ޓްރޯލީއެއް ހިފައިގެން އިންޑިއާ މީހަކު މާލޭގެ މަގުމަތީގައި އުޅޭ ފޮޓޯތަކެއް މީސްމީޑީއާގައި ދައުރު ވަމުންދާއިރު އެއީ އެއަރޕޯޓުގެ ޓްރޯލީއެއް ނޫން ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އެމްއޭސީއެލްގެ އޮފިޝަލަކު ވިދާޅުވީ ދައުރު ވަމުންދާ ފޮޓޯތަކުގައި ފެންނަ ޓްރޯލީއަކީ 2019 ވަނަ އަހަރުގެ މެދުތެރޭގައި ޓްރާންސްޕޯޓް މިނިސްޓްރީން އެދިގެން މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ފެރީ ޓަރމިނަލަށް ދީފައިވާ ޓްރޯލީއެއް ކަމަށެވެ.
އަދި އެއީ އެއަރޕޯޓުގެ ޓްރޯލީއެއް ނޫން ކަމަށް ވިދާޅުވިއެވެ. އަދި އެއާޕޯޓުގައި ހުންނަ ޓްރޯލީތައް އެގޮތަށް ބޭނުން ކުރުމަކީ މަނާ ކަމެއް ކަމަށާ އެއަރޕޯޓުން އެގޮތަށް ފަތުރުވެރިއަކުވެސް އަދި މުވައްޒަފަކުވެސް ނުގެންދާނެ ކަމަށެވެ.
ދައުރުވަމުން އަންނަ ފޮޓޯތަކުން ފެނިގެން ދަނީ އިންޑިއާ ބަޔަކު ޓްރޯލީއަށް ފޮށިތަކެއް ލައިގެން މާލޭގެ އަމީނީ މަގުން ހިނގާފައިދާ މަންޒަރެވެ.
