ޖަޕާނުގައި ބޭނުންކުރަމުން އައި މޮޑާނާ ވެކްސިނުން ކަޅުކުލައިގެ އެތިކޮޅުތަކެއް ފެނިއްޖެ

ޖަޕާނުގައި ބޭނުން ކުރަމުން އަންނަ މޮޑާނާ ވެކްސިނުން ކަޅުކުލައިގެން އެތިކޮޅުތަކެއް ފެނި، މޮޑާނާ ކޯވިޑް ވެކްސިންގެ އެއް ބެޗް ބޭނުންކުރުން އެގައުމުގައި ހުއްޓާލާއިފިއެވެ.

ޖަޕާނުގެ ސިއްޙީ އިދާރާތަކުން ބުނީ، މޮޑާނާ ވެކްސިން ފުޅިތަކުގެ ތެރެއިން، ކަޅުކުލައިގެ ކުދި އެތިކޮޅުތަކެއް އެންމެ ފުރަތަމަ ފެނިފައިވަނީ ފާމަސިސްޓަކަށް ކަމަށެވެ. ވެކްސިން ފުޅީގެ ތެރެއިން ކަޅުކުލައިގެ އެތިކޮޅެއް ފުރަތަމަ ފެނިފައިވަނީ، އެގައުމުގެ ކަނަގާވާ ޕްރިފެކްޗަރގައެވެ. ޖަޕާނުގެ ކަމާ ގުޅުންހުރި އިދާރާތަކާ ހަވާލާދީ ރިޕޯޓުކޮށްފައިވާ ގޮތުގައި، ކަޅުކުލައިގައި ހުރި މިއެތިކޮޅުތައް ފެނިފައިވާ ބެޗްގައި ހިމެނޭ ވެކްސިން، 3,790 މީހެއްގެ ގަޔަށް ވަނީ ޖަހާފައެވެ. އެހެންނަމަވެސް، މިކަން ފާހަގަވީ ހިސާބުން، މި ބެޗްގެ ވެންސިންތައް ޖެހުން ވަނީ ހުއްޓާލާފައެވެ.

މި ހާދިސާ ހިނގާފައިވަނީ، މޮޑާނާ ވެކްސިންގެ 1.63 މިލިއަން ޑޯޒް ބޭނުންކުރުން އެގައުމުގައި ފާއިތުވެދިޔަ ހަފްތާގައި ވެސް މަޑުޖައްސާލާފައި ވަނިކޮށެވެ. ވެކްސިންގައި ނުހިމެނޭ އެއްޗެއް ފެނުމާ ގުޅިގެން، އެއް ބެޗެއްގެ 560,000 އެއްހާ ވެކްސިންގެ ބޭނުން ކުރުން މިހާރުވަނީ މަޑު ޖައްސާލާފައެވެ. މިކަން އިތުރަށް ތަހުގީގުކުރަން ފަށާފައިވާކަމަށް ޖަޕާނުގެ ކަމާބެހޭ ފަރާތްތަކާ ހަވާލާދީ ރިޕޯޓުކޮށްފައިވެއެވެ.

ޖަޕާނުގެ ފާމަސިސްޓަކަށް ކަޅު ކުލައިގެ މި އެތިކޮޅުތައް ފެނިފައިވަނީ، އާންމު އުސޫލުން ވެކްސިން ޖެހުމުގެ ކުރިން ފުޅީގެ ތެރޭގައި ވެކްސިނާ ނުގުޅޭ އެއްވެސް އެއްޗެއް ހުރިތޯ ބެލި ބެލުމުގެ ތެރެއިންނެވެ. ޝައްކު ކުރެވޭ ޒާތުގެ އެއްޗެއް ވެކްސިން ފުޅިތަކުގެ ތެރެއިން ފެނިފައިވާތީ، އެ ސަރަހައްދުގައި ވެކްސިން ފޯރުކޮށްދެމުން އައި ފަރާތުންވަނީ ވެކްސިންތައް އަނބުރާ ގެންގޮސްފައި ކަމަށް ރިޕޯޓުކޮށްފައިވެއެވެ.

މި ވެކްސިންތައް ޖެހުމުގެ ސަބަބުން އެއްވެސް މީހަކަށް އަދި ސިއްޙީ މައްސަލައެއް ކުރިމަތިވެގެން ރިޕޯޓުކޮށްފައެއް ނުވެއެވެ.

ޖަޕާނުގައި ކޯވިޑް19ގެ ހާލަތު އާދަޔާ ޚިލާފަށް ގޯސްވެފައިވާއިރު، ވެކްސިން ދިނުމުގައި ވެސް ޖަޕާނަށް މާބޮޑު ކުރިއެރުންތަކެއް ލިބިފައެއް ނެތެވެ. މިހާތަނަށް އެގައުމުގައި އާބާދީގެ 40 އިންސައްތައަށް ދެޑޯޒް ޖަހައި ނިންމާފައިވާއިރު، ފުރަތަމަ ޑޯޒް ޖަހާ ނިންމާފައިވަނީ އާބާދީގެ 50 އިންސައްތައަށެވެ.