްސަލައެއް ގެނައުމަށް ނުވަތަ ޚުތުބާ ވަކި ގޮތަކަށް ގެނައުމަށް އަންގާފައި ނުވާކަމަށެވެ. އަދި އެކަން މިނިސްޓްރީގެ މަސައްކަތް ކުރާ ޝެއިޚުންނާއި، މުއައްޒަފުންނަށް ރަނގަޅަށް އެނގޭނެ ކަމަށެވެ.
މީގެ އިތުރުން މިނިސްޓަރު ވިދާޅުވީ ވަކި މައުޟޫތަކަކަށް ޚުތުބާ ލިޔެ ތައްޔާރު ކުރީ މީގެ މާކުރިން ކަމަށާއި، އެދުވަސްތައް ފާއިތުވެފައިވާ ކަމަށެވެ. އަދި ކުރީ ސަރުކާރުތަކުން ޚުތުބާ ސިޔާސީ ކޮށްފައިވާ މިނިސްޓަރު ވިދާޅުވިއެވެ. ނަމަވެސް މިހާރު އެކަން ބަދަލުވެ، އެއިރެއްގެ އެންމެ މުނާސަބު ވާހަކަތައް ޚުތުބާގައި ގެންނަ ކަމަށް މިނިސްޓަރު ވިދާޅުވިއެވެ.
މިސަރުކާރުގައި ބަލަމުން މިއަންނަނީ ކޮންމެ ޚުތުބާއެއް ވެސް އެވަގުތާ ގުޅޭ، އެވަގުތުގެ މައްސަލައަކާ ގުޅޭ ޚުތުބާ ދެވޭތޯ. މުހިންމު މައްސަލަތަކެއް ވެއްޖެއްޔާ ހުންނާނެ ތަކުރާރުކޮށްފައި. އެކަމަކު ކުޑަ ބަދަލުތަކެއް ވެސް ގެންނަން. އަނެއްހެން ބަލައިފިއްޔާ ސިޔާސީ މީހުންނޭ ބުންޏަސް އެވަގުތެއްގައި އޮންނަ މައްސަލައަކަށް ވާހަކަ ދައްކަންޏާ އެއީ ސިޔާސީ މައްސަލައެއްކަމަށް މާނަކުރަންޏާ ކުރަންވީ. ޔަގީންކަން އަރުވަން މިސަރުކާރުގައި ޚުތުބާ ސިޔާސީ ނުވާނެކަން.އިސްލާމިކް މިނިސްޓަރ ޑރ. އަޙުމަދު ޒާހިރު ޢަލީ
މިނިސްޓަރު ވިދާޅުވީ ހުކުރު ދުވަހު ޚުތުބާ ކިއުމަކީ ދީނީ ކަމެއް ކަމަށާއި، އެއީ މީހުންގެ ހިތުގައި ވަރަށް ބޮޑު ގަދަރެއް ދެވިފައިވާ ކަމެއް ކަމަށެވެ. މީހުންގެ ހިތުގައި ނަފުރަތު އުފެދި, ހައިބަތު ގެއްލޭ ގޮތަށް ކަންކަން ކުރުމަކީ ވަރަށް ދެރަކަމެއް ކަމަށް މިނިސްޓަރު ވިދާޅުވިއެވެ. އަދި ދީނީ ކަމެއްގައި މިފަދަ ގޮތަކަށް އެއްވެސް މީހަކު އަމަލުކުރުމަކީ ބަލައިގެނެވޭނެ ކަމެއް ނޫން ކަމަށާއި، ސިޔާސީ މަންފާއެއް ހޯދުމަށް ވެސް އެގޮތަށް ކަންތައްތައް ކޮށްގެން ނުވާނެ ކަމަށެވެ.
