ތުރުކީއާއި ރާއްޖެއާ ދެމެދު ދަތުރުފަތުރުގެ ދާއިރާ ކުރިއެރުވުމާއި ގުޅޭ އެއްބަސްވުމެއްގައި ސޮއިކޮށްފިއެވެ.
ޓްރާންސްޕޯޓު މިނިސްޓަރ ތުރުކީއަށް ކުރައްވަމުންގެންދަވާ ދަތުރުފުޅުގައި އެގައުމާއި ރާއްޖެއާ ދެމެދު ވެވުނު "އެއަރ ސަރވިސް އެގްރީމެންޓު" ގައި ދިވެހި ސަރުކާރުގެ ފަރާތުން ސޮއިކުރެއްވީ ޓްރާންސްޕޯޓް މިނިސްޓަރ އައިޝަތު ނަހުލާއެވެ. މި އެއްބަސްވުމުގައި ތުރުކީ ސަރުކާރުގެ ފަރާތުން ސޮއިކުރެއްވީ ޓްރާންސްޕޯޓް މިނިސްޓަރ އާދިލް ކަރިސްމާއިޔޯލު އެވެ.
މި އެއްބަސްވުމާއި ގުޅޭގޮތުން ތުރުކީގެ ޓްރާންސްޕޯޓް މިނިސްޓަރ އާދިލް ވިދާޅުވީ މި އެއްބަސްވުމުގެ ދަށުން ސިވިލް އޭވިއޭޝަންގެ ދާއިރާ އިތުރަށް ތަރައްގީކުރަން މަސައްކަތް ކުރައްވާނެ ކަމަށެވެ. އަދި މި އެއްބަސްވުމާއެކު ދެ ގައުމުގެ ސިވިލް އޭވިއޭޝަންގެ ދާއިރާއިން ދިމާވާ ގިނަ ގޮންޖެހުންތަކަކަށް ހައްލު ލިބިގެންދާނެ ކަމަށް ވިދާޅުވިއެވެ. މީގެ އިތުރުންވެސް މި އެއްބަސްވުމާއެކު ދެގައުމުގެ ގުޅުން އިތުރަށް ބަދަހިވެ، އިގްތިސާދީ ރޮނގުންނާއި ފަތުރުވެރިކަމުގެ ރޮނގުންވެސް ފައިދާ ކުރާނެ ކަމަށް އާދިލް ވިދާޅުވިއެވެ.
މި އެއްބަސްވުމުގައި ސޮއިކުރެއްވުމަށްފަހު ދެ ގައުމުގެ ޓްރާންސްޕޯޓް މިނިސްޓަރުންގެ މެދުގައި ބައްދަލުވުމެއް ބާއްވަވާފައިވެއެވެ. މި ބައްދަލުވުމުގައި ރާއްޖެއާ ތުރުކީއާއި ދެމެދު ވައިގެ ދަތުރުފަތުރުގެ ރޮނގުން އިތުރަށް ގުޅުން ބަދަހިކުރުމާއި ގުޅޭގޮތުން ވަނީ މަޝްވަރާކުރައްވާފައެވެ. އަދި ކަނޑު ދަތުރުފަތުރުގެ ދާއިރާއާއި ގުޅޭގޮތުންވެސް ވަނީ މަޝްވަރާކުރައްވާފައެވެ.
