ހއ. ފިއްލަދޫގެ އިޙުތިޞާސްގެ ދަށުން ދައްޕަރު ވަކިކުރުމާ ގުޅިގެން ޓްރާންސްޕޭރެންސީ މޯލްޑިވްސްއިން ކަންބޮޑުވުން ފާޅުކޮށްފިއެވެ.
ފިއްލަދޫއާ އެއް ފަޅެއްގައި އޮންނަ ދައްޕަރަކީ އެރަށުގެ ގިނަ ރައްޔިތުން ޕިކްނިކް ގޮސް އުޅޭ ފަޅު ރަށެކެވެ. ފިއްލަދޫގެ އިޙްތިޞާސުން ދައްޕަރު ވަކިކޮށްފައި ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ލިބޭ ބާރުގެ ދަށުން 29 އޮގަސްޓްވީ އާދިއްތަ ދުވަހު ނެރުއްވި ގަރާރަކުންނެވެ.
ފިއްލަދޫގެ އިޙުތިޞާސްގެ ދަށުން ދައްޕަރު ވަކިކުރުމާ ގުޅިގެން އެރަށުގެ ކައުންސިލުން ކަންބޮޑުވުންފާޅުކޮށްފައި ވަނިކޮށް ޓްރާންސްޕޭރެންސީން ބުނީ ފިއްލަދޫ ކައުންސިލްއާއި އެރަށުގެ ރައްޔިތުން ދައްޕަރުން ނަފާ ހޯދުމަށް ތައްޔާރުވެ ތިއްބާ އެރަށުގެ ރައްޔިތުންނާ އެއްވެސް ވަރަކަށް މަޝްވަރާކުރުމެއް ނެތި ސަރުކާރުން ނިންމި ނިންމުން ބަލައި ނުގަނެވޭނެ ކަމަށެވެ.
ޓްރާންސްޕޭރެންސީން ބުނީ ފިއްލަދޫގެ އިޙުތިޞާސްގެ ދަށުން ދައްޕަރު ވަކިކޮށްފައިވަނީ ގަވާއިދާ ޚިލާފަށް ކަމަށެވެ. މި މައްސަލައާ ގުޅޭގޮތުން ފިއްލަދޫގެ ރައްޔިތުންނާ މަޝްވަރާކުރުމަށް ޓްރާންސްޕޭރެންސީން ވަނީ ގޮވާލާފައިވެއެވެ. އަދި ރައްޔިތުންނަށް މަންފާވާނެ ގޮތަށް ކަންކަން ނިންމުމަށް ވެސް އެދިފައިވެއެވެ.
ފިއްލަދޫގެ އިޙުތިޞާސްގެ ދަށުން ދައްޕަރު ވަކިކުރުމާ ގުޅިގެން ގިނަ ބަޔަކު ކަންބޮޑުވުންފާޅުކުރަމުންދާއިރު، މި ނިންމުމާ ދެކޮޅަށް ''ސޭވް ދައްޕަރު''ގެ ނަމުގައި މިހާރު ވަނީ ޚާއްސަ ކެމްޕޭނެއް ފަށާފައެވެ.
ދައްޕަރަކީ ގުދުރަތީ އެތައް ރީތިކަމެއް ލިބިފައިވާ ރަށެކެވެ. މޫދާ ގުޅިފައިވާ ބޮޑު ކުޅިއެއް އެރަށުގައި އޮވެއެވެ. 2010 ވަނަ އަހަރު އެރަށުގައި ރިސޯޓެއް އެޅުމަށް ހަވާލު ކުރިއެވެ. ނަމަވެސް ފަހުން އެތަނުގައި ރިސޯޓް ގާއިމުކުރުމުގެ މަޝްރޫއު ވަނީ ހުއްޓާލާފައެވެ. އޭގެ ފަހުން 18 މަރޗް 2020ގައި ރައީސް ޞާލިހު ވަނީ ފިއްލަދޫގެ އިޙުތިޞާސްގެ ތެރޭގައި ދައްޕަރު ހިމަނާފައެވެ.
