ފިއްލަދޫ ކައުންސިލުން އެރަށުގައި ހެލްތު ޑޭ ފެސިލިޓީއެއް ގާއިމްކުރަނީ
ފެސިލިޓީ އަޅާ ފަރާތަކަށް 50އަހަރަށް، ގެސްޓް ހައުސް/ހޮޓާ އެޅުމަށް ދޫކުރުމަށް ބިމަށް އެދުމުގެ ފުރުސަތު ހުޅުވާލާނެ
ފިއްލަދޫގައި ކުރިއަށް ގެންދިޔަ ހެލްތު ސްކްރީނިންގ ޕްރޮގްރާމެއްގެ ތެރެއިން
ހއ. ފިލައްދޫ ކައުންސިލުން އެރަށުގައި ހެލްތު ޑޭ ފެސިލިޓީއެއް ގާއިމްކުރުމަށް ނިންމައިފިއެވެ.
ފިއްލަދޫ ކައުންސިލުން ބުނީ ކައުންސިލުން ތަރައްޤީކުރާ 2000 އެނދުގެ ޓޫރިސްޓް ވިލެޖައް އަމާޒުކޮށް ކައުންސިލުން ދައްކާ ބިމެއްގައި، "ހެލްތު ޑޭ ފެސިލިޓީއެއް" ތަރައްގީކޮށް ކައުންސިލާއި ހަވާލުކުރާނެ ފަރާތަކަށް 50 ހާސް އަކަފޫޓުގެ ބިމެއް އަކަފޫޓަކަށް މަދުވެގެން މަހަކު 50ލާރީގެ ރޭޓުން 50އަހަރަށް، ގެސްޓް ހައުސް/ހޮޓާ އެޅުމަށް ދޫކުރުމަށް ބިމަށް އެދުމުގެ ފުރުސަތު ހުޅުވާލާފައިވާ ކަމަށެވެ.
"ހެލްތު ޑޭ ފެސިލިޓީއެއް" ޑިވެލޮޕްކުރެވޭނެ މިންގަނޑުތަކުގެ ތެރޭގައި 11 ކަމެއް ކައުންސިލުން ވަނީ ފާހަގަކޮށްފައެވެ. އޭގެ ތެރޭގައި އެ ފެސިލިޓީގައި މަދުވެގެން 4 ކޮންސަލްޓޭޝަން ރޫމް، ޑެންޓަލް ރޫމް، ލެބޯޓަރީ، އެކްސްރޭ، ފާމަސީ، އޮފީސް، ޓްރީޓްމަންޓްރޫމް، ޕޯޓިކޯ އަދި މިނޫންވެސް މިކަމާއި ގުޅުން ހުރި ޚިދުމަތްތައް ޤާއިމް ކޮށްދޭންވާނެ ކަމަށް ބުނެފައިވެއެވެ. މިޚިދުމަތާއި ތަނުގެ ފެންވަރަކީ ޓޫރިސްޓުންނަށް ޚިދުމަތްދެވޭނެ ޒަމާނީ ފެންވަރުގެ ތަނަކަށް ވާންވާނެ ކަމަށް ވެސް ބުނެފައިވެއެވެ.
މީގެ އިތުރުން މި ފެސިލިޓީގެ މަސައްކަތް ނިންމުމަށްފަހު، ފެސިލިޓީ ކައުންސިލާއި ހަވާލު ކުރަންވާނެ ކަމަށާއި ފެސިލިޓީ ހިންގުމުގެ ޤާބިލް އަދި މިފަދަ ފެސިލިޓީއެއް ހިންގުމުގެ 15 އަހަރުގެ ތަޖުރިބާހުރި ފަރާތަކަށް ވާންވާނެ ކަމަށް ބުނެފައިވެއެވެ.
މީގެއިތުރުން މި ފެސިލިޓީ މަދުވެގެން 3 އަހަރު ކައުންސިލާއި ގުޅިގެން ހިންގުމުގެ ހުރިހައި ކަމެއް ކޮށްދީ ޒިންމާނަގަންވާނީ ޕްރޮޕޯސަލް ހުށައަޅާ ކާމިޔާބުކުރާ ފަރާތުން ކަމަށާއި އަދި ޓޫރިޒަމް ވިލެޖަކީ ގިނަ އަދަދެއްގެ ބިދޭސީން މަސައްކަތްކުރާނެ ތަނަކަށްވާނެތީ، މިފެސިލިޓީގައި ވާރކްޕާރމިޓް މެޑިކަލް މަސައްކަތް ފުރިހަމައަށް ހެދޭނެގޮތް ހަމަޖެހިފައި ހުންނަންވާނެ ކަމަށް ބުނެފައިވެއެވެ.
އެގޮތުން ފެސިލިޓީ ހިންގަމުން ދާއިރު އަހަރެއްގެ މައްޗަށް މަދުވެގެން 20 މެޑިކަލް ސްޕެޝަލިސްޓު އަދި ސްޕަރ ސްޕެސިއަލިޓީ ވިޒިޓް ހަމަޖައްސަންވާނެ ކަމަށް ބުނެފައިވެއެވެ. އަދި މި ފެސިލިޓީ ކައުންސިލާއި ހަވާލުކުރާއިރު ހުންނަންވާނީ ޕްރޮޕޯސަލް ކާމިޔާބުކުރާ ފަރާތުގެ އަމިއްލަ ޚަރަދުގައި ކައުންސިލުން ދައްކާ ބިމުގައި، ފުލީ އިކުއިޕްކޮށް އެކްޝަން، ލެބޯޓަރީ އަދި މިނޫންވެސް ފެސިލިޓީތައް ޤާއިމުކޮށް ފުރިހަމަ ކުރެވިފައި ކަމަށް ކައުންސިލުން ބުނެއެވެ.
އަދި ޕްރޮޕޯސަލް ކާމިޔާބުކުރާ ފަރާތުން 1 މިލިއަން ރުފިޔާގެ ޑިޕޮސިޓެއް ކައުންސިލައް ދައްކަންވާނެ ކަމަށް ބުނެފައިވެއެވެ. މި ޕްރޮޕޯސަލް ކާމިޔާބުކުރާފަރާތުން ގެސްޓްހައުސް/ހޮޓާއެޅުމަށް ދޫކުރެވޭ ބިމަށް ކަނޑައެޅިފައިވާ ކުލި ދައްކަން ފަށާނީ ބިމުގެ އެގްރިމެންޓްގައި ސޮއިކުރާ ތާރީޚުން ފެށިގެން 61 ވަނަ މީލާދީ މަހުންފެށިގެން ކަމަށް ބުނެފައިވެއެވެ. އަދި ގެސްޓްހައުސް/ ހޮޓާ އެޅުމާއި ފެސިލިޓީގެ މަސައްކަތް ނިންމައި، މަދުވެގެން 2 އަހަރުގެ ތެރޭގައި ޚިދުމަތް ދޭން ފަށަންވާނެ ކަމަށް ބުނެފައިވެއެވެ.
މީގެ އިތުރުން ބިމަށްއެދި ހުށައަޅާ ފަރާތުން، ހުށައަޅާ އިތުރު ކަންކަމާއި ސީއެސް އާރުގެ ގޮތުގައި ހުށައަޅާ ކަންކަމަށް ބަލައި އިސްކަންދެވޭނެ ކަމަށް ބުނެފައިވެއެވެ.
